Meke Tupana laꞌajika nanaku palá, napajnoꞌotájika ee napéchuwa Tupana ejo yukuna marí
30
Moisés kemari piño najló: “Puꞌuwaká nakaje, palani kaꞌajná, chapú kaje kaꞌajná, numakare nakú ijló iꞌimajika ee ijló, iweꞌepeje marí numakare nakú ijló. 2 Iweꞌepeje numaká ijló palá iꞌimakana nakú, eyá chapú iꞌimakana kaja nakú, iꞌiwapakáloje ijluwa mékeka iwátaka iꞌimakana penaje. Apala ajopana teꞌeré eyájena cháꞌatajeño iká, rejomi nawáꞌaje iká nateꞌeré ejo. Riwakajé kaꞌajná riphaje ipechu nakú mékeka numakare ijló iꞌimaká. 3 Chuwa iká, iyani waꞌaté, pajnoꞌotájika ee ipéchuwa Tupana ejo puꞌuwaré ilaꞌakare liyá, jemaꞌakáloje wani Ripurákaꞌalo, noꞌopátakare ijló jaꞌapiyá, e Tupana weꞌepéjeri imuꞌují, raú ripaꞌataje iká iteꞌeré ejo. 4 Apala inakiyana kaꞌajná iꞌimajé yaꞌajnawa wani iteꞌeré liyá, nayuríjikale Tupana purákaꞌalo jaꞌapiyá jemaꞌakana pachá. Napajnoꞌotájika ee napéchuwa Tupana ejo, ripaꞌataje neká yaꞌataya iteꞌeré ejo, 5 iꞌimakáloje piño ichiꞌiná michuna teꞌeré nakú penaje. Rejomi rilaꞌajé iká palá wani, kajrú iyani iꞌimakáloje, ichiꞌiná michuna yaní iꞌimaká chaje íkiꞌika, iyani iꞌimakáloje penaje riwakajé. 6 Rilaꞌajé ipechu palá, iwátakaloje riká ñakeja wani penaje. Raú rilaꞌajé ipechu kaphí. Ñaké kaja rilaꞌajika iyani akijñojo iꞌimajíkaño pechu palá, nawátakaloje raú raꞌapiyá jemaꞌakana, raú neꞌemakáloje riwátakana nakuja, ripalamane neꞌemakáloje matajnako rijwaꞌaté penaje.7 “Eyá chapú kaje yajwé numakare nakú ijló, iꞌimajé ñaké chapú inaku péchuruna, chapú ilaꞌajéñojlo. 8 Eyá iká pajnoꞌojeño Tupana ejo, jemaꞌakáloje raꞌapiyá, ilaꞌakáloje piyukeja Ripurákaꞌalo, nuꞌumakare ijló chuwá. 9 Rejéchami Tupana aꞌajika iñathé nakaje ilaꞌajíkare aú, ráchoꞌokoloje ijló palá penaje. Raꞌajé kaja iñathé, iyani iꞌimakáloje ñóꞌope penaje; ñaké kaja ipirana yaní iꞌimakáloje kajrú. Palá kaja nakaje iꞌimajika imena eꞌiyowá. Palá Tupana laꞌajika iká, palá ripechu iꞌimajíkale inaku. Palá rilaꞌajika aꞌajútaya michuna nakú iꞌimajika, ripechu iꞌimajíkale palá nanaku. 10 Ilé ke riꞌimajika ijló, jemaꞌajika ee piyukeja Ripurákaꞌalo, lanaꞌakéjami iꞌimakare marí papera kaje chu jaꞌapiyá. Iꞌirajiko ee Tupana nakojé, rilaꞌajé inaku palá”, ke Moisés kemaká najló.
11 Rimá piño najló: “Marí purákaꞌaloji, numakare nakú ijló, unká puwichani wani kalé ijló riká, iweꞌepíkare laꞌakana lolópaꞌalaje riká. 12 Unká jeꞌechú chu kalé riká, iná kemakáloje rinaku: ‘¿Na kaꞌajná iꞌijrárijla jeꞌechú chojé wajló riwáꞌaje, wemaꞌakáloje riyukuna, walaꞌakáloje rimaká ke penaje?’ 13 Unká kaja juni jalomi paꞌanojo pitá kalé riká imakáloje penaje: ‘¿Na kaꞌajná iꞌijnárijla wajló rikuwáꞌataje majó, wemaꞌakáloje riyukuna, walaꞌakáloje rimaká ke penaje?’ 14 Unká yaꞌajná kalé riká, maare awaꞌá riká. Re riká ipechu nakú, ipuraꞌakóloje rinaku penaje. Ilé ke ijló riká, jemaꞌakáloje raꞌapiyá penaje.
15 “Chuwajá numá ijló, imakáloje naka iwata laꞌakana: Palá laꞌakaná kaꞌajná iwata, iꞌimakáloje palá marí ejaꞌawá chu penaje; apala iwata kaꞌajná puꞌuwaré laꞌakaná, kiñaja ikapichákoloje penaje. 16 Ñakele jemaꞌá chuwajá numíchaje nakú ijló jaꞌapiyá. Iwata íkiꞌija iwakáraꞌajeri Tupana; ilaꞌá piyukeja wani Ripurákaꞌalo kemaká ke. Ilé ke ilaꞌajika ee, iꞌimajé jupi maare ejaꞌawá chu, kajrú kaja iyani iꞌimajika. Raú Tupana laꞌajé inaku palá wani, iꞌimajika ee teꞌerí riꞌiwapakare ijló nakú wakajé.
17 “Eyá unkájika ee jemaꞌá marí purákaꞌaloji jaꞌapiyá, eyá ajopana kaꞌajná kaꞌátajika ee eꞌiyajé, iphákaloje najwaꞌaté nachiꞌinárikana jaꞌapí penaje. 18 Ilé ke ipechu iꞌimajika ee, unká iꞌimalaje jupi, kiñaja ikapichájiko ñaké ilaꞌajika pachá. Ñakele unká iꞌimalaje jupi teꞌerí, ijñaꞌajíkare naliyá ijluwa nakú. Ikuwáꞌajika juni Jordán paꞌanojo pitá wakajé, ijñaꞌajé nateꞌeré ijluwa penaje. Unká pachá jemaꞌalaje Tupana jaꞌapiyá, unká iꞌimalaje jupi rinaku. 19 Jeꞌechú chu iꞌimakaño, eyá ejaꞌawá chu iꞌimakaño waꞌató, weꞌepiño nakaje numíchaje nakú ijló chuwajá. Kaja jemiꞌichá mékeka numíchaka ijló, iweꞌepíkaloje mékeka iwátaka laꞌakana. Iwata kaꞌajná jupi iꞌimakana; iwata kaꞌajná kiñaja kapichákajo. Iwata kaꞌajná Tupana laꞌaká inaku palá; iwata kaꞌajná rilaꞌaká iká chapú. Iꞌijnatá ipéchuwa palá iꞌimakana nakú, ikapichako piyá kiñaja, ñaké kaja iyani iꞌimajíkarena iꞌimakáloje palá penaje. 20 Iwata íkiꞌija Tupana, iná chiꞌinárikana riꞌimakale, iná pechu iꞌimakare chojé kaphí. Jemaꞌá raꞌapiyá; iyuríniña raꞌapiyá jemaꞌakana. Raꞌapiyá jemaꞌakana palamane iꞌimajé palá. Iyani, ilakénami iꞌimajíkarena waꞌató, iꞌimajeño júpija teꞌerí, Tupana kemájikare nakú aꞌajútaya michúnajlo iꞌimajika nakú. Rimaké rinaku Abraham michú, Isaac michú, Jacob michú, kélejlo iꞌimajika”, ke Moisés kemaká piyukeja Israel lakénamijlo iꞌimaká.