23
Nephaka riꞌiwátaje ee, Balaam kemari neꞌemakana Balacjlo:—Eko pimá pijwaꞌatéjenajlo, nalaꞌakáloje iyamá kuwáꞌata kele altares jipa nakiyana. Piwakáraꞌa kaja nawáꞌaka majó iyamá kuwáꞌata kele jémana pirakana achiñana waja, ñaké kaja kawayana pirakana.
2 E neꞌejnatá napirana nakiyana rejo. E Balaam, Balac waꞌaté, noño neká, nakáraꞌatakaloje natami altares nakú Tupánajlo, apú altar nakojé, apú altar nakojé ke.
3 E Balaam kemari Balacjlo:
—Piyuró maare, nuká iꞌijnajeri aꞌajná ñoꞌojó, nomaꞌakáloje mékeka Tupana kemájika nojló nakaje nakú. Rejomi nuꞌumajé pijló riyukuna.
—Kaja nuwakáriꞌicha nalaꞌaká iyamá kuwáꞌata kele altares. Riká nakojé nukáraꞌatiya pirájina tami pijló, apú altar, apú altar nakojé ke.
5 E Tupana kemari rijló mékeka rimájika Balacjlo, rimá rijló:
—Chuwa pipaꞌó, piꞌimakáloje riyukuna Balacjlo. Numíchaka pijló rinaku ke pimájika rijló.
6 E Balaam paꞌaró rapumí chuwá riyukuna iꞌimajé Balacjlo. Re joꞌó kaja riꞌimá re, kajrú raꞌapiyatéjena waꞌaté. Riphaka nanaku ejéchami riꞌimaká najló Tupana purákaꞌalo yukuna. Rimá:
7 “Yaꞌajnaya ipuré, kamú jeñoꞌoká ejo pumitá iꞌimakare, Aram teꞌeré eyá
Balac, Moab eyájena iꞌimakana, wáꞌari numaná, nuꞌujnakáloje richaje,
nuyerúkaꞌakaloje rijló Israel lakénami chaje, nalaꞌakáloje neká chapú penaje.
8 Unká meke laꞌajé nuyerúkaꞌala, unká Tupana yerúkaꞌalarena chaje.
¿Meke laꞌajé chi numajla nanaku, ajopana laꞌakáloje neká chapú penaje,
ñaké unká Tupana wátala nalaꞌakana ñaké?
9 Palá nomaka neká marí yenuri jiꞌiwátaya.
Apoꞌojó neká, maárowajena inaꞌukena iꞌimakárena liyá.
Unká ajopana inaꞌukena ke kalé neká.
10 Íkiꞌiruna wani neká, unká meke laꞌajé iná lapaꞌatálajla neká.
Tupana wátaka ke laꞌajeñó neká.
Nutajnájiko wakajé, nuwata neká ke iꞌimakana”.
11 Ilé ke Balaam kemaká aú, Balac kemari rijló:
—¿Meke chi kele pipuraꞌó nakú? Nuwaꞌa pimaná iꞌimaká, piꞌijnakáloje majó, piyerúkaꞌakaloje nojló chapú wanaku péchuruna chaje. Eꞌiyonaja unká piyerúkaꞌala nachaje, palaja pipuraꞌakó nanaku, neꞌemakáloje palá penaje.
12 Raú Balaam kemari rijló:
—Tupana kemari nojló iꞌimaká, numakáloje pijló nakaje rimakare nojló nakuja kalé, ñakele unká meke laꞌajé nulaꞌalajla nakaje nupechu keja.
13 Eꞌiyonaja Balac kemari piño rijló:
—Piꞌijná nujwaꞌaté majó, chuwa weꞌejnajika piño namaje apú eyá, reyá wamaje napajré nakiyana toꞌokó. Unká wamálaje piyukeja napajré reyá, ñakele reyá nuwata piyerúkaꞌaka nachaje nojló.
14 E riwaꞌa Balaam ají ke yenuri Pisgá jiꞌiwátaje. Re nalaꞌá iyamá kuwáꞌata kele altares, nakáraꞌatakaloje pirájina tami rinaku Tupánajlo penaje. 15 Nañapátaka rilaꞌakana ejomi, Balaam kemari Balacjlo:
—Maare piwata nuká, nuꞌujichaka Tupana waꞌaté puraꞌajó.
16 Re Tupana kemari piño rijló nakaje nakú, riꞌimakáloje riyukuna Balacjlo penaje. Rejomi rimá rijló, ripaꞌakóloje riyukuna iꞌimajé rijló. 17 Rejéchami ripaꞌakó rapumí chuwá riyukuna iꞌimajé Balacjlo. Re riꞌimá riwátakana nakú, kajrú raꞌapiyatéjena waꞌaté. Riphaka rinaku ee, Balac kemari rijló:
—¿Meke Tupana kemíchaka pijló?
18 Raú Balaam iꞌimari piño najló Tupana purákaꞌalo yukuna, rimá:
“Balac, Sipor iꞌirí piká, pemaꞌá palá numájikare nakú pijló meꞌetení.
19 Unká Tupana apiyákala ripechu, inaꞌuké apiyákaka napechu ke kaja.
Unká kaja ripajlala.
Rimakachu nakaje nakú:
‘Marí ke riꞌimajika’, ke, ñaké rilaꞌaká riká.
Rimakachu inaꞌuké nakú:
‘Marí ke nulaꞌajika neká palá’, ke,
rimaká nanaku chuwá rilaꞌá neká palá.
20 Tupana kemájika ee nojló inaꞌuké nakiyana nakú:
‘Pipuraꞌó nanaku palá’, ke, nupuraꞌajó nanaku palá.
Ñakele unká meke laꞌajé numalajla nakaje nakú apoꞌojó, rimaká rinaku liyá.
21 Unká na kemalajla Israel lakénami nakú:
‘Pajlákachina neká; puꞌuwaré laꞌajeñó kaja neká’, ke,
unká ñaké laꞌajeñó kalé neꞌemakale.
Tupana, napechu iꞌimakare chojé kaphí, najwaꞌaté ñakeja.
Nemá rinaku: ‘Wawakáraꞌajeri wani riká’, ke.
22 Tupana jáchoꞌotari neꞌemaká Egipto eyá iꞌimaká.
Riká jaꞌapija kalé nephá, ripalamane neꞌemakale.
Raꞌá kaja nañathé ajopana napinana cháꞌatakana aú.
23 Unká na kalé yerúkaꞌarijla Israel lakénami chaje.
Unká kaja meke laꞌajé ajopana lejñálajla neká,
nacháꞌatakaloje neká nókakajo aú penaje.
Chuwa palani iná kemaká Israel lakénami nakú:
‘Meke palá wani Tupana laꞌaká neká’.
24 Yawi ejaꞌawá eꞌiyowaje tajátaka rijwánaꞌapa,
ke kaja natajátajika chapú nanaku péchuruna”,
ke rimaká najló.
25 Raú Balac kemari Balaamjlo:
—Kaja unká méñoꞌojo piyerúkaꞌala nachaje nojló. Ñakele pipuraꞌaniño nanaku ta palá.
26 Raú Balaam kemari rijló:
—Kaja numá pijló iꞌimaká: Tupana nuwakáraꞌajeri, ñakele riwakáraꞌaka ke nulaꞌaká nakaje.
27 Eꞌiyonaja Balac kemari piño rijló:
—Majó piꞌijná piño nujwaꞌaté. Chuwa nuwáꞌajika piño piká apú ipuré jiꞌiwátaje. Apala rejo Tupana kemaje pijló, piyerúkaꞌakaloje nachaje penaje.