GÉNESIS
Tupana keñoꞌótaka ejaꞌawá, jeꞌechú waꞌaté, yukuna marí
1
Marí ke piyukeja nakaje keñoꞌokó iꞌimaká: Tupana keñoꞌótari jeꞌechú, ejaꞌawá waꞌaté iꞌimaká. 2 Unká ejaꞌawá jená iꞌimaké riwakajé, raú mapeja nakaje iꞌimajika. Juni jalomi, juniphuni wánija kalé iꞌimakeri kalajeruni chu riwakajé. Rijimó Tupana Pechu jaꞌapákeri. 3 Rejéchami Tupana wakáraꞌaka mejámaꞌatani iꞌimaká, raú rimaká ke rikeñoꞌótako. 4 Ramaka aú palani mejámaꞌatani iꞌimaká, ritamákaꞌata riká kalajeruni liyá. 5 Mejámaꞌatani nakú rimá “weꞌechú”, ke; eyá kalajeruni nakú rimá “lapí”, ke.6-8 Rejomi rimá jeꞌechú keñoꞌótakoloje penaje, juni tamákaꞌatakoloje paliyáaka, ijamani kaje yuríkoloje yenuwa jeꞌechú chuwá. Raú ñaké riꞌimaká. Ilé kaje keñoꞌótakana nakú iyamá kala jaꞌapá richá.
9 Rejomi Tupana wakáraꞌari juni tamákaꞌatakoloje teꞌerí liyá, teꞌerí yuríkoloje makajreni chuwá, rikámika ke riꞌimakáloje penaje. Raú ñaké riꞌimaká. 10 Makajreni nakú rimá “teꞌerí”, ke. Eyá juni, pajluwaja chu iꞌimakare nakú rimá “juni jalomi”, ke.
Ramaka aú palani riꞌimaká, 11 rimá teꞌerí nakú, aꞌawaná, paijí, piyuke nakaje teꞌerí eꞌiyayá iphákare, jeñoꞌokáloje reꞌiyayá penaje; richa, richa ijí, kele iꞌimakáloje penaje. Raú rimaká ke rikeñoꞌótako. 12 Piyuke nakaje, aꞌawaná, paijí kaje maká, keꞌiyapé nojé jeñoꞌoká reꞌiyayá. Riká arúkaꞌari; richa, eyá richa ijí, iꞌimari piño ñakeja kaja rapumí chojé. Ramá palánija piyukeja nakaje rikeñoꞌótakare iꞌimaká. 13 Ilé kaje keñoꞌótakana nakú weji ke kala jaꞌapá richá.
14-15 Rejomi Tupana wakáraꞌari kamareji patoꞌokó jeꞌechú chuwá, ripatákaloje teꞌerí nakojé, weꞌechú kaꞌalá iꞌimakáloje apoꞌojó lapí liyá, rikamaré aꞌakáloje weꞌechú, jarechí, yawijá, kele jená penaje. Riwakáraꞌaka riꞌimaká, keja riꞌimaká raú.
16-18 Rikeñoꞌota iyámaꞌala kamareji: pajlúwaꞌala rilaꞌá kajruni, ripatákaloje weꞌechú teꞌerí nakojé penaje. Eyá apaꞌalá rilaꞌá kamuꞌujini, ripatákaloje lapí teꞌerí nakojé penaje, ritamákaꞌatakaloje mejámaꞌatani kalajeruni liyá paliyáaka penaje. Rikeñoꞌota kaja iwijrina. Ramá palánija piyukeja nakaje rikeñoꞌótakare iꞌimaká. 19 Ilé kaje keñoꞌótakana nakú paꞌu ke kala jaꞌapá richá.
20 Rejomi Tupana wakáraꞌari keꞌiyapejena juni yajné keñoꞌótako, neꞌemakáloje juni jakuwá penaje. Rimá kaja keꞌiyapejena kupiraꞌaphana iꞌimakáloje, najákaloje teꞌerí chawa penaje. Rimaká nanaku keja nakeñoꞌótako raú. 21 Rikeñoꞌota kaja nakajena, kajruruna wani, juni jakú iꞌimakárena. Piyukeja juni jakiyájena rikeñoꞌota iꞌimaká; rikeñoꞌota kaja piyukeja kamejérina kayuphéruna. Ramá palánija piyukeja nakaje rikeñoꞌótakare iꞌimaká. 22 Raú rimá jíñana nakú, nayani iꞌimakáloje kajrú, neꞌemakáloje piyukeja juni jakuwá penaje. Eyá rimá kaja kupiraꞌaphana, kamejérina kayuphéruna, kele nakú, neꞌemakáloje piyuke ejaꞌawá chuwá penaje. 23 Ilé kajena keñoꞌótakana nakú pajluwa théꞌela ke kala jaꞌapá richá.
24 Rejomi Tupana wakáraꞌari keꞌiyapejena kamejérina iꞌimakáloje teꞌerí nakú penaje, raú ñaké neꞌemaká. Nanakiyana rikeñoꞌota, neꞌemakáloje ejaꞌawá eꞌiyowá penaje; nanakiyánaja kaja rikeñoꞌota, neꞌemakáloje inaꞌuké pirana penaje. Eyá chiraꞌañó neꞌekú aú teꞌerí jimawa rikeñoꞌota kaja. 25 Ramá palánija piyukeja nakaje rikeñoꞌótakare iꞌimaká.
26 Rejomi Tupana kemari kaja: “Chuwa wakeñoꞌótajika inaꞌuké, ripechu iꞌimakáloje wapechu nakojé ke penaje. Piyuke jíñana, kamejérina, pirájina, kupiraꞌaphana, kajena chaje ripechu iꞌimajika”, ke rimaká.
27 E kaja rikeñoꞌota inaꞌuké, ripechu nakojé ke.
Achiñá, inanaru waꞌaté, rikeñoꞌota neꞌemaká.
28 Rejomi ripuraꞌó nanaku palá, rimá najló:
“Eko iyani iꞌimá kajrú wani, íkiꞌiruna iꞌimakáloje piyukeja ejaꞌawá chuwá penaje.
Iká wakáraꞌajeño piyuke ejaꞌawá chuwá iꞌimakaño.
Iwakáraꞌaje jíñana, kupiraꞌaphana, kamejérina,
eyá neꞌekú aú chiraꞌakaño teꞌerí eꞌiyowá, kajena iwakáraꞌaje”.
29 Rejomi rimá piño najló: “Ijló noꞌó nakaje ili, paijí icha, aꞌawaná icha, kaje maká, ajñákaloje riká penaje. 30 Eyá kamejérina, kupiraꞌaphana, kélejlo noꞌó jimichi kaje maká, najñákaloje penaje”. Rimaká nakaje nakú keja riꞌimaká.
31 Palani piyukeja nakaje rikeñoꞌótakarena iꞌimaká Tupánajlo. Ilé kajena keñoꞌótakana nakú pajluwa kuwáꞌata ke kala jaꞌapá richá.