Egipto eyájena laꞌañó nawinano iyamata keri ketana. 4 Nañapátakaja nawinano laꞌakana ejomi, José puraꞌaró faraón ñakaré chiyá jápajeño waꞌaté. 5 Rimá najló:

—Ipechu iꞌimajika ee palá nunaku, ilaꞌá nojló nakaje. Imicha faraónjlo marí ke nunaku: Yewíchaja noraꞌapá michú takaꞌaká iꞌimaká wakajé, rimá nojló, wajñaꞌakáloje ritami wateꞌeré Canaán ejo penaje, watoꞌotákaloje ritami liri, natoꞌotákare chojé richiꞌiná michuna tami iꞌimaká, awaꞌajé. Kaja rilamáꞌata ripewá riꞌimaká rijluwa. Ñakele ikejaꞌa nuká faraón liyá, imaje rijló: “¿E piyuríkajla riꞌijnaká ritami jaꞌajé? Rejomi ripaꞌajó piño majó”, ke imájika rijló nunaku —ke José kemaká faraón ñakaré chiyá jápajeñojlo.

Ñaké nemaká rijló. 6 E neꞌemakana wakáraꞌari kaja ripurákaꞌalo rijló, rimá rinaku:

—Pijiꞌichá paraꞌapá michú tami, rimaká pijló rinaku iꞌimaká ke.

7-9 Raú José iꞌijnari kajrú neꞌemakana jaꞌapiyatéjena waꞌaté raraꞌapá michú tami jaꞌajé. Jacob michú yanimínami, rilakénami, kele iꞌijnaño kaja rijwaꞌaté. Nekaja kalé, kapajareruna yuwaná, napirana, keleja yuriño re. Íkiꞌiruna neꞌemaká iꞌijnaño ritami jaꞌajé. 14 Júpija kemachi neꞌemaká ritami jaꞌajé, rejomi José paꞌaró rejena waꞌaté napumí chuwá Egipto teꞌeré ejo.

15 Re neꞌemá meketánaja, e José ejena iꞌijnataño napéchuwa: “Apala chapú José pechu wanaku, chuwa kaꞌajná ripuraꞌajiko rileꞌejé jaꞌakumi nakú, chapú walaꞌaká riꞌimaká chona”, ke napechu iꞌimaká. 16 Raú nawakáraꞌa rijló purákaꞌaloji marí ke: “Unká chiyó paꞌayú michú takaꞌá iꞌimaká, rimá wajló, wemakáloje pijló, pamákoloje wachaje chapú walaꞌaká piꞌimaká ejomi, ke. 17 Ñakele chuwa wemá pijló, pamákoloje wachaje, chapú walaꞌakare piꞌimaká ejomi. Riká Tupana, paꞌayú michú pechu iꞌimajíkare chojé kaphí, waꞌaté jápajeño weká”.

E neꞌejná riyukuna iꞌimajé Josejlo. Neꞌemaká rijló riyukuna waꞌaté ke riyaka. 18 Rejomi rejena iꞌijnaño ramaje, iphaño rinaku. E najlámaꞌo riꞌimá nakojé, nemá rijló:

—Maare weká pileꞌejena inaꞌukena. Mapeja pijwaꞌaté jápajeño keja weká.

19 Eꞌiyonaja José kemari najló:

—Nojena, ikeroꞌoniño nupiyá, unká meke laꞌajé noꞌolá nokó Tupana apumí chojé. 20 Iká wátaño nulaꞌakana chapú iꞌimaká, eꞌiyonaja Tupana apiyákari chapú ilaꞌakare nuꞌumaká, nulaꞌakáloje inaꞌuké nakú palá meꞌetení ripalamane aú. Ñaké riꞌimakale, riꞌimatá kajrú inaꞌukena kapichákajo liyá meꞌetení. 21 Ñakele ikeroꞌoniño nupiyá. Nuká aꞌajeri ijló, iyánijlo waꞌaté aꞌajnejí —ke rimaká najló.

Ilé kaje aú palá napechu laꞌakó, ripuraꞌakole najwaꞌaté palá wani.

22-23 Egipto teꞌeré nakú nayuró júpija. Kaja ewaja José jáchaꞌaro; kaja riphata ciento diez jarechí; kaja rilakena yaní iꞌimá kaja. 24 E rimá rejénajlo:

—Kaja chuwa meketánaja nuꞌumajika ijwaꞌaté marí ejaꞌawá chu. Tupana aꞌajeri rinakojó iká palá. Riwáꞌaje iká marí teꞌerí eyá wateꞌeré ejo, rimájikare nakú waꞌajútaya michúnajlo nakú iꞌimajika ejo. Rinaku rimaké Abraham michú, Isaac michú, kélejlo. Ñaké kaja rimájika waraꞌapá michujlo iꞌimajika. 25 Ñakele Tupana jáchoꞌotajika ee iká maáreya rejo, eko ilaꞌá nojló nakaje: ijñaꞌá nophínami ijwaꞌató —ke rimaká najló.

26 E kaja ciento diez jarechí riꞌimaká wakajé, José takaꞌarí iꞌimaká. Naꞌá pujana ritami eꞌiyajé, rinapónami majaꞌakó piyá kiñaja, rejomi natoꞌotá ritami liri kaje chojé.

Kaja ketana José yukuna.