Israel lakénami wátaka pajluwaja inaꞌuké iꞌimaká neꞌemakana penaje yukuna marí
8
Kaja phíyuꞌuke wani Samuel iꞌimaká wakajé, raꞌá riyani iyamá israelítana nakiyana wakáraꞌajeño penaje. 2 Riꞌirí, paineko mothoꞌoká iꞌimaká ií iꞌimari Joel; raꞌapejé iꞌimaká ií iꞌimari Abías. Neká wakáraꞌakeño pajimila Beerseba ewájena. 3 Eꞌiyonaja unká nalaꞌaké nakaje naraꞌapá Samuel laꞌajika iꞌimajika ke, unká naꞌapala richuwá. Unká paala neꞌemajika, kajrú wani nawátajika nakaje najlúwaja. Liñeru ñaꞌakana najluwa nakuja neꞌejnatake napéchuwa. Neꞌiyajena aꞌakéñono najló liñeru, nalaꞌakáloje najló nakaje nawátajika ke penaje. Raú unká paala nalaꞌaká ajopana inaꞌukena. 4 Ñakele pheñawilana, israelítana nakiyana, awakaño nanaku puraꞌajó. Rejomi neꞌejná ají ke pajimila Ramá ejo, napuraꞌakóloje naraꞌapá waꞌaté, iphaño rinaku. 5 E nemá Samueljlo: “Kaja chuwa phíyuꞌuke wani piká. Eyá unká kaja piyani jaꞌapala pichuwá; unká wani nalaꞌalá nakaje pilaꞌajika iꞌimajika ke. Ñakele paꞌá pajluwaja wanakiyana, riꞌimakáloje piyukeja weꞌemakana penaje. Ajopana teꞌeré ewá iꞌimakaño, re waja neꞌemakana pajluwaja, pajluwaja ke”.6 Eꞌiyonaja unká paala riꞌimaká Samuel pechu nakú, nemakale rijló, raꞌakáloje najló pajluwaja neꞌemakana penaje. Raú ripuraꞌó Tupana waꞌaté rinaku. 7 E Tupana kemari rijló: 8 “Nóchoꞌotaka naꞌajútaya Egipto teꞌeré eyá iꞌimaká wakajé maárejecha, ñakeja napechu nunaku, napechu iꞌimaká pinaku meꞌetení ke kaja. Kaja napechu pajnoꞌó nuliyá, napechu iꞌimakáloje kaphí ajopana chiꞌinárikana chojé penaje. 9 Ñakele pemaꞌá naꞌapiyá, paꞌá najló pajluwaja neꞌemakana penaje. Paineko kalé piꞌimá palá najló riyukuna, naweꞌepíkaloje mékeka iná iꞌimakana wátaka iná laꞌaká rijló nakaje”, ke Tupana kemaká Samueljlo.
10 Rejomi riꞌijná kemaño rijló, raꞌakáloje najló pajluwaja neꞌemakana penaje chaje, riꞌimakáloje najló mékeka Tupana kemaká rijló yukuna penaje. 11 Rimá najló:
—Kaja imá nojló, noꞌokáloje pajluwaja wanakiyana iꞌimakana penaje. Ñakele marí ke rilaꞌajika iká: riwakáraꞌaje aꞌaká rijló iyani achiñana, neꞌemakáloje rileꞌejena suráana penaje. Neꞌiyajena riwakáraꞌaje iꞌijnaká natukumá peꞌiyowa jaꞌapaka, neꞌejnakare chu nókakajo ejo. Ajopánajlo rimaje, naꞌapákaloje kawaruna nakú, eyá ajopana raꞌajé riwaꞌaphena, namákaloje richá penaje. 12 Neꞌiyajena nakiyana raꞌajé mil suráana wakáraꞌajeño penaje, eyá ajopana nakiyana raꞌajé naꞌapiyatéjena penaje, neꞌemakáloje cincuenta suráana nakiyana wakáraꞌajeño penaje. Eyá ajopana iyani nakiyana riwakáraꞌaje jápaka rijló rimena eꞌiyá; nanakiyánaja kaja jápajeño rijló lekareji kaje laꞌakana nakú. 13 Eyá iyani inaana riwakáraꞌaje jápaka rijló keꞌiyapejé nakaje nakú riñakaré chu. 14 Rikaꞌajé kaja iliyá teꞌerí palá nojé rijluwa, raꞌakáloje riká raꞌapiyatéjenajlo penaje. 15 Ñaké kaja riwakáraꞌajika aꞌaká rijló, raꞌapiyatéjenajlo waꞌató, nakaje icha iꞌimajíkare imena eꞌiyowá nakiyana. Iyamá théꞌela kele richa iꞌimajika nakiyánano, riwakáraꞌaje aꞌaká rijló pajluwaja rinakiyana. 16 Rikaꞌajé kaja iliyá ijwaꞌaté jápajeño, najápakaloje rijló penaje; rikaꞌajé kaja iliyá palá nojena ipirana nakiyana, neꞌemakáloje rijló penaje. 17 Rikaꞌajé kaja iliyá ipirana nakiyana. Iyamá théꞌela kele iꞌimajíkaño nakiyánano, rikaꞌajé iliyá pajluwaja rijluwa. Ke riwakáraꞌajika iyani laꞌaká nakaje rijló, eyá iká waꞌató jápajeño rijló. 18 Ilé ke rilaꞌajika iká wakajé, kajrú akhaꞌajika rimaná. Ipuraꞌajó kaja rinaku iwátajika ke, eꞌiyonaja riwakajé unká Tupana aꞌalaje rinakojó ipurákaꞌalo —ke Samuel kemaká najló.
19 Eꞌiyonaja unká naꞌalá ripurákaꞌalo nanakojó, nemá rijló:
—Unká meke iꞌimalá ta, unká na penaje pimíchaje nakú wajló iꞌimalá. 20 Re waja piyuke ajopana teꞌeré ewájena iꞌimakana. Ñaké kaja wawátaka pajluwaja iꞌimaká weꞌemakana, riwakáraꞌakaloje waleꞌejena suráana nókako ajopana waꞌaté penaje.
21 Ilé ke Samuel jemaꞌaká piyukeja inaꞌukena kemaká rijló aú, riꞌijná Tupana waꞌaté puraꞌajó, riꞌimakáloje rijló riyukuna penaje. 22 E Tupana kemari rijló:
—Pilaꞌá najló riká nemaká ke. Paꞌá pajluwaja inakiyana iꞌimakánawa penaje.
Rejomi Samuel paꞌaró rapumí chuwá nachaje; riphá nanaku, e riꞌimá najló riyukuna. Rejomi riwakáraꞌa napaꞌakó nañakajela ejo.