—Tupana kemari nojló iꞌimaká, piꞌimakáloje rileꞌejena inaꞌukena iꞌimakana penaje. Ñakele pemaꞌá meꞌetení mékeka riwátaka pilaꞌaká chuwa. 2 Marí ke Tupana, piyukeja wani weꞌepika nakaje laꞌakana, kemaká pinaku: “Chuwa nuwajájika Amalec lakénami, chapú naꞌajútaya laꞌakale israelítana, náchoꞌoko Egipto teꞌeré eyá iꞌimaká wakajé. 3 Ñakele piꞌijnajé chuwa pileꞌejena suráana waꞌaté nakapichátaje. Piyuke ikapichátajika neká, ikapichátaje kaja nanane, unká iweꞌepílaje namuꞌují. Inótaje piyukeja achiñana, inaana, nayani, kerákoꞌopana waꞌató inótaje. Inótaje kaja napirana piyukeja”, ke Tupana kemaká pinaku —ke Samuel kemaká Saúljlo.

4 E Saúl wáꞌari rileꞌejena inaꞌukena maná, neꞌejnakáloje pajimila Telaím ejo, re ripuraꞌakóloje najwaꞌaté. Rejéchami rawakátaka rileꞌejena suráana, doscientos mil neꞌemaká. Eyá Judá ikáꞌana nakiyana iꞌimaño kaja najwaꞌaté, diez mil achiñana. 5 Reyá Saúl jáchoꞌoro rileꞌejena suráana waꞌaté ají ke Amalec michú lakénami (amalecítana) iꞌimaká ejo. Pajimila, nawakáraꞌajeño iꞌimajíkare eꞌiyá, ejo neꞌejná. Unká chiyó nephá, natajnó inaꞌathana turenaje. 6 Reyá riwakáraꞌa purákaꞌaloji ajopana najwaꞌaté iꞌimakáño, kenítanajlo. Marí ke purákaꞌaloji kemaká: “Jáchoꞌo kiñaja ileruna inaꞌukena eꞌiyayá, wakapichátaka piyá iká najwaꞌaté. Palá aꞌajútaya michuna laꞌaká waꞌajútaya michuna nakú, náchoꞌoko Egipto teꞌeré eyá iꞌimaká wakajé”, ke rimaká najló.

Raú kenítana jáchoꞌoño piyuke amalecítana eꞌiyayá. 7 Rejéchami Saúl iꞌijnaká rileꞌejena suráana waꞌaté amalecítana waꞌaté nókajo. Kajrú nakapichátaka neká. Pajluwa pajimila Havilá eyá rikeñoꞌó nenótakana, aꞌajná apú pajimila Sur ejená. Egipto teꞌeré nakojó riká pajimila. Piyukeja rikapichátaka neká. 8 Neꞌemakana Agag ja kalé unká nenola. Napatá riká, eyá rileꞌejena suráana nenota piyukeja. 9 Unká Saúl, rileꞌejena suráana waꞌaté, nola neꞌemakana. Unká kaja nenótala napirana paláruna iꞌimakaño: jémana pirakana, ovéjana, kajena. Unká kaja nakapichátala palá nojé nakaje nanane eꞌiyayá, riká najñaꞌá najluwa. Nakaje, unká na penaje kalé iꞌimakare, rikaja kalé nakapichata piyuke.

10 Rejomi Tupana puraꞌaró Samuel waꞌaté, rimá rijló:

11 —¿Na penaje noꞌó Saúl iꞌimakana penaje iꞌimaká? Kaja riyurí riliyó noꞌopiyá jemaꞌakana, unká wani rilaꞌalá nuwakáraꞌaka riká ke.

Kajrú Samuel kawílaꞌako raú. Lapí ketana ripuraꞌakó Tupana waꞌaté Saúl chaya. 12 E muní ke rapoka lapiwá, riꞌijnakáloje Saúl waꞌaté puraꞌajó. Eꞌiyonaja riphaka rejo ee, re iꞌimakaño kemaño rijló:

—Kaja riꞌijichá pajimila Carmel ejo. Re riwakáraꞌa nalaꞌaká nakaje jipa nakiyana riweꞌepéjona penaje, napechu kapicháñaaka piyá riká. Rejo riꞌijichá paineko, rejomi richipúkaꞌaje pajimila Guilgal ewá.

13 Raú Samuel iꞌijnari rápumichu rejo, iphari rinaku. Saúl ajalákari riká, rimá rijló:

—Eko Tupana laꞌá piká palá. Kaja nulaꞌá Tupana wakáraꞌaka nuꞌumaká ke.

E Samuel kemari rijló:

14 —Eta, ¿naje kalé ta nomaꞌá ovéjana, jémana pirakana, kajena wáꞌaka mejé?

15 Saúl kemari rijló:

—Amalecítana liyá wawaꞌa neꞌemaká. Nujwaꞌatéjena kulaño neꞌiyá paláruna iꞌimakaño, wawáꞌakaloje neká majó penaje, wenókaloje neká Tupana, kaphí pipechu iꞌimakare chojejlo. Eyá ajopana wakapichata piyuke iꞌimaká.

E Samuel kemari rijló:

16 —Kaja ilérejeja, pipuraꞌaniño ta, chuwa nuꞌumachi pijló mékeka Tupana kemíchaka nojló lapí iꞌimichaka yukuna.

—Je, pimá nojló.

17 E Samuel kemari rijló:

—¿Unká chi pimalá pinakuwá iꞌimaká: “Majopeja iꞌimaká ta nuká”, ke? Eꞌiyonaja chuwa piká piyukeja israelítana wakáraꞌajeri. Kaja Tupana aꞌá piꞌimaká, piꞌimakáloje neꞌemakana penaje. 18 Tupana kemari pijló iꞌimaká, pikapichátakaloje piyukeja amalecítana, puꞌuwaré laꞌajeñó neꞌemakale, piyukeja napirana waꞌató. 19 Eta, ¿naje unká pemaꞌalá raꞌapiyá? ¿Naje piꞌiraó wani nakaje, ijñaꞌakare ijluwa naliyá iꞌimaká nakojé? Ilé ke pilaꞌaká aú, pilaꞌá nakaje unká Tupana wátalare kaje.

20 Saúl kemari rijló:

—Kaja ko nomaꞌá Tupana jaꞌapiyá nakaje rimakare nakú nojló iꞌimaká jaꞌapiyá. Kaja nulaꞌá nakaje riwakáraꞌakare nulaꞌaká iꞌimaká ke. Nuwaꞌa kaja majó patakeja Agag, neꞌemakánami; wakapichata kaja piyuke amalecítana, riwakáraꞌaka weꞌemaká ke. 21 Eꞌiyonaja kalé nujwaꞌatéjena suráana unká kapichátala napiránami, paláruna iꞌimakaño. Neká nawaꞌa majó, wenókaloje neká Guilgal e Tupana, riká pipechu iꞌimakare chojé kaphijlo.

22 Raú Samuel kemari piño rijló:

—Eꞌiyonaja apú nakaje iná laꞌakare chaje palaka Tupánajlo, riwátaka iná jemaꞌaká raꞌapiyá. Pirájina nókana rijló chaje riwátaka iná jemaꞌaká raꞌapiyá. 23 Iná lejñákachu apú, iná laꞌá puꞌuwaré. Ñaké kaja iná laꞌaká puꞌuwaré, unkachu iná jemaꞌalá Tupana jaꞌapiyá. Iná iphaka nakaje jenami jaꞌapí Tupana apumí chojé, ke kaja iná laꞌaká puꞌuwaré, unkachu iná laꞌalá riwátaka ke. Kaja piyurí piliyó Tupana jaꞌapiyá jemaꞌakana, ñakele chuwa ñaké kaja rikaꞌajika piká neꞌemakana kaje chiyá —ke rimaká Saúljlo.

24 Raú rimá Samueljlo:

—Ñaké riká. Puꞌuwaré wani joꞌó nulaꞌaká Tupana, unkale nomaꞌalá raꞌapiyá. Unká kaja noꞌolá pipurákaꞌalo nunakojé, pimaká nojló iꞌimaká ke. Nukeroꞌokó nujwaꞌatéjena piyá akuwaná nulaꞌá nemaká nojló iꞌimaká ke. 25 Numá pijló chuwa: pamó nuchaje, puꞌuwaré nulaꞌakare liyá. Piꞌijná nujwaꞌaté Guilgal ejo, walaꞌakáloje wapéchuwa palá Tupánajlo rejo penaje.

26 Eꞌiyonaja Samuel kemari rijló:

—Unká nuꞌujnalaje pijwaꞌaté, piyuríkale piliyó Tupana wakáraꞌaka ke laꞌakana. Ñakele chuwa ñaké kaja rikaꞌajika piká neꞌemakana iꞌimakana chiyá.

27 Raú Samuel pajnoꞌoró, ripaꞌakóloje penaje. Eja Saúl patarí riká raꞌarumaká nakiyá, raú rijiyoꞌó raꞌarumaká rinakojé. 28 E Samuel kemari rijló:

—Ilé pijiyoꞌochaka noꞌorumaká nunakojé, ke kaja Tupana jiyoꞌotájika piká chuwaka israelítana wakáraꞌajeri iꞌimakana chiyá, rejomi raꞌajé apú neꞌemakana papumí chojé. Riká jemaꞌajeri pichaje palaka raꞌapiyá. 29 Tupana palamane israelítana. Unká ripajlala, unká kaja rapiyákala ripechu. Unká inaꞌuké ke kalé riká, rapiyákakaloje ripechu penaje.

30 E Saúl kemari piño rijló:

—Puꞌuwaré wani joꞌó nulaꞌaká. Eꞌiyonaja numá pijló mawó, piꞌijnakáloje nujwaꞌaté Guilgal ejo, re nulamáꞌatakaloje nupéchuwa Tupana, riká pipechu iꞌimakare chojé kaphijlo. Raú piyuke israelítana, pheñawilana waꞌaté, weꞌepéjeño piphaka noꞌopí, neꞌemakana nuꞌumakale.

31 Raú Samuel iꞌijnari rijwaꞌaté Guilgal ejo. Re Saúl laꞌarí ripéchuwa palá Tupánajlo. 32 Rejomi Samuel kemari najló:

—Chuwa iwaꞌa majó nujimaje Agag, amalecítana iꞌimakánami.

Raú Agag iꞌijnari manaꞌija Samuel ejo. Unká rikeroꞌoló ripiyá, ripechu iꞌimakale: “Kaja nuꞌumaó, unká nenólaje nuká ke”. 33 Eꞌiyonaja Samuel kemari rijló:

—Pilekare aú pinó kajrú wani nujwaꞌatéjena inaana liyá nayani iꞌimaká. Ñakele ñaké kaja wayuríjika chuwa paló mayanikeru.

Riká penájeja Samuel mataꞌataka riká jajalu aú rejeja, Tupana jimaje ke. 34 Rejomi ripaꞌó Ramá ejo, eyá Saúl paꞌaró kaja riñakaré chojé. 35 Reyá aꞌajná ñoꞌojó unká Samuel iꞌijnaké Saúl amaje piño. Kamuꞌujija riꞌijnatájika ripéchuwa rinaku, Tupana kaꞌakale riꞌimaká neꞌemakana kaje chiyá, raꞌaká riꞌimaká ejomi.