Esdras puraꞌakó Tupana purákaꞌalo lanaꞌakéjami waꞌaté awakáñojlo yukuna marí
8
Iyamá kuwáꞌata keta keri laꞌaká wakajé, kaja piyuke Israel michú lakénami paꞌatako nañakajélami ejo, re neꞌemakáloje piño penaje. E kaja piyukeja neꞌejnaká piño Jerusalén ejo, re nawakákoloje penaje. E kaja nawakó piyukeja pajluwaja pajimila numaná, juni lokoꞌopani iꞌimakare ejo. E nemá newíñaꞌatajeri Ésdrasjlo, rijñaꞌakáloje Tupana purákaꞌalo, Moisés lanaꞌakare iꞌimaká, Tupana yuríkare Israel lakénamijlo iꞌimaká. 2 Iyamá kuwáꞌata keta keri keñoꞌokó wakajé, wawakó rejé piyuke. Achiñana, inaana, yuwaná, palá jemaꞌakaño purákaꞌaloji, kele awakaño. Esdras ñaꞌarí Tupana purákaꞌalo, 3 ripuraꞌakóloje rijwaꞌaté awakákaño rejejlo penaje. Lapiyami, eyá kaápuꞌuku ejená ripuraꞌó Tupana purákaꞌalo lanaꞌakéjami waꞌaté najló. Re neꞌemá pajimila numaná, juni lokoꞌopani iꞌimakare e.Piyukeja neká jemaꞌañó palá Esdras jaꞌapiyá, purákaꞌaloji ripuraꞌakaro waꞌaté najló jaꞌapiyá. 5 Ritáraꞌo yenoje kemachi, piyuke inaꞌuké amákaloje riká penaje. Rijmeꞌetaka Tupana purákaꞌalo lanaꞌakéjami aú, piyuke rejé awakákaño táraꞌaño. 6 Palá ripuraꞌakó Tupana nakú, rimá: “Piyukeja laꞌajeri wani Tupana”, ke. E rejé awakákaño jáchoꞌotaño nayátheꞌela, nemá: “Ñaké joꞌó riká, ñaké joꞌó riká”, ke. Rejomi najlámaꞌo teꞌerí jimaje napulá aú; palá napuraꞌakó Tupana nakú.
7 Rejomi Leví lakénami nakiyana kemaño inaꞌukejlo Tupana purákaꞌalo nakú, meke kemakánaka riꞌimaká, ketana rejé awakákaño yuriño napukuna chu. 8 Paineko napuraꞌó Tupana purákaꞌalo lanaꞌakéjami waꞌaté najló, rejomi naꞌapata najló riyukuna, naweꞌepíkaloje palá riká napuraꞌakaro waꞌaté penaje. 9 Rejé awakákaño jemaꞌañó mékeka Ripurákaꞌalo lanaꞌakéjami kemaká nakaje nakú, nalaꞌakáloje ñaké penaje, raú neyá. E nuká nawakáraꞌajeri Nehemías, eyá newíñaꞌatajeri Esdras, Tupana waꞌaté inaꞌukena chaya puraꞌajero kaja riꞌimaká, Leví lakénami jaꞌapátaño awakájeñojlo Ripurákaꞌalo, kele weká piyuke kemaño najló: “Ipechu laꞌaniño kamuꞌují, iyániña kaja, marí weꞌechú kaꞌalá iꞌimakale Tupánajlo aꞌakanami”, ke. 10 Esdras kemari kaja najló, napaꞌakóloje palá nojé aꞌajnejí ajñaje, eyá kajmú jalá amúraꞌatakejami, palá nojé pumeni iꞌirajé. Rimá kaja najló, nayukupéraꞌakaloje ajopana, unká aꞌajnejí iꞌimalárenajlo, najñákaloje naꞌajnewá najwaꞌaté penaje. Rimá kaja najló: “Marí ke walaꞌajika, marí weꞌechú kaꞌalá iꞌimakale Tupánajlo aꞌakanami. Ipechu iꞌimaniña kamuꞌují, Tupana laꞌakale iná pechu puꞌují, iná iꞌimakáloje palá raú penaje”, ke rimaká najló.
11 Leví lakénami iꞌijnaño kaja piyukeja rejé awakákaño eꞌiyowá, napechu palaꞌataje neyaka piyá, namanúmaꞌakoloje penaje. Tupánajlo naꞌakale riká weꞌechú kaꞌalá, ñakele unká nawátala inaꞌuké iyaka. 12 Rejomi awakaño rejé, paꞌañó naꞌajnewá ajñaje. Nayukupéraꞌa unká aꞌajnejí iꞌimalárenajlo, najñákaloje naꞌajnewá najwaꞌaté penaje. Keyajupa neꞌemaká pajwaꞌatéchaka, nakaje newíñaꞌatakare nakú neꞌemaká iphákale palá napechu nakojé.
RESUMEN: (Capítulo 9-13)
Reyá aꞌajná ñoꞌojó nawátake Tupana purákaꞌalo lanaꞌakéjami jaꞌapiyá jemaꞌakana; newíñaꞌako kaja rinaku, nalaꞌakáloje rimaká ke penaje. Nawajake apoꞌojó napéchuwa, júpimi iꞌimakaño michuna liyá, nalaꞌaká piyá puꞌuwaré, nalaꞌajika ke kaja. Nehemías iꞌimakeri nawakáraꞌajeri wani; riká amákeri neká; riwakáraꞌake nalaꞌaká nakaje Tupana purákaꞌalo lanaꞌakéjami kemájika ke. Unká riwátala rijwaꞌatéjena laꞌaká pulaí kaje ajopana teꞌeré eyájena waꞌaté, napichátaka piyá napechu Tupana liyá napurákaꞌalo aú. Palá kaja ramátajika rijwaꞌatéjena nakaje rilaꞌajíkare aú.
Ketana riyukuna.