Tupana purákaꞌalo jaꞌapátajeri Elías iꞌimaká. Riyukuna marí
17
Tupana purákaꞌalo jaꞌapátajeri Elías, pajimila Tisbe, Galaad teꞌeré nakú iꞌimakare, eyaje riꞌimaká. Riká penájemi iꞌijnari neꞌemakana Ahab waꞌaté puraꞌajó. E riphá rinaku, rimá rijló: “Tupana, kaphí Israel michú pechu iꞌimajíkare chojé, ií aꞌakana aú numaje pijló, piweꞌepíkaloje kewaka numaká. Rijwaꞌaté jápajeri kaja nuká. Riká ií aú numaje pijló marí ke: Chuwa unká wani juni jaꞌalajo maárowa júpija; unká kaja ijamani ñani witúkaꞌalaje aꞌajná, numájika juni jaꞌakóloje piño ejená”.2 Neꞌemakana laꞌaká piyá chapú Elías, Tupana kemari rijló: 3 “Chuwa páchoꞌo maare eyá, ají ke kamú jáchoꞌoko nakojó pitá. Inaꞌathana Querit turenaje pitajnajo, rejé pataꞌajó iꞌimakana liyá. Juni Jordán paꞌanojo pitá riká, re piꞌimajé. 4 Re juni iꞌimajé pijló, piꞌirakáloje penaje. Nuwakáraꞌaje kaja majáramina iꞌijnataka aꞌajnejí pijló rejé”.
5 E Elías laꞌarí Tupana wakáraꞌaka riꞌimaká ke. Riꞌijná ají ke inaꞌathana Kerit turenaje, rejé riyuró juni Jordán paꞌanojo pitá. 6 Lapiyami, eyá laínchu waꞌató, majáramina iꞌijnatájikano rijló pan, riꞌimi waꞌaté rejé. Eyá juni riꞌiraké inaꞌathana chiyá. 7 Ilé ke riꞌimajíkare, eꞌiyonaja meketana iꞌimajemi juni iꞌiwátañaa riká, makajreni raꞌajlúnami toꞌokó, kaja unká wani juni jaꞌakó nateꞌeré ewá.
Tupana wakáraꞌaka Elías iꞌijnaká iwakajílomi chaje yukuna marí
8 E kaja Tupana kemari Elíasjlo: 9 “Chuwa páchoꞌo maare eyá, piꞌijná ají ke pajimila Sarepta, Sidón teꞌeré nakú iꞌimakare ejo. Re piyurejo, rewá piꞌimakáloje penaje. Kaja nuwakáraꞌa pajluwaja iwakajílomi, re iꞌimakayo, aꞌaká pijló nakaje pajñákaloje penaje. Ruká aꞌajeyo pijló aꞌajnejí”, ke rimaká.
10 Raú Elías jáchoꞌoro riꞌimaká eyá, ají ke pajimila Sarepta ejo. Kaja ewaja riphá riká pajimila numanaje, re ramá pajluwájaru iwakajílomi wayoꞌoká jiyá rujluwa. E riwaꞌa rojló, rimá rojló:
—Eko pilaꞌá nojló nakaje. Pijiꞌichá nojló majó wejápaja juni, nuꞌurachi.
—Je —ke.
11 Wajé wani ruꞌujnakajla rijló rijñaꞌajé ee, Elías wáꞌari piño rojló, rimá rojló:
—Eko pilaꞌá piño nojló nakaje. Pijiꞌichá kaja nojló wejápaja pan nakiyana, nojñachi.
12 Raú rumá rijló:
—Unká wani ta pan iꞌimalá jeꞌemákejami nuñakaré chu, noꞌokáloje pijló riká. Tupana, pipechu iꞌimakare chojé kaphí, ií aú numá pijló kewaka: re wejápaja ñani ituꞌurú, puꞌuthé iná kápojo ke ñani nuleꞌejé kuya chu, kaja penaje. Re kaja wejápaja ñani nakaje jilá raꞌarú chu. Eyá nuꞌujichá majó jiyá wayoꞌojé, noꞌomákaloje riká ñani wajluwa nuꞌurí waꞌaté. Riká ñánija kalé wajñaje kaja penaje, rejomi watakaꞌatajo meꞌepijí nakú.
13 —Piwó kaꞌaniño ilé kaje waꞌaté —ke rimaká rojló—. Ñakele chuwa peꞌemicha ilé ituꞌurú ñani pimíchaje nakú. Paineko kalé peꞌemaje nojló ilé ituꞌurú lupemí nakiyá pajluwa pan kamuꞌujini, rejomi piꞌijnatá riká majó nojló, nojñákaloje penaje. Rejómiko peꞌemá ijluwa, piꞌirí waꞌaté ajñákaloje penaje. 14 Ilé ke pilaꞌajika, Tupana kemakale nojló marí ke rinaku: “Unká ituꞌurú kaje, nakaje jilami kaje waꞌaté tajnálajo, aꞌajná nuwakáraꞌajika juni jaꞌakó piño ejená”.
15 Raú rulaꞌá Elías wakáraꞌaka rulaꞌaká ke. Rejomi ñakeja rulaꞌajika naꞌajnewá. Júpija najñájika riká aꞌajnejí Elías waꞌaté, 16 eꞌiyonaja unká ituꞌurú kaje, nakaje jilami waꞌaté tajnáñaake neká. Tupana kemaká rinaku Elíasjlo iꞌimaká, keja riꞌimaká najló.
17 Kaja júpija Elías iꞌimaká najwaꞌaté, reꞌiyowá ke ruꞌurí laꞌakó ritami. Ritami wani riꞌimaká ritami kaje nakú, kaja akíchaje wani riꞌimaká, rinaku ritakaꞌá. 18 Rejéchami rumaká Elíasjlo:
—Tupana waꞌateje piká, ¿naje chi pilaꞌá nuká chapú wani marí ke? ¿Majó chi piꞌijná, puꞌuwaré nulaꞌakare aꞌakóloje nojló puꞌuwakaje, richona pikapichátakaloje nuꞌurí michú nuliyá penaje?
19 Rimá rojló:
—Paꞌachá nojló toꞌojmá michú tami.
Ruꞌujnatá rijló ruꞌurí michú tami. Rijñaꞌá riká rukápiya, e rikapi ritami ke ráchoꞌoko yenoje rikapure chojé. Rejé ritoꞌotá ritami ricamané chojé. 20 E kaphí ripuraꞌakó Tupana waꞌaté, rimá rijló: “Tupana, piyuke nakaje minárikana kaja piká; kaphí wani nupechu iꞌimakare chojé piká. Piká joꞌó yuríchari marirú iwakajílomi amaka chapú kaje yajwé, piyuríkale ruꞌurí michú takaꞌañáaka ruká. ¿Naje piliꞌichá ruká chapú wani, rotaꞌaká nuká maare ruñakaré chu eꞌiyonaja?”
21 E rijlámaꞌo weji ke pe ritami chaje, e kaphí rimaká Tupánajlo: “Tupana, kajmuchaji miná piká; nupechu iꞌimakare chojé kaphí piká. Pijló numá: pipaꞌatá marí yuwají támijlo kajmuchaji, riꞌimakáloje piño penaje”.
22 Tupana jemaꞌarí Elías jaꞌapiyá. 23 Rejéchami yuwají michú péchumi iphaka piño rinapónami eꞌiyajé. Rejéchami nawitúkaꞌaka kawakajo rijwaꞌaté, raló iꞌimaká ejo, e Elías kemari rojló:
—¡Piyakaꞌo majó, pamá kajmuni piꞌirí!
24 Raú rumá rijló:
—Chuwa nuweꞌepí kewaka Tupana waꞌateje wani piká, ripurákaꞌalo jaꞌapátajeri piká. Kewaka nakaje pimakare nakú, Tupana liyaje riꞌimakale.