4-5 Kaja Tupana ñapata ejaꞌawá, jeꞌechú, kele keñoꞌótakana. Riwakajé unká joꞌó nakaje iphala teꞌerí eꞌiyá, unkale Tupana wakáraꞌala juni jaꞌakó teꞌerí eꞌiyajé. Unká kaja na iꞌimalá, rejátakaloje nakaje icha ijí teꞌerí eꞌiyowá penaje. 6 Re juni jeñoꞌoké teꞌerí eꞌiyayá, riká ejátakeri teꞌerí. Unká kaja na iꞌimalá teꞌerí nakú jápajeri penaje.

7 Paineko Tupana laꞌarí inaꞌuké jenami teꞌerí nakiyana. Kéchami raphoꞌoká ritakú chojé rikaéjane aú, raú raꞌá rijló kajmuchaji, rikeñoꞌokáloje iꞌimakaje raú. Rejéchami rikeñoꞌoká iꞌimakaje.

8 Rejomi Tupana keñoꞌorí nakaje icha ijí ejátakana teꞌerí eꞌiyá. Edén riká pukunaji ií iꞌimaká. Kamú jeñoꞌoká ejo pumitá nakojó rejata nakaje. Reꞌiyajé riyurí inaꞌuké rikeñoꞌótakare. 9 Tupana wakáraꞌa kaja aꞌawaná palá nojé, kechá nojé, iphaka reꞌiyowá ajñakaje penaje. Peꞌiyó nakaje ejátakejami eꞌiyá rejata pajluwana aꞌawaná; richa ajñakana aú iná iꞌimajla matajnako. Rawaꞌá re kaja apaná táraꞌo; riká icha ajñakana aú iná weꞌepí palá laꞌakaná, puꞌuwaré laꞌakaná waꞌató nakojé.

10 Riká paijí ejátakejami eꞌiyowá juni pomi iꞌimari. Riká juni ejátakeri paijí; riká tamákaꞌataro paꞌu kele juni pomi penaje. 11-14 Ritamákaꞌatakaro ií iꞌimari: Pisón, Guihón, Tigris, Éufrates, kele.

15 Reꞌiyajé Tupana yurí inaꞌuké rikeñoꞌótakare iꞌimaká, rejátakaloje nakaje reꞌiyá, eyá ramákaloje riká palá penaje. 16 Riyurika riꞌimaká reꞌiyajé wakajé, rimá rijló: “Eko pajñá piyukeja aꞌawanachá reꞌiyowá iꞌimakare, piwátaka ke. 17 Re kalé pajluwana reꞌiyá, riká íchaja kalé unká pajñálaje. Rajñakana aú iná weꞌepí palá laꞌakaná nakojé, eyá puꞌuwaré laꞌakaná waꞌató nakojé. Pajñájika ee richa nakiyana, pitakaꞌajé. Ñakele pajñániña riká”, ke rimaká rijló.

18 E Tupana pechu iꞌimari: “Nuweꞌepí unká paala riká inaꞌuké nukeñoꞌótakare iꞌimaká rikojo wani, raú nukeñoꞌótaje pajluwájaru inanaru rijwákeꞌewelo, riñathé aꞌajeyo penaje”.

19-20 Teꞌerí nakiyá waja Tupana keñoꞌótari piyuke kamejérina, ejaꞌawá eꞌiyowá iꞌimakaño, pirájina, kupiraꞌaphana, kaje maká iꞌimaká. Neká penájemina riwaꞌa inaꞌuké ejo, raꞌakáloje neí penaje. Raú raꞌá neí piyukeja, kaja keja neí iꞌimakáloje penaje. Eꞌiyonaja unká na iꞌimalá neꞌiyayá palani inaꞌuké wákeꞌewe penaje. 21 Raú Tupana keñoꞌótari inanaru rijló marí ke: Rikamata riká inaꞌuké matami wani. Richáyomi rijñaꞌá riparaꞌalá aphina nakiyá pajluwela, rejomi ripalaꞌatá riꞌí rapumí chuwá piño. 22 Riparaꞌalá aphina nakiyá rikeñoꞌota rijló inanaru, rijwákeꞌewelo penaje. Rapoka ejomi, Tupana aꞌá rijló ruká riyajálowa penaje. 23 Ramaka ruká aú rimá: “Nuꞌí, nophina, kele nakiyá laꞌakanami marirú, ñakele numaje runaku inanaru, ke, achiñá nakiyá Tupana keñoꞌótakareru ruꞌumakale”.

24 Ñaké iꞌimakale, achiñá anúkaꞌono richiꞌiná liyá, riwáꞌakako ejomi, riꞌimakáloje riyajalo waꞌaté penaje. Eyá neká iyamá iꞌimaño pajwaꞌatéchaka pajluwaja keja.

25 Kaja Tupana aꞌá rijló ruká riyajálowa penaje, raú neꞌemá pajwaꞌatéchaka. Maꞌarumakáruna neꞌemajika, eꞌiyonaja unká napáñaꞌalo paꞌapíchaka.