3 E kaja nawata nanane nakiyana aꞌakana Tupánajlo. Caín aꞌá rijló nakaje rejátakare icha, rili, kaje maká rimena eꞌiyá iꞌimakare nakiyana. 4 Eyá Abel nori oveja iꞌirí, ajopana chaje palaka iꞌimakare ripirana eꞌiyayá, raꞌakáloje riká Tupánajlo. Palá Tupana pechu iꞌimaká Abel nakú raú, raꞌakale rijló nakaje riwátakare kaje. 5 Eyá Caín nakú unká paala ripechu iꞌimaká, unkale raꞌalá rijló nakaje riwátakare kaje. Rijimaje Caín yúchaꞌaro íkiꞌija wani, apoꞌojó rijimá apiyákako riyuchá akuwaná. 6 E Tupana kemari rijló: “¿Naje piyúchaꞌo kajrú wani nujwaꞌaté? ¿Naje pijimá apiyako apoꞌojó wani piyuchá akuwaná? 7 Paꞌakela nojló palani nakaje, unká pijimá apiyákalojla apoꞌojó. Kaja puꞌuwaré laꞌakaná aꞌá pimeꞌé rijluwa, piꞌimakáloje chapújneꞌeke penaje. Unkájika ee paꞌá pinakojó puꞌuwaré laꞌakaná, picháꞌatajla ñaké laꞌakaná”, ke Tupana kemaká rijló.

8 Unká Caín aꞌalá rinakojó riká. E apú wakajé rimá rijmerémijlo, riꞌijnakáloje rijwaꞌaté chiraꞌajó, 9 raú neꞌejná phuꞌuteni eꞌiyowá chiraꞌajó. Rejo Caín patarí rijmeremi, rinókaloje riká penaje. Rejeja rinó riꞌimaká, júpichami Tupana kemaká rijló:

—¿Mere chi pijmeremi Abel?

—Kaapí —ke rimaká— unká nuweꞌepila. Unká nujmeremi jipiꞌiture kalé nuká.

10 E Tupana kemari rijló:

—¿Na penaje chi pinocha pijmeremi? Kaja pejátiya teꞌerí jimá rírami aú. Riká rírami arukátari piká nojló, nuwajákaloje piká ilé ke piliꞌichaka riká lokópaꞌala. 11 Ñakele chuwa pamájika chapú kaje yajwé, pinóchakale pijmeremi. Chuwa unká piꞌimalaje marí teꞌerí, pejátiyaje pijmeremi írami aú nakú. 12 Unká kaja pijápalaje pimena eꞌiyá. Pejátajejla nakaje icha ijí, eꞌiyonaja unká riphálaje pijló. Chuwa piꞌijnajika yaꞌajnaje, mapeja paꞌapájika rewá. Unká piñakajela ewá kalé piꞌimajé, unká kaja watánaꞌakaje iꞌimalaje pijló.

13 Raú Caín kemari Tupánajlo:

—¡Yee, meke chapú wani piwajájika nuká! Unká nujñaꞌalaje riká panaku nuweꞌepika. 14 Kaja pikiꞌichá nuká marí teꞌerí nakiyá, nuchiraꞌakóloje mapeja menáwaka juká piliyá. Unká kaja watánaꞌakaje iꞌimalaje nojló. Iphátajeri nuká, nójeri nuká.

15 Tupana kemari piño rijló:

—Nójeri piká, nuwajaje iyamá kuwáꞌata ke pe.

E raꞌá rinaku rená keꞌená ke penaje, ajopana inaꞌukena noka piyá riká.

16 E kaja Caín iꞌijnari reyá, yaꞌajnaje Nod teꞌeré ejo. Edén teꞌeré ejo pumitá riꞌimaká; kamú jeñoꞌoká ejo pumitá nakojé riꞌimá.

17 Nod teꞌeré e riwáꞌako iꞌimaká, rujwaꞌaté riꞌirí iꞌimá. Riká ií raꞌá Enoc, ke. Rejomi kajrú riyani iꞌimaká rujwaꞌaté. Rilaꞌá pajimila re. Raꞌá riká pajimila ií Enoc, ke. Riꞌirí pheꞌejrí ií iꞌimaká nakojé raꞌá riká pajimila ií.

25 Adán, Eva waꞌaté iꞌirí iꞌimari piño. Roꞌó rií Set, rumá rinaku: “Tupana aꞌarí piño nojló apú nuꞌurí, Caín nókare iꞌimaká michú apumí chojé”.

26 Set ñapaka ejomi, riwaꞌa inanaru rijluwa. Pajluwaja riyani nakiyana ií iꞌimari Enós. Reyá aꞌajná ñoꞌojó napuraꞌajiko Tupana nakú; nemaké rijló, riweꞌepíkaloje namuꞌují penaje.