Phíyuꞌuke riꞌimaká wakajé, unká Salomón jemaꞌalá palá Tupana jaꞌapiyá. Riyukuna marí
11
Faraón itu iꞌimayo Salomón yajalo iꞌimaká, eꞌiyonaja kajrú wani riwátajika ajopana inaana, ajopana teꞌeré eyájena neꞌemajika eꞌiyonaja. Keꞌiyapejena neꞌemajika: neꞌiyajena iꞌimakeño moabítana, eyá ajopana iꞌimakeño amonítana, edonítana, sidoníana, eyá hitítana, kajena nakiyana waꞌaté riwáꞌakako. 2 Nanaku Tupana kemari piyukeja, júpimi ke iꞌimaká israelítanajlo, nawáꞌakako piyá nayani waꞌaté, napechu iꞌimaká piyá napechu ke kaja najwaꞌaté nachiꞌinárikanana nakú. Eꞌiyonaja íkiꞌija Salomón wátajika neꞌemajika, raú riwáꞌakakono najwaꞌaté. 3 Setecientos riluna, eyá ajopana, mapeja iꞌimakaño, iꞌimaño trescientos. Napachá ripechu pajnoꞌó Tupana liyá. 4 Kaja phíyuꞌuke riꞌimaká wakajé, riluna kaꞌátaño reꞌiyajé, riphákaloje najwaꞌaté nachiꞌinárikana jaꞌapí penaje. Raú nephájika naꞌapí, ke kaja riphájika naꞌapí najwaꞌaté. Kaja unká riweꞌepila ritukumó Tupana wátaka ke laꞌakana, raraꞌapá michú weꞌepíjika ritukumó ke. 5 Rilaꞌaké ripéchuwa puꞌují Astarté jenámijlo, Sidón eyájena pechu iꞌimajíkare nakú: “Wachiꞌinárikanaru ruká”, ke. Ñaké kaja rilaꞌajika puꞌují ripéchuwa Mílcomjlo, amonítana iphájikare jaꞌapijlo. Puꞌuwaré wani Milcom yukuna iꞌimajika. 6 Unká wani paala ilé ke Salomón laꞌajika iꞌimajika Tupánajlo, kaja unká rilaꞌaké palá riwakáraꞌajika riká ke, raraꞌapá David michú laꞌajika ke.7 Riwakajé Salomón laꞌarí kaja pukunaji Jerusalén e, kamú jáchoꞌoko nakojó pumitá. Re rilaꞌá pukunaji Quemosjlo, eyá Molocjlo waꞌaté, re nalaꞌakáloje puꞌují napéchuwa najló. Quemós nakú moabítana pechu iꞌimaké: “Riká wachiꞌinárikana”, ke. Eyá amonítana pechu iꞌimakeri Moloc nakú: “Riká wachiꞌinárikana”, ke. Puꞌuwaré wani nachiꞌinárikana yukuna iꞌimajika. 8 Ñaké waja rilaꞌajika rilúnajlo apaꞌawelo, apaꞌawélojlo ke pukunaji, re nephákaloje nachiꞌinárikana jaꞌapí penaje. Ajopana teꞌeré eyájena riluna iꞌimaká. Pukunaji rilaꞌajíkare najló chu nakáraꞌatake aꞌawaná iká nakaje jenámijlo. Re kaja nenoke napirana nakiyana nachiꞌinárikanajlo. 9 Tupana, israelítana pechu iꞌimajíkare chojé kaphí, yúchaꞌaro wani Salomón cha, ripajnoꞌotákale ripechu riliyá. Kaja iyaampe Tupana yaꞌatako rijló, ripuraꞌakóloje rijwaꞌaté penaje iꞌimaká. 10 Rimá kaja rijló, ripechu iꞌimaká piyá ajopana nakú: “Nuchiꞌinárikana neká”, ke, eꞌiyonaja unká raꞌalá rinakojó ripurákaꞌalo. 11 Ñaké iꞌimakale Tupana kemari rijló: “Kaja nuyurí pijló nupurákaꞌalo iꞌimaká, pemaꞌakáloje raꞌapiyá penaje, eꞌiyonaja unká wani paꞌalá pinakojó riká. Ilé ke pilaꞌakale, nuwata pikaꞌakana neꞌemakana iꞌimakana chiyá, noꞌokáloje pajluwaja pijwaꞌaté jápajeño nakiyana papumí chojé. 12 Eꞌiyonaja kalé numá paraꞌapá Davidjlo marí ke iꞌimaká: ‘Piyani, pilakénami, kele nakiyana iꞌimajeño neꞌemakana, nemaꞌajika ee noꞌopiyá’. Ilé ke numakale rijló iꞌimaká, nuyureje re joꞌó kaja piꞌimaká neꞌemakana, piꞌimajika ejaꞌawá chu ketana. 13 Eꞌiyonaja kalé unká nuyurílaje piyani nakiyana iꞌimaká neꞌemakana papumí chojé. Pajluwaja iꞌimajeri neꞌemakana meketánaja, rejomi nukaꞌajé riliyá kajrú rijwaꞌatéjena. Pajluwaja Israel iꞌirí lakénamija riwakáraꞌaje, numakale paraꞌapá Davidjlo: ‘Piyani, eyá pilakénami nakiyana iꞌimajeño neꞌemakánana penaje. Jerusalén ewá iꞌimakaño wakáraꞌajeño neꞌemajika, pajimila Jerusalén iꞌimakale nuleꞌejé pajimila, nuꞌuwapakare nujluwa’ ”, ke Tupana kemaká Salomonjlo.
Salomón michú takaꞌaká yukuna marí
41 Kapechuni wani Salomón iꞌimaká. Piyuke nakaje rilaꞌajíkare yukuna nayáꞌatake papera kaje chojé. Riká papera kaje, nalanaꞌakare chojé riyukuna, ií naꞌá Salomón yukuna, ke. 42 Iyamá inaꞌukena leꞌejé kele (40) jarechí ketana Salomón iꞌimaká israelítana iꞌimakana. 43 Ritakaꞌaká wakajé, najaꞌá ritami raraꞌapá michú tami awaꞌajé, pajimila Belén ejé. Rejomi riꞌirimi Roboam yuró neꞌemakana rapumí chojé.