3 E apú wakajé Saúl jaraꞌapá kawarútena nakiyana kapichaño. Unká nephala piño napumí chuwá neꞌemaká ejé, raú raraꞌapá kemari rijló:

—Piꞌijná chuwa, pikulicha wapirana. Piwaꞌa pijwaꞌató pajluwaja nujwaꞌaté jápajeño nakiyana.

4 —Je —ke rimaká.

Raú neꞌejná ají ka nakulákana nakuja, jaꞌapaño Efraín teꞌeré ewá, ají ke ipuré eꞌiyowá; jaꞌapaño piño Salisá teꞌeré eꞌiyowá. Eꞌiyonaja unká nephátala nakawarútena, raú naꞌapá piño reyá, jaꞌapaño Saalim teꞌeré eꞌiyowá. Kaja ewaja nephá Bejamín teꞌeré eꞌiyajé, unká kaja nephátala neká. 5 Reyá neꞌejná piño, jaꞌapaño Suf teꞌeré eꞌiyowá, eꞌiyonaja unká kaja nephátala neká. Kaja ewaja Saúl kemari rijwákeꞌewejlo:

—Iꞌijná chuwa wapaꞌachó, apala meꞌetení noraꞌapá wo kaꞌakó, unkale wephala kiñaja. Kawaruna kapichaño iꞌimaká, chaje kaꞌajná riwó kaꞌakó meꞌetení wajwaꞌaté.

6 Eꞌiyonaja rijwaꞌaté iꞌimaká kemari rijló:

—Marí pajimila eꞌiyá re pajluwa inaꞌuké, Tupana purákaꞌalo jaꞌapátajeri riká. Piyuke inaꞌuké iphaka raꞌapí, rimaká nakaje nakú najló, keja nakaje iꞌimakale najló. ¿Naje unká weꞌejnalá rejo paineko? Iꞌijná wamíchachi riká, apala rimaje wajló mérekeka kawaruna.

7 —Iꞌijná —ke Saúl kemaká rijló—. Eꞌiyonaja, ¿na chi waꞌajé rijló riwemí? Unká na iꞌimalá wakapi meꞌetení. Unká kaja waꞌajné iꞌimalá, waꞌakáloje rijló rinakiyana penaje.

8 Raú rijwákeꞌewe kemari:

—Re wejápaja nuliñérute maare nukapi. Riká waꞌajé rijló riwemí, rimakáloje wajló méreka wephátajika neká penaje.

10 —Je, palani, iꞌijná.

E naꞌapá ají ke pajimila Tupana purákaꞌalo jaꞌapátajeri iꞌimaká ejo. 11 Wajé wani neꞌejraká ají ke pajimila lokoꞌopánejo ee, nephata inaana, juni jamoꞌojé iꞌijnakaño. Najló nemá:

—¿E chi nakaje nakojé weꞌepéjeri maare pajimila e?

12 —Aꞌa —ke nemaká—. Jaꞌapá, re joꞌó kaja aꞌajná ñoꞌojó. Wajé raꞌapíchaka maare eyá iꞌimichaka. Ají ke riꞌijichaka Tupánajlo ripirana nakiyana káraꞌataje. Jaꞌapá jechoꞌokelo rejo. Chuwajá nakáraꞌataje napirana nakiyana Tupana ñakaré chu. 13 Ñakele iphájika rejo penájeja ikulájika riká, apala rimujlúkaꞌañaa iká Tupana ñakaré chojé, rajñákaloje raꞌajnewá re ajopana inaꞌukena waꞌaté penaje. Kajrú wani inaꞌukena awakíchako rejé, najñákaloje pirájina nenóchajena iꞌimi penaje. Ñakele riwátakana nakú re neká meꞌetení Tupana ñakaré chu. Aꞌajná riphájika ee, ripuraꞌajó pirájina, nenóchajena nakú Tupana waꞌaté. Rejomi najñaje naꞌajnewá. Ñakele jaꞌapá rejo, unká chiyó riꞌijná nachaje —ke nemaká najló.

14 Raú naꞌapá piño reyá, ají ke pajimila eꞌiyajé. Wajé wani nakeñoꞌoká pajimila eꞌiyajé iphákana ee, namá Samuel iꞌijnaká majó nalokoꞌopani, riꞌijnakáloje Tupana ñakaré nawakájikaro chojé ejo penaje.

15 Lalemi ke Tupana kemaká Samueljlo marí ke iꞌimaká:

16 —Muní, meꞌetení kéchami, nuwakáraꞌaje pajluwaja inaꞌuké majó pichaje, Benjamín lakénami nakiyana. Riká paꞌajé nuleꞌejena inaꞌukena, israelítana iꞌimakana penaje. Riká iꞌimatájeri neká filistéona liyá, chapú wani nalaꞌaká neká. Kaja nomaꞌá meke nemakano nojló, noꞌokáloje nañathé penaje.

17 E Samuel amari Saúl iphaka rejé, raú Tupana kemari rijló:

—Ilé kele waícha, numakare nakú pijló lalemi. Riká iꞌimajeri nuleꞌejena inaꞌukena iꞌimakana.

18 Kaja nephá pajimila eꞌiyajé, e Saúl iphari Samuel nakú, rimá rijló:

—¿E pilaꞌakajla nojló nakaje? Pimá nojló mérekeka nakaje nakojé weꞌepéjeri ñakaré.

19 —Nuká ta po kele pikulá —ke Samuel kemaká rijló—. Chuwa piꞌijná nutukumá Tupana ñakaré ejo, re pajñaje paꞌajnewá nujwaꞌaté. Muní lapiyami numájika pijló piyukeja nakaje, pikejáꞌajikare nuliyá yukuna nakú. Rejómiko pipaꞌó. 20 Eyá paraꞌapá pirana, kawaruna kapichaño iꞌimaká meyálemi, piwó kaꞌaniño najwaꞌaté. Kaja nephata neká. Eyá nakaje, kajrú wani israelítana wátakare kaje, iꞌimajeri pijló, piyuke pejena waꞌaté.

21 Raú Saúl kemari rijló:

—Benjamín michú lakénami nakiyana nuká. Wejápaja inaꞌukena weká, mapeja iꞌimakaño weká paꞌayú waꞌaté, piyukeja israelítana eꞌiyayá wekaja kalé wejapa. ¿Eta naje chi pimá nojló ilé ke?

22 E Samuel wáꞌari Saúl, rijwaꞌaté iphaka waꞌaté, apaꞌalá ukapú kaje chojé. Kaja treinta inaꞌukena awakaño richu. E riwakáraꞌa Saúl yáꞌako ñákaꞌajori, ajopana chaje iꞌimakáñojlo chojé. 23 Rejomi Samuel kemari aꞌajnejí laꞌajérijlo:

—Pijñaꞌá majó riꞌimi, numíchaje nakú pijló iꞌimichaka, pilamáꞌatakaloje riká apoꞌojó penaje.

24 Raú aꞌajnejí laꞌajeri ñaꞌarí rikujyumi piyuke riꞌimi eꞌiyayá, raꞌapata riká Saúljlo. E Samuel kemari rijló:

—Pajñá chuwa ilé riꞌimi, nulamáꞌatakare pijló iꞌimaká, pajñákaloje riká ajopana, nuyukupéraꞌakarena waꞌaté penaje.

Riwakajé Saúl ajñari raꞌajnewá Samuel waꞌaté. 25 Rejomi napaꞌó Samuel ñakaré ejo kamátajo, 26 iphaño rejo, e Saúl kamátaro. Muní ke najmeꞌetá, e Samuel wáꞌari Saújlo, rimá rijló:

—Chuwa páchoꞌo, pipaꞌakóloje penaje.

E Saúl jáchoꞌoro, rejomi Samuel iꞌijnari rijwaꞌaté iñeꞌepú chojé. 27 Nephaka pajimila tajákaꞌalo ejé, rimá Saúljlo:

—Pimá pijwákeꞌewejlo, riꞌijnakáloje pitukumá rikoja meketánaja, piká yuréjero maare re joꞌó kaja. Nuwata pijló nakaje, Tupana kemakare nakú nojló iꞌimaká, nakú kemakana.

—Je —ke rimaká.