Salomón keñoꞌoká neꞌemakana iꞌimakana yukuna marí
3
E kaja Salomón keñoꞌorí pulaí kaje laꞌakana Egipto eyájena waꞌaté, riwáꞌakakole neꞌemakana faraón itu waꞌaté. Riwáꞌakako rujwaꞌaté ejomi, ripaꞌatá ruká Pajimila David ejo. Re riꞌimá rujwaꞌaté nañapátaka riñakaré laꞌakana Jerusalén e ketana. Riwakajé nalaꞌá kaja Tupana ñakaré re. Nachútaꞌata kaja jipa panakojéchaka, raú nalaꞌakáloje kurara pajimila nakuwá tujlá ke pajimájechaka. 2 Unká joꞌó nañapátala Tupana ñakaré laꞌakana, eꞌiyonaja nakáraꞌatake mapeja Tupánajlo napirana tami nakiyana apú ewá, apú ewá ke. Ajopana, unká weꞌepílaño Tupana nakojé, nójika napirana kaje, ewá nakáraꞌatake neká rijló.Salomón kejáꞌaka Tupana liyá weꞌepíkaje yukuna marí
3 Íkiꞌija Salomón wátajika Tupana, ñakele remaꞌaké palá piyuke purákaꞌaloji lanaꞌakéjami, raraꞌapá michú yuríkare israelítanajlo iꞌimaká jaꞌapiyá. Eꞌiyonaja kalé ñaké kaja riwakáraꞌajika pirájina nókana unká weꞌepílaño Tupana nakojé leꞌejé altar iꞌimajika nakuwá.
4 Riꞌijnaké kaja apú ewá, apú ewá ke, pajimila Gabaón ejo, rejo nenókaloje napirana nakiyana Tupánajlo. Kajrú inaꞌukena iꞌijnajíkano rejo; ñaké kaja Salomón iꞌijnajíkano rejo. Re riwakáraꞌake nenoka mil napirana nakiyana, rejomi nakáraꞌatake natami Tupánajlo.
5 E pajluwape, Gabaón e riꞌimaká wakajé, pajluwaja lapí Tupana yaꞌataró rijló ritapú, rimá rijló: “Pikejaꞌa nuliyá nakaje piwátakare, noꞌojé pijló riká”.
6 E Salomón kemari rijló: “Palá wani pilaꞌaká noraꞌapá, paꞌapiyá jemaꞌajeri michú nakú iꞌimaká. Palá wani remaꞌajika paꞌapiyá iꞌimajika, ñakele rilaꞌaké piyuke nakaje piwakáraꞌajika riꞌimajika ke. Palá ripechu iꞌimajika pinaku, raú ñaké kaja pipechu iꞌimajika rinaku palá. Raú pilaꞌaké palá rinaku iꞌimajika. Ñakele paꞌá riñathé iꞌimaká, pajluwaja riꞌirimi nakiyana yuríkoloje rapumí chojé. Raú riyurí nuká rapumí chojé meꞌetení, nuꞌumakáloje neꞌemakana penaje. 7-8 Piká, Tupana, yuriri nuká neꞌemakana penaje, noraꞌapá David michú apumí chojé. Eꞌiyonaja walijímaka wani joꞌó nuká, unká nuweꞌepila palá kajrú wani nakaje nakojé, nuwakáraꞌakaloje palá pileꞌejena inaꞌukena penaje. Íkiꞌiruna wani neká. 9 Ñakele nuwata paꞌaká nojló weꞌepíkaje, nuweꞌepíkaloje palá mékeka nuwakáraꞌajika pileꞌejena inaꞌukena, nuweꞌepíkaloje naka laꞌakana palani, eyá naka unká paala. Unká na liyá iꞌimalá, palá riwakáraꞌakaloje pileꞌejena inaꞌukena, íkiꞌiruna wani neꞌemakale”, ke rimaká Tupánajlo ritapú.
10 Palani Tupánajlo nakaje rikejáꞌakare riliyá iꞌimaká. 11 Raú rimá rijló: “Palá wani pikejáꞌichaka nuliyá nakaje. Unká pikejáꞌalacha nuliyá, nuyuríkaloje piꞌimaká jupi marí ejaꞌawá nakú; unká kaja pimalacha nojló, nulaꞌakáloje piká kajrú leꞌejepelari penaje; unká kaja pimalacha nojló, nukapichátakaloje pijló chapú pinaku péchuruna penaje. Pikejáꞌichakale nuliyá weꞌepíkaje, piweꞌepíkaloje palá inaꞌuké wakáraꞌakana nakojé. 12 Noꞌojé pijló ilé nakaje pikejáꞌakare, kapechuni wani piꞌimakáloje penaje. Unká na apú iꞌimalá júpimi iꞌimaká, iꞌimari piká ke kapechuka iꞌimaká; unká kaja na iꞌimalaje piño piká ke kapechuka, piká ejomi. 13 Noꞌojé pijló weꞌepíkaje. Noꞌojé kaja pijló kajrú nakaje, kajrú piliñérute iꞌimakáloje penaje. Unká pikejáꞌalacha riká nuliyá, eꞌiyonaja noꞌojé pijló riká. Unká ajopana wakáraꞌajeño iꞌimalaje piká ke, piꞌimajika ketana. 14 Pilaꞌajé nakaje nuwátajika ke; pilaꞌajé kaja nupurákaꞌalo kemaká ke, paraꞌapá David laꞌajika iꞌimajika ke kaja. Ilé ke laꞌajeri piꞌimajika ee, nuyureje kaja piꞌimaká júpija marí ejaꞌawá chu”.
15 Salomón apoka ee, riweꞌepí Tupana puraꞌakó rijwaꞌaté ritapú. Raú riꞌijná Jerusalén ejo, iphari rejo. E ritáraꞌo kaichama, Tupana purákaꞌalo jipa nakú lanaꞌakéjami iꞌimakare chu awaꞌá. Re riwakáraꞌa nenoka pirájina, puꞌuwaré rilaꞌakare chaya, Tupana pechu, eyá ripechu, kele iꞌimakáloje palá panakojéchaka ke raú. Rejomi riwakáraꞌa nalaꞌaká kajrú aꞌajnejí, rajñákaloje raꞌajnewá raꞌapiyatéjena waꞌaté.
Kapechuni Salomón iꞌimaká purákaꞌaloji lamáꞌatakana nakú.
16 E pajluwa pe iyamá inaana iꞌijnaño neꞌemakana Salomón ejo, rilamáꞌatakaloje najló purákaꞌaloji penaje. Wapichana neꞌemaká. 17 Nephaka rinaku ee, pajluwájaru kemayo rijló marí ke:
—Weꞌemakana, ajopana chaje iꞌimaká piká. Pajluwa wañakaré chu weká pajñakani, marirú nujwákeꞌelo waꞌaté. Pajñakani weꞌemaká rujwaꞌaté ee, nuwaꞌa nuꞌurí iꞌimaká. 18 E weji ke kala iꞌimajemi, ruwaꞌa kaja ruleꞌejé iꞌimaká. Re weꞌemá rujwaꞌaté, iyamaja wañakaré chu, unká na apú iꞌimalá re wajwaꞌaté. 19 E pajluwa lapí ronó ruꞌurí, rotoꞌokole richá. 20 E riká lapija jenaji ke ropó, amayo kaja ronoka ruꞌurí michú. Manaꞌija nukamátako cháyomi, ruwaꞌa nuꞌurí ñani nowaꞌayá, rejomi ruyurí ruꞌurí michú tami nujepúnaꞌapaje. 21 Lapiyami nopó, noꞌokáloje nuꞌurí numá chuꞌuchú penaje, e nomá kaja ritakaꞌaká. Eyá palá wajmeꞌetaka ejéchami, nomaka palá, amayo unká nuꞌurí nuwáꞌakare penájemi kalé riꞌimaká.
22 —Unká pimaká ke kalé riká —ke apaꞌawelo kemaká rojló—. Nuꞌurí kele kajmuni joꞌó, eyá pileꞌejé kele takaꞌarí.
Eyá paineko puraꞌakayo, kemayo:
—Unká ilé pimaká ta ke kalé riká, piꞌirí ta kele takaꞌarí iꞌimaká. Eyá nuꞌurí kele, re joꞌó kaja kajmuni —ke nakhaꞌákako pajwaꞌatéchaka neꞌemakana jimaje.
—Ijiꞌichá majó jajalu, inaꞌuké nójona, nojló.
—Chuwá imataꞌá marí kerákoꞌopa peꞌiyoyá kajmúyaja. Rejomi aꞌajé peꞌiyowá pajluwájarujlo, eyá apú peꞌiyowá apaꞌawélojlo.
26 Ilé ke rimaká aú, kerákoꞌopa jaló wani iꞌimakayo wo kaꞌayó íkiꞌija, ruꞌurí riꞌimakale. Raú rumá mawó neꞌemakánajlo, nenoka piyá riká. Rumá rijló:
—Weꞌemakana, ¡piwakáraꞌaniña rinókana! ¡Palani paꞌaká riká nujwákeꞌewelojlo!
Eꞌiyonaja apaꞌawelo kemayo rijló:
—Paꞌaniña nojló riká; paꞌaniña kaja rojló riká. ¡Reja namataꞌareja riká peꞌiyoyá!
27 Rejéchami neꞌemakana puraꞌakó piño, rimá rijwaꞌaté jápajeñojlo:
—Inóniña riká, kaja waweꞌepicha chuwa mékajeruka raló. Ipaꞌatá rojló ruꞌurí ñani.
28 Ilé ke rilamáꞌataka palá najló purákaꞌaloji, rejomi kajrú riyukuna jemaꞌakó rijwaꞌatéjena eꞌiyowá. Raú kajrú nephájika raꞌapí, naweꞌepíjikale Tupana aꞌaká rijló weꞌepíkaje, rilamáꞌatakaloje palá purákaꞌaloji najló.