—Chuwajá Tupana aꞌachari piká rileꞌejena inaꞌukena, israelítana, iꞌimakana penaje. Ñakele pimejñátaje neká chapú nanaku péchuruna liyá.

9 E kaja Saúl iꞌimari riyukuno Samueljlo, ripaꞌakóloje penaje. Rejéchami Tupana apiyákaka Saúl pechu. Nakaje Samuel kemakare nakú rijló iꞌimaká, iꞌimari ñaké rijló rejéchami. 10 E kaja Saúl, rijwákeꞌewe waꞌaté, jaꞌapaño ají ke pajimila Guibeá ejo. Re Tupana purákaꞌalo jaꞌapátajeño iꞌimaño. Neká jáchoꞌoño reyá, nephákaꞌakoloje Saúl waꞌaté penaje. Nephaka rinaku ee, Tupana Pechu jaꞌaró rinakojé. Raú riꞌimá neká ke kaja, Tupana purákaꞌalo jaꞌapátajeri meketánaja.

13 E kaja raꞌapá reyá, iphari riñakaré ejo. 14 Railá iꞌimari re, riká kemari najló:

—¿Méñoꞌojo chi iꞌimá?

Saúl kemari rijló:

—Noraꞌapá kawarútena kulaje weꞌemá, eꞌiyonaja unká wephátala neká, raú weꞌemá Samuel chaje.

15 —¿Meke Samuel kemaká ijló?

16 —Palá rimaká wajló: “Kaja nephata neká”, ke.

Unká Saúl iꞌimalá rijló mékeka rimaká rinaku yukuna, riꞌimakáloje neꞌemakana penaje.

17 E apú wakajé piño Samuel awakátari piyuke israelítana Mispá ejé, nalaꞌakáloje puꞌují napéchuwa Tupánajlo penaje. E kaja nephá rejo. 18 Re rimá najló:

—Marí ke Tupana kemaká inaku: “Nuká jáchoꞌotari piyukeja israelítana Egipto teꞌeré eyá iꞌimaká, chapú wani rewájena laꞌajíkale neká. Unká naliyaja kalé nuꞌumatá neꞌemaká; nuꞌumatá kaja neꞌemaká piyukeja chapú nanaku péchuruna iꞌimajíkaño liyá. 19 Chuwa kaja unká iwátala nuꞌumataka iká keꞌiyapejé chapú kaje liyá. Chuwa kaja unká iwátala nuká, raú imá nojló, noꞌokáloje ijló pajluwa iꞌimakana wani penaje. Ñakele chuwa iꞌijná majó nujimaje, ilapaꞌakóloje nujimaje ke. Ikáꞌana, ikáꞌana ke waꞌaté, itáraꞌajiko piyuke”, ke Tupana kemaká inaku.

20 E Samuel wakáraꞌari piyuke israelítana awakako pajluwa chojé. E Benjamín michú lakénami nakú Tupana kemari Samueljlo, riwáꞌakaloje neká ajopana eꞌiyayá, neꞌewapakáloje piño pajluwaja neꞌiyayá penaje. 21 Rejomi Tupana kemari rijló Quis iꞌirí nakú, riꞌijnakáloje neꞌiyayá penaje. Raú nakulá riká neꞌiyowá, eꞌiyonaja unká nephátala riká. 22 Rejomi napuraꞌó Tupana waꞌaté, rimakáloje najló méreka Saúl iꞌimaká, e Tupana kemari najló: “Re riká ilere ijwaꞌaté, inane eꞌiyajé rachiꞌiyó”.

23 Raú nechoꞌó rikulaje, amaño rataꞌakó nanane eꞌiyajé. E nawaꞌa riká Samuel ejo. Ajopana chaje waphereka riꞌimaká; ajopana iphaño riwakúlaꞌapa ejé rinakojé. Riphá rejo.

24 E Samuel kemari piyuke inaꞌukejlo:

—Marí inaꞌuké Tupana iꞌiwapá eꞌiyayá iꞌimakana penaje. Unká na apú iꞌimalá riká ke péchuri eꞌiyá, riꞌimakáloje iꞌimakana penaje.

Rejéchami nawíyoꞌotaka riká, nemá:

—Jupi wani wawátaka piꞌimaká weꞌemakana.

25 Eyá Samuel kemari najló mékeka neꞌemajika neꞌemakana waꞌaté. Nayáꞌata kaja nakaje, rimakare nakú najló, papera kaje chojé. Riká nayurí pají, nalaꞌajíkare chu puꞌují napéchuwa Tupánajlo chojé. Rejomi riwakáraꞌa napaꞌakó.