Neꞌemakana Ahab cháꞌataka ajopana, ripiyá iꞌimakaño, puꞌuwaré laꞌakaná aú yukuna marí
16
Resumen: Salomón michú ejomi, ajopana, ajopana ke, wakáraꞌajika neká. Neꞌiyajena unká wani jemaꞌakeño Tupana jaꞌapiyá. Riwakajé kaja natamákaꞌato paliyáaka: pajluwaja iꞌimakeri israelítana iꞌimakana, eyá apú iꞌimakeri kaja nanakiyana iꞌimakana. Pajluwaja Israel michú iꞌirí ií iꞌimari Judá. Riká apú iꞌimari Judá michú lakénami iꞌimakana.29 Treinta y ocho jarechí ketana cha Asá iꞌimaká Judá michú lakénami wakáraꞌakana nakú. Rejéchami apú keñoꞌoká israelítana wakáraꞌakana. Rií iꞌimari Ahab. Omri michú iꞌirimi riꞌimaká. Riká iꞌimari nawakáraꞌakana nakú veintidós jarechí ketana. Pajimila Samaria e riꞌimaké. 30 Puꞌuwaré wani nakaje rilaꞌajíkare iꞌimajika Tupánajlo. Unká ajopana ripiyá wakáraꞌajikaño laꞌaké ñaké wani puꞌuwaré, rilaꞌajika ejé. 31 Raꞌajuta Jerobóam michú laꞌajika puꞌuwaré iꞌimajika, ke kaja rilaꞌajika puꞌuwaré, eꞌiyonaja riká cháꞌatakeri piyukeja neká puꞌuwaré laꞌakaná aú. Reꞌiyowá ke riwáꞌakako Jezabel waꞌaté. Raú richáꞌata neká puꞌuwaré laꞌakaná aú. Et-baal itu ruꞌumaká, Sidón eyájena iꞌimakana riꞌimaká. Napechu iꞌimaké Baal nakú: “Wachiꞌinárikana riká”, ke. Ke kaja Ahab pechu iꞌimajika rinaku najwaꞌaté. 32 Riwakáraꞌa kaja nalaꞌaká Samaria e Baaljlo riñakaré. 33 Riwakáraꞌa kaja nalaꞌaká Aserá jenami. Ilé ke riwakáraꞌajika nalaꞌaká, pachá Tupana yúchaꞌo íkiꞌija wani richá. Unká riyúchaꞌalo ñaké íkiꞌika ajopana, nawakáraꞌajeño ripiyá iꞌimakaño cha.