2 Balac iꞌimari Moab teꞌeré eyájena wakáraꞌajeri. Sipor iꞌirí riꞌimaká. Riká jemaꞌarí mékeka Israel lakénami cháꞌataka amorréona nókakajo aú yukuna. 3 Raú rikeroꞌó napiyá, rijwaꞌatéjena waꞌaté, íkiꞌiruna wani neꞌemakale. 4 Ilé kaje aú Moab waꞌatéjena kemaño pheñawaꞌaní Madián eyájenajlo:

—Waweꞌepí piyukeja Israel lakénami tajátajika weká marí wateꞌeré nakiyá. Jema pirakana tajátaka jimichi, rawaꞌawa iꞌimakare desierto chuwá, keja kaja natajátajika weká.

5 Ñakele riwakáraꞌa raꞌapiyatéjena iꞌijnaká Balaam wáꞌaje. Yaꞌajná riꞌimaké Amav teꞌeré nakú, pajimila Petor e, juni Éufrates awaꞌá. Tupana purákaꞌalo jaꞌapátajeri riꞌimaká. Riká ejo Balac wakáraꞌa rijwaꞌatéjena iꞌijnaká. Neꞌejnaká rejo yámona, rimá najló mékeka nemájika rijló nakú:

6 —Eko imá rijló riꞌijnare majó nuchaje kiñaja, riyerúkaꞌakaloje wajló Israel lakénami chaje, kaja nuweꞌepí nacháꞌatajika weká. Ñakele nuwata riyerúkaꞌaka nachaje, wacháꞌatakaloje neká nókakajo aú penaje. Nuweꞌepí riyerúkaꞌakachu ajopana chaje, ñaké riꞌimaká najló. Eyá rimakachu ajopana nakú, neꞌemakáloje palá penaje, kaja keja neꞌemaká raú.

7 Moab eyájena, eyá Madián eyájena, kele neꞌemaká. Rikaja neꞌejnaká ají ke Balaam ejo. Neꞌejnaká rejo yámona, najñaꞌá najwaꞌató liñeru, naꞌakáloje rijló riká, Israel lakénami chaje yerúkaꞌakana wemí. E kaja nephá rinaku, neꞌemá rijló neꞌemakana purákaꞌalo yukuna. 8 E rimá najló:

—Ñaké riká, maare ikamátajo nujwaꞌaté chuwajá lapí, eyá muní lapiyami numaje ijló mékeka Tupana kemájika nojló nanaku.

Re nayuró rijwaꞌaté riká lapí ketana.

9 E riwakajé lapí Tupana yaꞌató Balaamjlo, rimá rijló:

—¿Mékajena chi mariruna inaꞌukena pijwaꞌaté maare?

10 —Balac, Moab teꞌeré eyájena iꞌimakana, wakáraꞌari neká majó nuchaje, nemakáloje nojló marí ke: 11 Kajrú inaꞌukena jáchoꞌoko Egipto teꞌeré eyá iꞌimaká, neká penájemina iphaño riteꞌeré nakojé. Kajrú wani neká piyukeja riteꞌeré nakuwá chuwa. Ñakele riwata nuꞌujnaká richaje, nuyerúkaꞌakaloje rijló nachá, richáꞌatakaloje neká nókakajo aú, rikaꞌakáloje neká piyukeja riteꞌeré nakiyá penaje —ke Balaam kemaká Tupánajlo.

12 Raú rimá Balaamjlo:

—Unká piꞌijnalaje najwaꞌaté; unká kaja piyerúkaꞌalaje nachaje, nupalamane neꞌemakale.

13 E muní ke lapiyami Balaam kemari Balac wakáraꞌakarenajlo:

—Ipaꞌó piño chuwa apumí chuwá iteꞌeré ejo. Unká Tupana wátala nuꞌujnaká ijwaꞌaté, ñakele unká meke laꞌajé nuꞌujnalá ijwaꞌaté.

14 Raú Balac jaꞌapiyatéjena paꞌañó nateꞌeré ejo. Nephaka rinaku ee, nemá rijló:

—Unká Balaam wátala majó wajwaꞌaté iꞌijnakana.

15 Eꞌiyonaja unká neꞌemakana yurilo manaꞌija raú. Riwakáraꞌa piño kajrú raꞌapiyatéjena rejo. Paineko iꞌimakaño rejo, chaje wani íkiꞌika riwakáraꞌaka piño rejo. 16 Neká iphaño piño Balaam nakú, nemá rijló:

17 —Piꞌijnajika ee wajwaꞌaté rejo, raꞌajé pijló kajrú nakaje, piwátajikare kaje, ke rimaká pinaku. Ñakele piꞌijná chuwa wajwaꞌaté rejo, piyerúkaꞌachi nachaje wajló.

18 Raú rimá najló:

19 —Iyuró maare nujwaꞌaté marí lapí ketana, nomáijla mékeka Tupana kemájika piño nojló nanaku.

20 Riká lapí Tupana kemari piño Balaamjlo:

—Nuweꞌepí mariruna inaꞌukena iphíchaka pichaya majó, ñakele piꞌijná najwaꞌaté. Numájika pijló nakaje nakú keja kalé pilaꞌajika.

21 E muní ke lapiyami Balaam lamáꞌatari rikawarute. Riyáꞌata ñákaꞌajori kaje riwajlé chojé, riꞌijnakáloje rinaku najwaꞌaté penaje. ^a 22 Iyamá rijwaꞌaté jápajeño nakiyana iꞌijnaño kaja rijwaꞌaté, eꞌiyonaja Tupana yúchaꞌaro Baalam cha, riꞌijnakale najwaꞌaté. Ñakele riwakáraꞌa rijwaꞌateje, jeꞌechú chiyaje, itaká rapu. Manaꞌija raꞌapaka rikawarute nakú iñeꞌepú chuwá. 23 E manaꞌí chiyó rikawarute amari Tupana waꞌatéjeri, jeꞌechú chiyaje, táraꞌako peꞌiyó iñeꞌepú chu, joꞌojoji rikapi ke. Rikawarúteja kalé amari riká, raú riwaꞌó iñeꞌepú turenaje. Ilé ke riwaꞌakó aú iñeꞌepú turenaje, Balaam ñaꞌatari riká kaphí, ripaꞌakóloje piño iñeꞌepú chojé, naꞌapákaloje richuwá penaje. 24 Rejéchami Tupana waꞌatéjeri, jeꞌechú chiyaje, iꞌijnaká piño táraꞌajo natukumaje. Iyamá jipa jiwami chuwá iñeꞌepú jaꞌapaka ejé ritáraꞌo, riká jiwami chuwá naꞌapajla. 25 Rejéchami rikawarute amaka piño Tupana waꞌateje táraꞌako riká jipa jiwami chu, raú kawarú majraꞌaró kaphí jipa nakojé. Rimajraꞌakó rinakojé waꞌaté ke, rimajraꞌaká kaphí wani Balaam tajné jipa nakojé. Marí kaje aú riñaꞌatá piño rikawarute, raꞌapákaloje palá penaje. 26 Rejéchami Tupana waꞌateje jaꞌapaka piño natukumá, táraꞌaro piño iñeꞌepú ajñoꞌokó kaje chojé. Reyá kaja unká méñoꞌojo iná waꞌalojla richiyá, kamuꞌují wani rajñoꞌokole reyá. 27 Re riꞌimaká ee, kawarú amari piño Tupana waꞌateje táraꞌako iñeꞌepú ajñoꞌokó kaje chu. Ramaka aú riká, raꞌó teꞌerí eꞌiyajé. Ilé ke raꞌakó aú teꞌerí eꞌiyajé, Balaam yúchaꞌaro íkiꞌija wani richá, rejéchami riñaꞌataka riká rikutiware aú. 28 Ilé ke riñaꞌataka rikawarute ejéchami, Tupana aꞌarí kawarú ñathé, ripuraꞌakóloje riminá waꞌaté penaje, raú rimá rijló:

—¿Meke chi nulaꞌaká piká, piñaꞌatale nuká? Marí waꞌaté weji ke pecha piñaꞌataka nuká.

29 Raú Balaam kemari rijló:

—Pamákaja wani pilaꞌaká ta nuká. Irajú iꞌimakela nukapi, meꞌetení nonókajla piká ta raú.

30 Eꞌiyonaja rikawarute kemari piño rijló:

—Piweꞌepí jupi cha paꞌapaka nunaku, eꞌiyonaja unká nulaꞌalano piká marí ke.

—Kewaka pimaká.

31 Rejéchami Tupana aꞌaká Balaam ñathé, ramákaloje rijwaꞌateje, jeꞌechú chiyaje, táraꞌako iñeꞌepú chu. Raú ramá ritáraꞌako joꞌojoji rikapi ke iñeꞌepú chu, raú rijlámaꞌo teꞌerí eꞌiyajé. 32 E Tupana waꞌatéjeri kemari rijló:

33 —Pikawarute amícharino nuká, raú riwiꞌichono nunakojé iꞌimichaka. Unkákela riwaꞌaláchojla nunakojé, nonóchajla piká. Eyá pikawarute, unká nonólachajla.

34 Balaam kemari rijló:

—Puꞌuwaré wani nuliꞌichaka, nuꞌujichákale najwaꞌaté majó. Unká nuweꞌepílacha pikaka jitíyaka nopu. Unkájika ee piwata nuꞌujnaká najwaꞌaté rejo, pimá nojló, nupaꞌakóloje penaje.

35 Tupana waꞌatéjeri kemari rijló:

—Nuyureje piꞌijnaká najwaꞌaté, eꞌiyonaja numájika pijló keja kalé pimájika najló.

Raú riꞌijná najwaꞌaté, kaja ewaja riphá Moab teꞌeré ejo. 36 Neꞌemakana weꞌepika riphaka apú pajimila nakojé ee, ráchoꞌo riñakaré chiyá, riꞌijnakáloje rijimaje, riphákaꞌakoloje rijwaꞌaté rejo. Riphaka rinaku ee, 37 rimá rijló:

—Mawó nuwáꞌaka pimaná. ¿Naje kaꞌajná unká piwátala majó iꞌijnakana apú wakajé iꞌimaká? ¿Meke kaꞌajná pipechu iꞌimaká nunaku: “Wejápaja kaꞌajná raꞌajika nojló riwemí”, ke?

38 E Balaam kemari rijló:

—Kaja nuphicha majó pamaje, eꞌiyonaja unká méñoꞌojo nupuraꞌalajo nupechu keja. Nakaje Tupana kemájikare nakú, rikaja kalé numaje nakú pijló.

39 Rejomi naꞌapá piño apú pukunaji ejo. 40 Nephaka rejo ejomi, Balac wakáraꞌari nenoka napirana nakiyana, naꞌakáloje neꞌimi Balaam, rijwaꞌatéjena, kélejlo penaje.

41 Muní ke Balac iꞌijnaká Balaam chaje, riwáꞌakaloje riká ipuré jiꞌiwátaje, namákaloje reyá Israel lakénami pajré toꞌokó rewá penaje.