2 E Tupana kemari Gedeónjlo: 3 “Kajrú wani pijwaꞌatéjena maare pijwaꞌaté. Noꞌokela meꞌetení nañathé, nakapichátakaloje madianítana penaje, e pijwaꞌatéjena pechu iꞌimakajla nanakuwá: ‘Íkiꞌiruna weꞌemichákale aú wakapicháchiya neká’, ke. Raú unká naweꞌepílajla nuká aꞌachaka nañathé nakapichátakana aú. Eko pimá piyukeja pijwaꞌatéjenajlo marí ke: Keroꞌojeño nókakajo piyá, paꞌajeño nañakaré ejo”, ke Tupana kemaká rijló.

4 Eꞌiyonaja unká paala Tupana pechu nakú riꞌimaká, íkiꞌiruna wani joꞌó yuríkole Gedeón waꞌaté re joꞌó kaja. Raú rimá piño rijló: “Re joꞌó kaja íkiꞌiruna wani pijwaꞌatéjena. Ñakele piwaꞌa neká juni turenaje, neꞌerakáloje rinakiyá penaje. Re notáꞌaje neká piyukeja, rejomi numaje pijló mékajenaka iꞌijnajeño pijwaꞌaté, eyá mékajenaka paꞌajeño nañakaré ejo”.

5 Raú Gedeón witúkaꞌari rijwaꞌatéjena waꞌaté juni iꞌirajé. Nephaka rejé ee, Tupana kemari rijló: “Piwáꞌaje ajopana eꞌiyayá iꞌirajeño juni nakápiyo, yáwina pirakana iꞌiraká ke. Eyá iꞌirajeño juni najlámaꞌajiko ejomi, unká piwáꞌalaje pijwaꞌató”.

6 Iꞌiraño juni nakápiyo, yáwina pirakana iꞌiraká ke, neká iꞌimaño trescientos. Eyá ajopana nanakiyana iꞌiraño juni najlámaꞌako ejomi. 7 E Tupana kemari Gedeónjlo: “Mariruna achiñana, trescientos waꞌateja nuꞌumataje iká madianítana liyá. Najwaꞌaté nukapichátaje neká. Eyá ajopana, piyukeja paꞌajeño nañakaré ejo”.

8 Raú Gedeón wakáraꞌari ajopana paꞌakó piyukeja nañakaré ejo. Napaꞌakó yámona, rimá najló, nayuríkaloje naleꞌejé luwiluwí, iꞌichilá, kaje rejé. E kaja napaꞌó. Tupana iꞌiwapakárena trescientos ja kalé yuriño re. Re yenojo kemachi neꞌemá napajré chu, eyá madianítana iꞌimaño naꞌapojó pitá kemachi napajré chu kaja.

9 E kaja riwakajé lapí Tupana kemari Gedeónjlo: 10 “Páchoꞌo, chuwaka piwitúkaꞌaka pijwaꞌatéjena waꞌaté, madianítana waꞌaté nókajo. Nuká aꞌajeri piñathé, icháꞌatakaloje neká nókakajo aú penaje. Pikeroꞌojiko ee najwaꞌaté nókakano piyá, piwitúkaꞌa paineko nachaje, pijwaꞌaté jápajeri Purá waꞌaté. 11 Iphájika nanaku ee, pemaꞌajé mékeka nemaká, raú pipechu laꞌajó kaphí, piꞌijnakáloje pijwaꞌatéjena waꞌaté najwaꞌaté nókajo penaje”.

Raú Gedeón witúkaꞌari lapí napinana pajré iꞌimaká ejo, rijwaꞌaté jápajeri Purá waꞌaté. Kaja ewaja nephá paineko iꞌimakaño pajré awaꞌajé. 12 Íkiꞌiruna madianítana iꞌimaká, ñaké kaja íkiꞌirunaka amalecítana iꞌimaká. Kajrú kaja naleꞌejena caméllona iꞌimaká, kajrú natami lapaꞌakó rewá. 13 Kaja nephá napajré awaꞌajé, e nemaꞌá pajluwaja suráa iꞌimaká apujlo ritapú yukuna, rimá rijló:

—Marí ke nutapúniꞌichaka: nutapú nomicha pan kaje pilákichako majó weꞌemaká ejo. E riphákiꞌicho pajluwa wapajré waꞌaté, raú rikajyaꞌatiya riká pajreji.

14 Raú rijwákeꞌewe kemari rijló:

—Marí ke kemakánaka riká: Joás iꞌirí Gedeón, rijwaꞌatéjena, kele kapichátajeño weká. Tupana aꞌajeri riñathé, richáꞌatakaloje piyukeja weká penaje.

15 Gedeón jemaꞌarí mékeka riꞌimaká rijló ritapú yukuna, rejomi remaꞌá kaja mékeka rijwákeꞌewe kemaká rijló rinaku, raú puꞌují wani ripechu iꞌimaká Tupana nakú. Rejomi ripaꞌó rijwaꞌatéjena iꞌimaká ejo, rimá najló:

—¡Chuwá jáchoꞌo, Tupana aꞌajeri wañathé, wacháꞌatakaloje madianítana penaje!

16 Riká penájeja náchoꞌoko reyá. Náchoꞌoko reyá piyá, ritamákaꞌata rijwaꞌatéjena weji kele puku, apaꞌamana, apaꞌamana ke. Rejomi raꞌá najló luwiluwí kaje nanakojó. Raꞌá kaja najló nanakojó jepé lukúnaꞌakeja, iꞌichilá jaꞌapí iꞌimakare. 17 E rimá najló:

—Chuwa iꞌijná, weꞌejnachi. Nuká, nujwaꞌatéjena waꞌaté, iphájeño paꞌanojo pitá ke, chapú wanaku péchuruna pajré toꞌokó ejé, eyá iká yakáꞌajeño wachaje. Amájika walaꞌaká ke kaja ilaꞌajika. 18 Waphoꞌojika ee waluwiluwine chojé, ñaké kaja aphoꞌojika iluwiluwine chojé wajwaꞌaté, pajñakani ke, piyukeja napajré toꞌokó ewá. Rejomi awíyoꞌoje marí ke: “Tupánajlo, Gedeónjlo waꞌaté”, keja awíyoꞌojika —ke rimaká najló.

19 E kaja nawitúkaꞌa rejo. E Gedeón, rijwaꞌatéjena waꞌaté, iphaño napajré toꞌokó ejé, paꞌanojo pitá nakojó. Cien rijwaꞌatéjena iꞌimaká rijwaꞌaté. Nephá rejo lapí jenaje ke, wajé wani madianítana waꞌaphena apiyákako ee. Rejéchami naphoꞌoká naluwiluwine chojé, waꞌató ke namajákaꞌataka iꞌichilá nakapi iꞌimakare. 20 Pajñakani ke ajopana, ajopana ke, laꞌaká ñakeja kaja. Eyá nayátheꞌela pajrú aú napatá jepé kaje, kaꞌañá nayátheꞌela aú napatá naluwiluwine, e nawíyoꞌo: “Tupánajlo, Gedeónjlo waꞌaté”, ke nawíyoꞌoka. 21 Rejomi manaꞌija natáraꞌako neꞌemaká ewá. Eja madianítana jáchoꞌoño napajré jaꞌapiyá, neñaakóloje penaje, kajrú nawíyoꞌoka. 22 Waꞌató ke Gedeón, rijwaꞌatéjena waꞌaté, aphoꞌoká naluwiluwine chojé. E Tupana laꞌarí madianítana, nenókakoloje pajwaꞌatéchaka penaje, e kaja ajopana ñaañó reyá. Neꞌejná ají ke pajimila Bet-sitá, Sererá, kele lokoꞌopáneje, tajnaño Abel-meholá teꞌeré nakojé, Tabat teꞌeré awaꞌá riká.

23 Waꞌaté ke Gedeón wakáraꞌaka rijwaꞌatéjena nakiyana iꞌijnaká ajopana israelítana amaje, ají ke Aser teꞌeré ejo. Neftalí michú, Manasés michú lakénami, kele neꞌemaká. Nephaka nanaku rejo ee, nemá najló, nechoꞌótakaloje madianítana penaje. 24 Ñakeja kaja riwakáraꞌaka piño ajopana iꞌijnaká ajopánajlo kemaje Efraín teꞌeré ejo, yenuri eꞌiyá iꞌimakáñojlo. Nawakáraꞌa piyukeja achiñana rewá iꞌimakaño witúkaꞌaka, nenókakoloje madianítana waꞌaté penaje. Najló nemá, neꞌejnakáloje juni Bet-bará e iꞌimaká turenaje, eyá Jordán turenaje, nephákaloje rejo, madianítana kuwáꞌaka piyá paꞌanojo pitá. Nemaká najló iꞌimaká ke Efraín eyájena laꞌaká. 25 E kaja ajopana iꞌijnaño najwaꞌaté nókajo. Neká cháꞌataño neká, eyá napatá madianítana wakáraꞌajeño iyamá. Pajluwa ií iꞌimari Oreb, apú ií iꞌimari Zeeb. Oreb michú nenó kajruni jipa iꞌimaká e. Nenoka riꞌimaká ejomi, naꞌá riká jipa ií Oreb, ke. Zeeb michú nenó kajmú kaje apákaꞌaruna e. Zeeb, ke kaja kajmú apákaꞌaruna ií iꞌimaká, nenoka riꞌimaká ejomi. E neꞌejnatá nawakáraꞌajeño michuna wílaꞌarumi Gedeón ejo, Jordán paꞌanojo pitá.