E rimá piño najló: 17 “Re noraꞌapá David pechu nakú iꞌimá pají laꞌakana Tupánajlo iꞌimaká, kajrú wani riphájikale raꞌapí. 18 Eꞌiyonaja Tupana kemari rijló iꞌimaká: ‘Palá pilaꞌaká, piꞌijnatákale pipéchuwa nojló pají laꞌakana nakú. 19 Eꞌiyonaja unká piká kalé wakáraꞌaje rilaꞌakana; piꞌirí wakáraꞌaje rilaꞌakana”, ke Tupana kemaká rijló iꞌimaká.

E rimá piño: 20 “Ñakele rimaká rinaku iꞌimaká chuwá riká meꞌetení. Kaja Tupana laꞌá chuwa piyukeja nakaje, rimaká rinaku noraꞌapá michujlo iꞌimaká ke. Kaja riphá rená chojé chuwa. Ñakele rimaká nunaku iꞌimaká, keja nuyuriko noraꞌapá michú apumí chojé piño israelítana iꞌimakana penaje. Nuwakáraꞌa kaja Tupana, kaphí wapechu iꞌimakare chojejlo, riñakaré laꞌakana. 21 Nuwakáraꞌa kaja pajluwa ukapú laꞌakana Tupana ñakaré chu, richojé walamáꞌatakaloje kaichama, Ripurákaꞌalo iꞌimakare chu. Re jipa nakú riyurí lanaꞌakéjami Ripurákaꞌalo. Rinaku rilanaꞌá piyuke nakaje rilaꞌakare waꞌajútaya michuna waꞌaté iꞌimaká, raꞌapiyá nemaꞌakáloje penaje, ráchoꞌota neꞌemaká Egipto teꞌeré eyá iꞌimaká”, ke Salomón kemaká najló.

22 Riñapátakaja ilé ke najló kemakana ejomi, ritáraꞌo altar awaꞌajé, reyá aꞌajemi ráchoꞌota raꞌanapitá yenoje. 23 E ripuraꞌó Tupana waꞌaté, rimá rijló: 24 “Kaja pilaꞌá chuwa piyuke nakaje pimaká noraꞌapá michujlo rinaku iꞌimaká ke. Ñakele pimaká rinaku júpimi iꞌimaká, chuwa rilaꞌó. 25 Ñakele Tupana, kaphí weká israelítana pechu iꞌimakare chojejlo, numá pilaꞌakáloje júpimi pimaká noraꞌapá michujlo iꞌimaká ke. Rijló pimá iꞌimaká: ‘Palá pilakénami jemaꞌajika ee noꞌopiyá, unká nuyurílaje ajopana iꞌimaká israelítana iꞌimakana. Pilakénami nakiyana waja nuyureje iꞌimaká neꞌemakana penaje. Ñakele papumí chojékaka ke nawakáraꞌajika’, ke pimaká iꞌimaká. 26 Raú numá pijló, pilaꞌakáloje pimaká wanaku noraꞌapá michujlo iꞌimaká ke. Pijwaꞌaté jápajeri riꞌimaká”, ke Salomón kemaká Tupánajlo.

E rimá piño rijló: 27 “Unká méñoꞌojo piꞌimalá marí ejaꞌawá nakú, kajruni wani piꞌimakale. Kajruni wani jeꞌechú, eꞌiyonaja unká kaja jeꞌechú iphala papukuna penaje. Eyá ilé ñakareji walaꞌakare pijló penaje, unká kaja piꞌimalajla richu. 28 Eꞌiyonaja numá pijló: Tupana, kaphí nupechu iꞌimakare chojejlo, pemaꞌá noꞌopiyá, numakare nakú pijló meꞌetení, pijwaꞌaté jápajeri nuká. 29 Nuwata piꞌimaká ilé ñakareji, walaꞌakare pijló, waꞌaphé weꞌechú, eyá lapí waꞌató. Kaja pimá marí ñakareji nakú iꞌimaká: piꞌimajé richu wajwaꞌaté, ke. Pemaꞌá nupurákaꞌalo noꞌopiyá, pijwaꞌaté jápajeri nuká. 30 Nuká, nujwaꞌatéjena waꞌaté puraꞌajiko wakajé, maare eyá aꞌajemi pijwaꞌaté, eko paꞌá pinakojó wapurákaꞌalo. Jeꞌechú, piñakaré wani iꞌimakare, chiyá iꞌimajemi paꞌajé pinakojó weká. Reyá iꞌimajemi, kaja pamó wachaje puꞌuwaré walaꞌakare liyá.

37 “Apala ke inaꞌuké ñaꞌajé kaꞌajná meꞌepijí panaku; neꞌemajé kaꞌajná natámina nayaripune nakú; unká kaja kaꞌajná nakaje iphálaje palá namena eꞌiyowá; piꞌiréjina kaꞌajná ajñátajeño namena; apala napinana iphaje kaꞌajná nanaku nakapichátaje; natámina neꞌemajika kaꞌajná. Ilé ke nakaje iꞌimajika najló wakajé kaꞌajná, napuraꞌajiko pijwaꞌaté rinaku. 38-39 Eko paꞌá pinakojó napurákaꞌalo. Namájika wakajé chapú kaje yajwé, pileꞌejena inaꞌukena puraꞌajó pijwaꞌaté marí ñakareji chiyá iꞌimajemi, eko paꞌá pinakojó napurákaꞌalo. Piñakaré jeꞌechú chiyá iꞌimajemi, pemaꞌajé napuraꞌakó pijwaꞌaté. Eko pamó nachaje, paꞌá kaja nañathé. Pikaja kalé weꞌepiri mékeka wapechu nakú nakaje. Palá nalaꞌajika lokópaꞌala, pilaꞌajé nanaku palá; eyá puꞌuwaré nalaꞌakare lokópaꞌala, kaja piwajaje neká, pikaja kalé weꞌepíkale mékeka inaꞌuké pechu nakú nakaje nawátakare laꞌakana. 40 Ilé ke pilaꞌajika ee, pileꞌejena inaꞌukena jemaꞌajeño palá paꞌapiyá, marí teꞌerí, paꞌakare waꞌajútaya michúnajlo iꞌimaká, nakú neꞌemajika ketana”, ke Salomón kemaká Tupánajlo.

E rimá piño rijló: 52 “Tupana, paꞌá pinakojó nupurákaꞌalo, pijwaꞌaté jápajeri nuká. Ñaké kaja paꞌá pinakojó pileꞌejena inaꞌukena, israelítana purákaꞌalo. Pemaꞌá waꞌapiyá wapurákaꞌalo, wapuraꞌajiko kewá pijwaꞌaté. 53 Piká, Tupana, iꞌiwapari pijluwa neꞌemaká piyuke ajopana inaꞌukena eꞌiyayá, neꞌemakáloje pileꞌejena inaꞌukena penaje. Ñaké kaja pimaká nanaku pijwaꞌaté jápajeri Moisés michujlo iꞌimaká, páchoꞌotaka neꞌemaká Egipto teꞌeré eyá iꞌimaká wakajé”.

Ilé ke Salomón puraꞌakó Tupana waꞌaté, naꞌaká yámona rijló ñakareji nalaꞌakare, riꞌimakáloje Tupana ñakaré ke penaje marí ejaꞌawá chu.

54 Altar, nenójikareno nakú pirájina, awaꞌajé ritáraꞌo riꞌirúpachi aú rijimaje, rejomi ráchoꞌota raꞌanapitá jeꞌechú chojé, ripuraꞌakóloje Tupana waꞌaté penaje. E kaja riñapata Tupana waꞌaté puraꞌakano, rejomi ritáraꞌo. 55 E ripuraꞌó rijwaꞌatéjena, re awakákaño rijwaꞌaté nakú palá. Rimá najló kaphí: 56 “Palá wapuraꞌakó Tupana nakú, ripalamane weꞌemakale. Unká na waꞌaté nókakajo iꞌimalaje meꞌetení. Tupana kemaká wanaku Moisés michujlo iꞌimaká, ke weká meꞌetení. 57 Palani Tupana iꞌimakajla wajwaꞌaté, riꞌimajika waꞌajútaya michuna waꞌaté iꞌimajika ke kaja. Palani wajló riꞌimakajla, unkákela riyurijla weká. 58 Nuwata raꞌaká wañathé raꞌapiyá jemaꞌakana aú, weꞌemakáloje palá laꞌakaño riwátaka ke, walaꞌakáloje kaja Ripurákaꞌalo, riyuríkare waꞌajútaya michúnajlo iꞌimaká, kemaká ke. 59 Nakaje numíchaje nakú rijló wajé, nuwata riꞌimaká ripechu nakuja ñakeja. Nuwata riweꞌepika ñakeja wekáꞌana muꞌují, neꞌemakana muꞌují waꞌaté. Nuwata raꞌaká nañathé nakaje, nalaꞌajíkare nakú kamuꞌují, lokoꞌopáneje. 60 Ilé ke nuwátaka rilaꞌaká weká palá, palá rilaꞌakare weká yukuna jemaꞌakóloje piyuke ejaꞌawá chuwá penaje, naweꞌepíkaloje raú rikaja kalé iná chiꞌinárikana. Unká na apú iꞌimalá, iná chiꞌinárikana penaje. 61 Nuwata iká, rileꞌejena inaꞌukena, jemaꞌaká raꞌapiyá palá; nuwata kaja jemaꞌaká Ripurákaꞌalo jaꞌapiyá, jemaꞌaká raꞌapiyá meꞌetení ke kaja”, ke rimaká rijwaꞌatéjena nakú.