—¿Kewaka chi Tupana kemaká ijló piyukeja paijí icha nakú: “Ajñániña richa”, ke?

2 Rumá rijló:

—Aꞌa, rimá wajló wajñákaloje piyukeja paijí icha, wawátakare kaje. 3 Re kalé pajluwánaja, riká peꞌiyó táraꞌako nakuja kalé rimá wajló: “Unká ajñálaje richa, unká kaja ijápalaje rinaku”, ke rimaká. Wajñájika ee riká, watakaꞌajé.

4 Raú rimá rojló:

—Unká kewaka kalé kele rimá nakú ijló. Unká itakaꞌalaje. 5 Kaja Tupana weꞌepí kapechúruna wani iꞌimakajla ajñákela riká. Raú iweꞌepijla palá laꞌakaná nakojé, puꞌuwaré laꞌakaná nakojé waꞌaté. Ajñájika ee riká, ipechu iꞌimajé Tupana pechu ke kaja —ke Jiñá Chiꞌinárikana kemaká rojló.

6 Raú ruyakaꞌo riká aꞌawaná icha chaje, amayo palani wani riꞌimaká, raú makaꞌaní rojñaka riká. Rupechu iꞌimá kaja: “Nojñájika ee riká, kapechuru wani kaꞌajná nuꞌumajika reyá aꞌajná ñoꞌojó”.

7 E rutupaꞌá riká aꞌawaná icha, rejomi rojñá riká. Roꞌó kaja ruyajnajlo rinakiyana; rajñá kaja roꞌopiyá riká.

8 Rejéchami naweꞌepika maꞌarumakáruna neꞌemaká, raú nakujípaꞌa najluwa wíchuꞌupe naꞌarumakawa penaje. E laínchu kamú jaꞌakó ejéchami, nemaꞌaká Tupana mejé keñoꞌótako. Raú neñaó ripiyá, nataꞌakóloje kawichini eꞌiyajé. 9 E Tupana wáꞌari achiñajlo, rimá rijló:

—¿Mere chi piká?

10 Rimá rijló:

—Nomiꞌichaka pimejé keñoꞌótiyako aú nukeroꞌochó pipiyá, maꞌarumakaru nuꞌumakale. Raú notiꞌiyó pipiyá.

11 Tupana kemari rijló:

—¿Na chi kemari pijló: “Maꞌarumakaru piká”, ke? ¿Pajicha chi kele paijí icha, numakare nakú pijló iꞌimaká: “Pajñániña riká”, ke?

12 Raú rimá rijló:

—Ilerú inanaru ta, paꞌakáreru nojló nujwákeꞌewelo penaje iꞌimaká, ruká ta aꞌachayo nojló riká, raú nojicha roꞌopiyá riká.

13 E Tupana kemari inanárujlo:

—¿Naje piliꞌichá ilé ke unká wani paala?

Rumá rijló:

—Jeí ta pajlíchaka nujwaꞌaté aú nojicha riká.

14 Raú Tupana yerúkaꞌari jeí ta chaje, rimá rijló:

—Ilé ke piliꞌichaka pachá, ajopana kamejérina wejáputenami piꞌimajika. Maáreya aꞌajná ñoꞌojó pichiraꞌajó piꞌikú aú; teꞌerí ajñakana nakú piꞌimajé. 15 Eyá ilerú inanaru pechu iꞌimajeri chapú pinaku; ñaké kaja pipechu iꞌimajika runaku chapú. Ñakeja kaja iyanimínami, ilakénami, kele pechu iꞌimajika chapú panakuwáaka. Pajluwaja rulakénami nakiyana kalé cháꞌatajeri piká. Riká pajáraꞌajeri piwílaꞌaru, eyá piká ajmaꞌajeri riká riꞌipala nakiyá —ke Tupana kemaká Jiñá Chiꞌinárikanajlo.

16 Rejomi rimá piño inanárujlo:

—Kanupá piꞌimajika wakajé, pamaje kewini yajwé; kewini yajwé amákana jimaje piwáꞌaje piꞌirí. Ilé ke riꞌimajika pijló, eꞌiyonaja unká piyurílaje piyajná wátakana íkiꞌi raú; piwakáraꞌajeri riꞌimajika.

17 E rimá piño achiñajlo:

—Pajíchaka pachá piyajalo jaꞌapiyá, richa numakare nakú pijló: Pajñániña riká, ke pachá nuyerúkaꞌaje pijló teꞌerí chaje. Chuwa pijápajika kajrú wani pimena eꞌiyá, aꞌajnejí iꞌimakáloje ijló penaje. Jápakaje nakuja piꞌimajé, piꞌimajika marí teꞌerí nakú ketana. 18 Kajrú jimichi puꞌuwaré nojé jeñoꞌojika pimena eꞌiyá. Pajñaje kaja nakaje icha ejaꞌawá eꞌiyowá iꞌimakare. 19 Kajrú pikaꞌajika piñapheno jámija kalé aꞌajnejí iꞌimajé pijló palá.

20 Inaꞌuké, Tupana keñoꞌótakare ií iꞌimari Adán, eyá riká aꞌarí riyajalo ií Eva. Ruká iꞌimayo piyukeja inaꞌukena jaló ke, ruyanimínami ke weꞌemakale.

21 Kaja Tupana yerúkaꞌa nachaje, puꞌuwaré nalaꞌakare pachá. Rejomi rilaꞌá najló aꞌarumakaji kamejeri ímami nakiyá laꞌakanami, riká raꞌá najló. 22 E Tupana kemari: “Kaja weká ke kaja meꞌetení inaꞌuké; kaja naweꞌepí palá laꞌakaná, puꞌuwaré laꞌakaná waꞌató nakojé. Ilé ke neꞌemakale, unká paala najñákajla aꞌawaná icha, aꞌarí inaꞌukejlo kajmuchaji, neꞌemakáloje matajnako raú penaje”.

23 Ñakele najñaka piyá kele aꞌawaná icha, aꞌarí inaꞌukejlo kajmuchaji neꞌemakáloje matajnako raú penaje, Tupana jáchoꞌotari neꞌemaká, pukunaji raꞌakare najló iꞌimaká chiyá. Edén riká pukunaji ií iꞌimaká. Rejomi riwakáraꞌa rejátaka nakaje icha ijí teꞌerí eꞌiyowá. Rikaja kaja teꞌerí nakiyá laꞌakanami riꞌimaká. 24 Rejomi Tupana wakáraꞌari rijwaꞌatéjena, jeꞌechú chiyájena, witúkaꞌaka napumí chojé, napukúnami waꞌaphé neꞌemakáloje penaje. Riwakáraꞌa kaja keraꞌathani, joꞌojoji ke amákanami, chipúkaꞌaka rinakojé, inaꞌuké paꞌakó piyá richa, aꞌarí inajlo kajmuchaji, neꞌemakáloje matajnako raú penaje ajñaje.