4 Nókakajo nakú neꞌemaké filistéona waꞌaté. Kaja nacháꞌata filistéona nakiyana, ñakele chapú namájika piyuke israelítana. Piyuke riyukuna jemaꞌajiko israelítana teꞌeré eꞌiyowá. Ñaké iꞌimakale Saúl, rileꞌejena suráana waꞌaté, awakaño pajimila Guilgal ejé, nenókakoloje najwaꞌaté piño. 5 Ñaké kaja filistéona awakako aꞌajná ñoꞌojó ke naliyá, nenókakoloje kaja najwaꞌaté penaje. Treinta mil naleꞌejé peꞌiyowa jaꞌapaka, nenókakarono chu iꞌimaká, eyá seis mil naleꞌejena suráana iꞌimaká jaꞌapaño kawaruna nakú. Eyá íkiꞌiruna wani naleꞌejena suráana iꞌimaká. Keꞌepé, juni jalomi turenawa iꞌimakare, ke kaja íkiꞌika neꞌemaká. E kaja pajimila Micmás ejé nawakó iꞌimaká, rejé natáraꞌata napajró. Kamú jáchoꞌoko ejo pumitá pajimila Bet-avén ejé nawakó, nenókakoloje najwaꞌaté penaje. 6 Kaja piyukeja israelítana keroꞌokó napiyá, kajrú wani neꞌemakale. Raú nataꞌó napiyá ulawí, juni amoꞌokela aphú chuwá, jipa aphú chuwá nataꞌañáa neká. 7 Neꞌiyajena ñaañó juni Jordán paꞌanojo pitá. Eyá Saúl, suráana rijwaꞌaté iꞌimakaño waꞌaté, yuriño Guilgal e re joꞌó kaja. Keroꞌokajo nakuja rileꞌejena suráana iꞌimaká.

8 Apú wakajé Samuel kemari Saúljlo: “Pajluwa jápakaje iꞌimajemi nuká kaꞌajnó pirájina káraꞌataje Tupánajlo”, ke. Ñakele riwátakana nakú Saúl iꞌimari re, eꞌiyonaja unká Samuel iphala rená chuwá. Raú rileꞌejena suráana nakiyana keñoꞌoñó ripaꞌañáakana. 9 Raú rimá najló:

—Ijñaꞌá majó wapirana nakiyana, wakáraꞌatakaloje natami Tupánajlo puꞌuwaré walaꞌakare chaya penaje.

Raú nawaꞌa neká rejo. Rejomi Saúl káraꞌatari neká rikó Tupánajlo. 10 Riñapátakaja nakáraꞌatakana eꞌiyowá ke Samuel iphaka rejé, raú riꞌijná rajalákaje. 11 E Samuel kemari rijló:

—¿Na penaje chi piliꞌichá marí ke?

Saúl kemari rijló:

—Nomaka aú nuleꞌejena inaꞌukena nakiyana paꞌañáaka nuká, eyá unká kaja piphala pená chuwá, ñaké kaja filistéona leꞌejena suráana awakako Micmás ejé wajwaꞌaté nókajo. 12 Raú nupechu iꞌimichá: Apala filistéona iphaje majó Guilgal ejé wajwaꞌaté nókajo. Apala neꞌemá manaꞌí chiyó nuchá, unká chiyó numá Tupánajlo raꞌakáloje nuñathé penaje. Marí ke riꞌimakale wajló, raú nokó nukáraꞌatiyaka rijló pirájina tami.

13 Samuel kemari rijló:

—¡Mapechúruna laꞌaká nakaje, ke wani piliꞌichaka ta! Tupana kemari pinaku, piwátakaloje nuká. Pemiꞌichákela raꞌapiyá, rimaká pinaku ke, ñakeja wani piꞌimajíkajla israelítana iꞌimakana penaje. Ñaké kaja piyanimínami iꞌimajíkajla papumí chojé nawakáraꞌajeño penaje. 14 Eꞌiyonaja chuwa, unkale pemaꞌalacha raꞌapiyá, unká nakaje iꞌimalaje ñaké pijló. Tupana kulájeri apú riwátajikare, riꞌimakáloje israelítana iꞌimakana penaje. Ilé ke riꞌimajika, unká pachá pemaꞌalacha Tupana jaꞌapiyá.

15 Rejéchami Samuel jaꞌapáñaaka riká.