—¿Meketana júpika chi piꞌijnatájika pipéchuwa kamuꞌují Saúl nakú? Kaja unká nuwátala riꞌimaká israelítana iꞌimakana. Ñakele piꞌijná chuwa, pijñaꞌá kaja pijwaꞌató nakaje jilami, jema pirakana iꞌiwáwimi chojé. Jesé, Belén eyájeri, ñakaré ejo piꞌijnajé. Riká yaní eꞌiyayá nuꞌuwapá pajluwaja, riꞌimakáloje iꞌimakana penaje.

2 Raú Samuel kemari Tupánajlo:

—¿Meke chi nulaꞌajika, nuꞌujnakáloje rejo penaje? Saúl jemaꞌajika ee na penájeka nuꞌujnaká rejo yukuna, rinoje nuká.

Tupana kemari rijló:

—Piwaꞌa pajluwa jema pirakana iꞌirí pijwaꞌató. Rinaku pimaje rewá iꞌimakáñojlo: “Piraji noje nuꞌujná majó Tupánajlo”, ke. 3 Piphájika rejo ee, piyukupéraꞌaje Jesé, riꞌijnakáloje pijwaꞌaté rinókelana ejo. Rejo numaje pijló mékeka pilaꞌajika. Puꞌuwaká numájikare nakú pijló, paꞌajé iꞌimakánawa penaje.

4 Raú Samuel iꞌijná rejo, Tupana kemaká rijló ke. Riphaka pajimila Belén ejo ee, rewá iꞌimakaño, pheñawilana, iꞌijnaño riphaka amaje. Keroꞌokajo nakú neꞌejná rejo, nemá rijló:

—¿Palá pilaꞌakáloje weká penaje chi piꞌijná majó?

5 —Aꞌa, riká penaje nuphicha majó, piraji nojé nujiꞌichá Tupánajlo. Ñakele ikaꞌá puꞌuwaré ilaꞌakare ipechu nakiyá paineko, rejomi iꞌijnajé nujwaꞌaté rinókelana ejo.

Ñaké kaja rimaká Jesejlo, riyánijlo waꞌaté, nakaꞌakáloje napechu nakiyá puꞌuwaré nalaꞌakare, rejomi neꞌejnakáloje rijwaꞌaté rinókelana ejo. 6 E Jesé, riyani waꞌaté, iphaño rejo. Pajluwaja riꞌirí ií iꞌimari Eliab. Samuel amari nephaka rinaku ee, ramá Eliab. Raú ripechu iꞌimá rinaku: “Riká kaꞌajná Tupana iꞌiwapakare neꞌiyayá, raꞌakáloje riká wawakáraꞌajeri penaje”. 7 Eꞌiyonaja Tupana kemari rijló:

—Palá ramako pijló, waphereni kaja riká, eꞌiyonaja paꞌaniña pinakojó ilé kaje. Unká nuwátala riꞌimaká neꞌemakana penaje. Namákana aú inaꞌuké kemá ajopana inaꞌukena nakú mékajenaka neká; eyá nuká weꞌepiri palá mékeka inaꞌuké iꞌijnataka napéchuwa. Riká noꞌó nunakojó —ke rimaká rijló.

8 Rejomi Jesé wáꞌari piño apú riꞌirí Samuel jimaje. Rií iꞌimari Abinadab. Samuel kemari rijló:

—Unká kaja riká kalé Tupana iꞌiwapakare neꞌiyayá, riꞌimakáloje weꞌemakana penaje.

9 Rejomi riwaꞌa piño apú riꞌirí rijimaje. Rií iꞌimari Samá. Rinaku rimá piño:

—Unká kaja riká kalé Tupana iꞌiwapakare.

10 Apú, apú ke, riwáꞌaka neká rijimaje, iyamá kuwáꞌata kele neꞌemaká. Eꞌiyonaja ñaké waja Samuel kemaká rijló nanaku:

—Unká na iꞌimalá neꞌiyá Tupana iꞌiwapakare, riꞌimakáloje weꞌemakana penaje.

11 E rimá Jesejlo:

—¿E chi apú piꞌirí re joꞌó kaja?

—Aꞌa, re joꞌó kaja najmeremi, yaꞌajná kalé riká ovéjana amákana nakú.

Samuel kemari rijló:

—Piwakáraꞌa riwáꞌakana majó. Unká wakeñoꞌolaje wapéchuwa laꞌakana puꞌují Tupánajlo, aꞌajná riphájika majó ejená.

12 Raú Jesé wakáraꞌari apú najmeremi wáꞌakana rejo. Kaja ewaja riphá. Walijímaka riꞌimaká; peyajweni ramako; puꞌujñepú péchuri kaja riꞌimaká. E Tupana kemari Samueljlo:

—Riká kele nuwata, ñakele paꞌá riká iꞌimakana penaje.

13 Raú Samuel akhoꞌorí nakaje jilá riwilá eꞌiyajé rejena jimaje. Ilé ke raꞌaká riká, riꞌimakáloje neꞌemakana, aꞌajná ñoꞌojó chami penaje. David rií iꞌimaká. Ilé ke rilaꞌaká riká ejomi, Tupana Pechu jaꞌaró David nakojé, riꞌimakáloje rijwákeꞌewe penaje.

Rejomi Samuel iꞌimari riyukuno, e ripaꞌó rapumí chuwá pajimila Ramá ejo.

14 Kaja unká Tupana Pechu iꞌimaké Saúl waꞌaté, raú Tupana wakáraꞌari rijló jiñá pechu, rikawílaꞌakaloje rinaku penaje. 15 Raú rijwaꞌaté jápajeño kemaño rijló:

—Kaja piweꞌepí Tupana wakáraꞌaka pijló jiñá pechu, rikawílaꞌakaloje pinaku penaje. 16 Ñakele piwakáraꞌa wanakiyana kulaka pajluwaja inaꞌuké, weꞌepiri guitarra kaje nakú waraꞌakana palá, jiñá pechu kawílaꞌajika pinaku kewá, riwaraꞌakáloje pijló guitarra nakú, palá pipechu laꞌakóloje raú penaje.

17 Raú Saúl kemari najló:

—Ñaké riká, ikulá nojló pajluwaja palá weꞌepika guitarra kaje nakú waraꞌakana. Iphátajika riká ejomi, iwaꞌa riká majó.

18 E pajluwaja nanakiyana kemari Saúljlo:

—Re nomá Jesé, Belén eyájeri yaní eꞌiyá pajluwaja, palá wani weꞌepika guitarra kaje nakú waraꞌakana. Kaliyani kaja riká nókakajo kajejlo; kapechú kaja ripuraꞌakó piyukeja inaꞌukena waꞌaté; palá kaja Tupana aꞌaká riñathé.

19 Raú Saúl wakáraꞌari rijwaꞌaté jápajeño nakiyana iꞌijnaká Jesé chaje. Nephaka rinaku ee, nemá rijló:

—Wawakáraꞌajeri kemari pinaku, piwakáraꞌakaloje piꞌirí, ovéjana amájeri, rejo richaje.

20 —Je —ke rimaká.

Raú riwakáraꞌa riꞌirí David iꞌijnaká Saúl iꞌimaká ejo. Rijwaꞌaté riwakáraꞌa Saúljlo pan, kajmú jalá amúraꞌatakanami, eyá kawayá pirakana iꞌirí pajluwa, kaje riwakáraꞌa rijló. Pajluwa kawarú janapí piyuke rejo. 21 Ilé kaje aú David iphari Saúl nakú, rijápakaloje rijwaꞌaté penaje. E kaja rijápake rijwaꞌaté. Palá wani Saúl pechu iꞌimajika rinaku, raú rimá rijló, riꞌimakáloje riñathé aꞌajerí penaje. 22 Kajrú riwátajikale David, riwakáraꞌa purákaꞌaloji Jesejlo, rikejáꞌakaloje riꞌirí riliyá penaje. 23 Jiñá pechu, Tupana wakáraꞌakare Saúljlo iꞌimaká, kawílaꞌajika kewá rinaku, David ñaꞌajíkano rileꞌejé guitarra kaje, riwaraꞌakáloje rinaku rijló penaje. Raú palá ripechu laꞌajiko piño, waꞌató ke jiñá pechu jaꞌapájikano riliyá.