Sabá eyájena iꞌimakánaru jemaꞌakeyo napuraꞌakó piyukeja nakaje Salomón laꞌajíkare nakú. Romaꞌaké nemaká rinaku: “Kajrú wani péchuri riká, kajrú Tupana aꞌakale riñathé”. Ilé ke romaꞌajíkale riyukuna, róchoꞌo ruñakajela eyá, ruꞌujnakáloje ají ke Jerusalén ejo richaje. Rejo ruꞌujná, rukulákatakoloje rinaku, rukejáꞌakaloje riliyá nakaje, puwicha nojé wani yukuna penaje. 2 Raú ruꞌujná, kajrú rujwaꞌatéjena waꞌaté ruphá rinaku. Kajrú kaja caméllona janapika nakaje rejo, roꞌokáloje riká Salomonjlo penaje. Najñaꞌá rejo kajrú nakaje jalá, puꞌumé amarí, oro, jipa palá nojé wani, kaje maká najñaꞌá najwaꞌató rejo. E kaja ruphá rinaku. Napuraꞌó pajwaꞌatéchaka, reꞌiyowá keja rukejáꞌaka riliyá kajrú nakaje, rupechu nakú iꞌimakare yukuna. 3 Piyuke Salomón iꞌimaká rojló nakaje rukejáꞌakare riliyá yukuna. Unká na iꞌimalá riyami unká riweꞌepílare yukuna, piyuke wani riꞌimaká rojló nakaje rukejáꞌakare riliyá yukuna. 4 Ilé ke romaka kapechuni wani riꞌimaká. Palani kaja riñakaré, riwakáraꞌakare laꞌakana rijluwa iꞌimaká. 5 Keꞌiyapé nojé kaja aꞌajnejí pitaró rimesané nakú, rajñákaloje penaje. Romá kaja raꞌapiyatéjena ñakaré iꞌimaká palá nojé, palá nojé kaja rijwaꞌaté jápajeño aꞌarumaká iꞌimaká. Romá kaja pukunaji, nenójikare nakú pirájina Tupánajlo riñakaré chu. Ilé kaje romaka aú, rupechu iꞌimá: “¡Meke piyuke wani!” 6 Raú rumá neꞌemakana Salomonjlo: “Wateꞌeré e neꞌemaké piyukuna nojló; napuraꞌakó piyukeja nakaje pilaꞌajíkare nakú; nemaké kaja pinaku: ‘Kajrú wani rilaꞌaká nakaje, kapechuni wani riꞌimakale’, ke, 7 eꞌiyonaja unká nomaꞌaké naꞌapiyá. Chuwa nokó nomíchaka kewaka kapechuni wani piká. Unká neꞌemalá nojló palá piyukeja piyukuna, rinakiyánaja kalé yukuna neꞌemá nojló. Kapechuni wani piká, re ñóꞌope wani nakaje pikapi, unká neꞌemalá nojló piyukeja ilé kaje yukuna. 8 ¡Meke palá wani marí kaje pilúnajlo, pijwaꞌaté jápajeñojlo waꞌaté! Weꞌechú kaꞌalá keja pijwaꞌatéjena pawaꞌá, nemaꞌakáloje pipurákaꞌalo, kapechú pipuraꞌakaro nakuno najwaꞌaté. 9 ¡Palani wani Tupana, pipechu iꞌimakare chojé kaphí, amari palá piꞌimaká! ¡Palá kaja ripechu iꞌimaká pinaku, raú riyurí piꞌimaká piyuke israelítana iꞌimakana penaje! Ñakeja wani Tupana wátaka rileꞌejena inaꞌukena, ñakele raꞌá piꞌimaká nawakáraꞌajeri penaje, piwakáraꞌakaloje neká palá laꞌakana nakú, neꞌemakáloje palá pajwaꞌatéchaka penaje”, ke rumaká rijló.