ÉXODO
Israel michú lakénami iꞌimaká Egipto teꞌeré nakú yukuna marí
1
6 Kaja iphaño piyuke Israel michú waꞌaté pajñakani Egipto teꞌeré ejo iꞌimaká takaꞌataño. Setenta neꞌemaká. José takaꞌarí kaja iꞌimaká, piyuke rejena michuna waꞌaté. 7 Nalakénamija kalé yuriño re joꞌó kaja rewá. Júpija wani neꞌemaká re, ewá richaje, richaje ke, nayani mothoꞌojika; neká waja iꞌimakeri piyuke Egipto teꞌeré nakuwá. 8 Riwakajé apú iꞌimari Egipto eyájena iꞌimakana, unká jemaꞌalá José yukuna riꞌimaká. Riká kemari rijwaꞌatéjenajlo:9 —Jemaꞌá, kaja íkiꞌi cha wani Israel lakénami chuwa, kaja nacháꞌata weká maárowa. 10 Ñakele weꞌejnataje wapéchuwa nanaku chuwa, wamákaloje mékeka walaꞌaká, nañathé aꞌakó piyá richaje re joꞌó kaja. Apala wapinana iphájika wajwaꞌaté nókajo wakajé, kaꞌajná naꞌajé nañathé nókakajo aú, nacháꞌatakaloje weká penaje, rejomi náchoꞌoñaakaloje weká wateꞌeré nakiyá —ke neꞌemakana kemaká najló.
11 Raú raꞌá rijwaꞌatéjena nakiyana, namákaloje Israel lakénami penaje. Kaphí wani nawakáraꞌajika najápaka. Mapeja najápajika najló. Iyamá pajimila nalaꞌá najló iꞌimaká: pajluwaja ií iꞌimari Pitón, eyá apú ií iꞌimari Ramsés. Rejé neꞌemakana wakáraꞌake nalamáꞌataka aꞌajnejí rewájenajlo. 12 Chapú nalaꞌajíkano neká, nawakáraꞌajikale najápaka kaphí wani, eꞌiyonaja richaje, richaje ke, nayani iꞌimajíkano. Kajrú wani nañathé aꞌajíkono, raú Egipto eyájena keroꞌokeño napiyá.
13 Kaphí wani nawakáraꞌajika najápaka najwaꞌaté mapeja. 14 Nawakáraꞌake nalaꞌaká kajrú teꞌerí takaꞌátakanami, ñaké kaja nawakáraꞌajika najápaka namena eꞌiyá. Kajrú wani namájika jápakaje yajwé; chapú kaje yajwé amákana nakuja neꞌemaké. Kajrú kaja nañaꞌatájika neká, unkachu nalaꞌaké najápakaꞌala kiñaja. 15 E neꞌemakana puraꞌaró Sifra, kecha Puá, kele waꞌaté. Neká aꞌakéñono inaana Israel lakénami ñathé nawáꞌajika nayani kewá. Rimá najló:
16 —Marí ke weꞌemakana wakáraꞌaka ilaꞌaká chuwa: Pajluwájaru Israel lakénami nakiyana wáꞌajika ruꞌurí wakajé, amaje palá naka kerákoꞌopa iꞌimajika: achiñá, inanaru kaꞌajná. Inanaru ruꞌumajika ee, iyureje ruꞌumaká, eyá achiñá riꞌimajika ee, inoje riká.
17 Eꞌiyonaja keleruna, aꞌakeño ajopana ñathé nayani wáꞌakana aú, iphákeño Tupana jaꞌapí, ñakele unká nalaꞌaké neꞌemakana wakáraꞌajika neká ke. Nayurike kerákoꞌopana achiñana iꞌimajika, 18 raú neꞌemakana wáꞌari namaná. Nephaka rinaku ee, rimá najló:
—¿Naje chi unká inola ta kerákoꞌopana achiñana, nuwakáraꞌaka ilaꞌaká ke?
19 Nemá rijló:
—Unká inaana Egipto eyájena ke kalé hebreo jáꞌalona. Peyajwéruna neká, wapiyá nawáꞌano nayani, unká chiyó wephá nanaku.
20-21 Ilé ke nalaꞌajíkale, richaje, richaje ke, nañathé aꞌajeño nayani wáꞌakana aú yaní iꞌimajika. Nephájikale Tupana jaꞌapí, rilaꞌaké neká palá. Raꞌá nañathé, kajrú nayani iꞌimakáloje penaje. 22 Rejomi neꞌemakana wakáraꞌari rijwaꞌatéjena laꞌaká marí:
—Ikupá piyukeja hebréona yaní kerákoꞌopana achiñana junápeje, eyá kerákoꞌopana inaana iꞌimajíkaño, unká ikupálaje.