2 “Kaja ciento veinte jarechí cha nuká, kaja unká nuliyá iꞌimalá meꞌetení. Unká kaja nutejmú iꞌimalá, noꞌopákaloje apú ewá, apú ewá ke penaje. Tupana kemari kaja nojló iꞌimaká: ‘Unká pikuwáꞌalaje najwaꞌaté Jordán paꞌanojo pitá’, ke. 3-4 Tupana iꞌijnajeri itukumá rejo, rikapichátakaloje ipiyá inaꞌuké rewá iꞌimakaño, nateꞌeremi yuríkoloje ijló iteꞌerewa penaje. Rikapichata amorréona nakiyana iꞌimaká. Sihón, Og, kele waꞌatéjena neꞌemaká michuna. Rikapichátaka neꞌemaká, ke kaja rikapichátajika piño rewá iꞌimakaño ipiyá. Josué wáꞌajeri iká rejo; riká iꞌimajeri iwakáraꞌajeri, Tupana kemaká rinaku iꞌimaká keja riꞌimajika. 5 Tupana aꞌajeri iñathé nacháꞌatakana aú, ñakele ilaꞌajé neká, Tupana wakáraꞌajika ilaꞌaká neká ke. 6 Ilaꞌaniña ipéchuwa ujwí Tupana liyá; itáraꞌo kaphí Ripurákaꞌalo chojé; ikeroꞌoniño kaja rewájena piyá. Iphákaꞌajiko najwaꞌaté kewá Tupana iꞌimajika ijwaꞌaté, unká kaja riyurílaje ichá”, ke Moisés kemaká najló.

7 Rejomi Moisés wáꞌari Josuejlo, riꞌijnakáloje rawaꞌajé penaje. Riphaka rawaꞌajé ee, Moisés kemari rijló, piyuke Israel lakénami jemaꞌakáloje riká penaje: 8 “Pilaꞌaniña pipéchuwa ujwí Tupana liyá. Pitáraꞌo kaja kaphí Ripurákaꞌalo chojé, piwáꞌajikale mariruna inaꞌukena riká teꞌerí, rimájikare nakú aꞌajútaya michúnajlo iꞌimajika ejo. Tupana iꞌijnajeri itukumá rejo, riká kaja iꞌimajeri pijwákeꞌewe. Unká riyurílaje pichá, unká kaja raꞌapáñaalaje piká. Ñaké iꞌimakale, pikeroꞌoniño na piyá. Pilaꞌá kaphí pipéchuwa”, ke Moisés kemaká Josuejlo ajopana jimaje.

14 Rejomi Tupana kemari Moisesjlo: “Chuwa kaja yewíchaja pitakaꞌaká, ñakele piwaꞌa Josué maná. Rejomi piꞌijnajé rijwaꞌaté nuñakaré, kamejeri ímami nakiyá laꞌakanami ejo. Re numaje rijló, rilaꞌakáloje nakaje numájikare nakú rijló”.

E neꞌejná Tupana ñakaré ejo. 15 Rejé Tupana witúkaꞌari nachaje juni juwákaꞌala eꞌiyowá; rejé rakúwaꞌo rinumaná chaje. 16 Rejéchami Tupana kemaká Moisesjlo: “Chuwa yewíchaja pitakaꞌaká, rejomi mariruna inaꞌukena iphájeño ajopana teꞌeré chiꞌinárikana jaꞌapí. Ñaké kaja napechu iꞌimajika ajopana pechu ke kaja najwaꞌaté rinaku. Kaja wapuraꞌó nakaje nakú pajwaꞌatéchaka iꞌimaká, riyuríkoloje ñaké pajlokaka, pijwaꞌatéjena jemaꞌakáloje Nupurákaꞌalo jaꞌapiyá penaje. Eꞌiyonaja nayureje naliyá Nupurákaꞌalo. 17 Ripachá nuyúchaꞌajo nachá. Reyá aꞌajná ñoꞌojó unká nuꞌumalaje najwaꞌaté; unká wani noꞌolaje neká nunakojó, pachá namaje chapú kaje yajwé. Rejéchami naweꞌepíjika nájeka namájika chapú kaje yajwé, unkale nuꞌumalaje re najwaꞌaté. 18 Riwakajé chaje wani nuyuríjika nachá. Unká wani noꞌolaje nañathé, nalaꞌajíkale puꞌuwaré, napechu iꞌimakale ajopana nakú: ‘Wachiꞌinárikana japi neká’, ke”, ke Tupana kemaká Moisesjlo.