3 “Palá iꞌimajika pajimila ewá, ñaké kaja iꞌimajika rawaꞌawa.

4 “Kajrú iyani iꞌimajika; ñaké kaja ipirana yaní iꞌimajika kajrú; ñaké kaja imena iꞌimajika kajrú.

5 “Palá nakaje icha iꞌimajika ijló, ilaꞌakáloje raú aꞌajnewá penaje.

6 “Piyukeja nakaje ilaꞌajíkare, jáchoꞌojiko palá ijló, jemaꞌajika ee palá Tupana jaꞌapiyá.

7 “Ipinana kaꞌajná iphájeño inaku manaꞌí chiyó, paꞌapejéchaka ke, ijwaꞌaté nókajo. Rejéchami Tupana aꞌajika iñathé nacháꞌatakana aú, neñaakóloje awaꞌayá makajmala.

8 “Tupana aꞌajé kaja iñathé ijápakaꞌala laꞌakana aú, ñóꞌope aꞌajnejí iꞌimakáloje ijló. Rilaꞌajé kaja inaku palá, keyajúparuna iꞌimakáloje riká teꞌerí raꞌajíkare ijló nakú penaje.

9 “Ilaꞌajika ee piyukeja nakaje Tupana wátaka ke, iꞌimajé rijwaꞌatéjena. Rileꞌejena inaꞌukena iꞌimajika. Rimaká inaku iꞌimaká, ke rilaꞌajika inaku palá. 10 Rejéchami piyukeja inaꞌukena, ejaꞌawá chuwá iꞌimajíkaño, weꞌepíjika kewaka Tupana jaꞌapí iphájeñoka iká piyuke. Ilé ke namájika iká aú, nakeroꞌojó ipiyá piyukeja. 11 Palá ripechu iꞌimakale inaku, raꞌajé iñathé, iyani iꞌimakáloje kajrú penaje. Kajrú kaja ipirana iꞌimajika. Ñaké kaja nakaje icha iꞌimajika ijló kajrú, teꞌerí Tupana aꞌajíkare ijló nakú. 12 Riwakáraꞌaje juni jaꞌakó, rejátakaloje teꞌerí ijló, ipaijí tawáꞌakoloje ketajmúlaꞌapa nojé raú. Riwakajé kajrú nakaje iꞌimajika ijló, iyaꞌatákaloje kajrú liñeru ajopana, ajopana ke, teꞌeré eyájenajlo penaje. Eyá iká, unká kemalaje ajopánajlo, nayaꞌatákaloje ijló nakaje penaje. 13 Inaku Tupana laꞌajé palá, iꞌimakáloje ajopana chaje raú; unká ajopana jaꞌapejé kalé iꞌimajika. Ilé ke nakaje iꞌimajika ijló, jemaꞌajika ee Tupana purákaꞌalo, noꞌopátiyaje ijló chuwajá, jaꞌapiyá. Rimaká rinaku ke ilaꞌajika nakaje. 14 Ñakele Tupana jaꞌapiyaja kalé jemaꞌajé; raꞌapija kalé kaja iphaje. Unká iphálaje ajopana waꞌaté, nachiꞌinárikana ke iꞌimakare najló jaꞌapí.

15 “Eyá unkájika ee jemaꞌá Tupana purákaꞌalo, noꞌopátiyaje ijló chuwajá jaꞌapiyá, e amaje chapú kaje yajwé, unkale ilaꞌalá Ripurákaꞌalo kemaká ke. Pachá nakaje iꞌimajé ijló marí ke:

16 “Pajimila ewá kaꞌajná, pajimila awaꞌawa kaꞌajná iꞌimajika wakajé, unká mérowa nakaje iꞌimalaje palá ijló.

17 “Unká kaja nakaje icha iꞌimalaje palá ijló, ilaꞌakáloje aꞌajnewá raú penaje.

18 “Wejápaja kaja iyani iꞌimajika; wejápaja kaja nakaje icha iꞌimajika ijló; unká kaja ipirana iꞌimalaje kajrú. 19 Nakaje ilaꞌajíkare, unká jáchoꞌolajo palá ijló.

20 “Ilaꞌajika wakajé puꞌuwaré, Tupana wajaje iká, raú amaje kajrú chapú kaje yajwé. Kechíraꞌakeja ipechu iꞌimajika rejéchami, mapeja iwó kaꞌajiko, raú unká meke laꞌajé ilaꞌalaje nakaje palá. Ilé kaje jimaje itajnajo, iyuríkale iliyó Tupana purákaꞌalo, puꞌuwaré laꞌakaná lanakiya. 21 Tupana wakáraꞌaje támikaje kaje noka iká, itajnákoloje rinaku penaje. Raú unká iꞌimalaje teꞌerí Tupana aꞌajíkare ijló nakú.

23 “Unká kaja Tupana wakáraꞌalaje juni jaꞌakó ijló; unká kaja riyurílaje nakaje icha arúkaꞌaka ijló palá. 24 Unká Tupana wakáraꞌalaje ijló juni. Juni apumí chojé riwakáraꞌaje ijló muꞌupé jaꞌakó, keꞌepé waꞌaté, aꞌajná itajnájiko rinaku ejená. 25 Chapú inaku péchuruna cháꞌatajeño kaja iká nókakajo aú. Palá iphájika nanaku paꞌapejéchaka ke najwaꞌaté nókajo, eꞌiyonaja nacháꞌataje iká, raú iñaajó reyá makajmala naliyá. Ilé ke ajopana teꞌeré eyájena amájika aú nalaꞌaká iká chapú wani, nakeroꞌojó kajrú wani. 26 Nenótajika iká wakajé, kajrú wayuna, eyá kamejérina kajena, iphájika itami ajñátaje; unká na jaꞌapálaje nanaku itami nakiyá.

27 “Tupana wakáraꞌaje amaka chapú kaje yajwé, raú kajrú pachákaꞌaloji nótajika iká. Kajrú aphú iꞌimajika inapona nakuwá. Riwajaka Egipto eyájena iꞌimaká, ke kaja riwajájika iká. Unká meke laꞌajé napujánaꞌalaje iká itami kaje liyá. 28 Jewíñamina pechu ke ipechu iꞌimajika. Unká mejluruna weꞌepila palá mérowa iñeꞌepú, ñaké kaja iꞌimajika. Kechíraꞌakeja ipechu iꞌimajika. 29 Mejluruna jaꞌapaka kalajeruni chuwá, ke kaja iꞌimajika nakaje laꞌakana nakú. Nakaje ilaꞌajíkare unká jáchoꞌolajo palá ijló. Ajopana laꞌajéñono iká chapú; nataꞌajé inane iliyá; unká na iꞌimalaje iñathé aꞌajeri penaje”, ke Moisés kemaká najló.