Moisés yukuna marí
2
Pajluwaja inaꞌuké iꞌimari, Leví lakénami nakiyana riꞌimaká. Riká wáꞌakaro apaꞌawelo, Leví lakénami nakiyana kaja iꞌimakayo waꞌaté. 2 Rujwaꞌaté riꞌirí iꞌimá. Ruwáꞌaka riká ejomi, romá riká palá meketánaja. Palani kerákoꞌopa ñani riꞌimaká, raú weji keta keri ketana rotaꞌakajla riꞌimaká Egipto eyájena liyá. 3 Eꞌiyonaja unká méñoꞌojo rotaꞌalajla riꞌimaká júpija wani naliyá, ñakele rulaꞌá rijló jita ñani ke, jimichi nakiyana ñaꞌakanami. Rejomi roꞌó rinaku mapa palá, juni mujlúkaꞌaka piyá richojé, e ruwaꞌa riká juni Nilo turenaje. Ruphátaka riká rejo ee, rotoꞌotá riká richojé, e ruwitúkaꞌata riká rakojé. Kajrú jimichi kaje iꞌimaká eꞌiyajé ruyurí riká. 4 Rejomi ruwakáraꞌa reꞌeweló yuwaló táraꞌako juká pani rawaꞌayá, romátakaloje riká penaje.5 E júpichami neꞌemakana itu witúkaꞌayo aꞌapitajé. Roꞌopitaká ketana rujwaꞌaté jápajeyo chiraꞌakó mapeja juni turenawa. E ruyakaꞌo, romá kuwáꞌala ke kúwaꞌako junapi, jimichi kaje eꞌiyá, raú rumá rujwaꞌaté jápajeyojlo:
—Pijiꞌichá riká majó, nomachi.
6 E ruꞌujná rijñaꞌajé. Ruphátaka runaku riká ee, neꞌemakana itu meꞌetayo richaya, amayo kerákoꞌopa achiñá ñani toꞌokó richu. Kajrú riyaka aú ruweꞌepí khaí rinaku, e rumá:
—Hebreo jaꞌa iꞌirí kari.
7 Rejéchami yuwaló reꞌeweló iꞌijnaká rowaꞌajé, rumá rojló:
8 —Piwátajika ee, nukulá pijló pajluwájaru hebreo jáꞌalo, roꞌokáloje rijló ruchuꞌuchure penaje.
—Palani, pikulá nojló ruká, rejomi piwaꞌa ruká majó.
—Piwaꞌa marí kerákoꞌopa, pilamáraꞌachi nojló riká, rejomi noꞌojé pijló rilamáraꞌakana wemí.
Raú ruwaꞌa piño ruꞌurí ñani ruñakaré chojé, re rulamáraꞌake riká. 10 Phíyuꞌuke chaje riꞌimaká ee, ruwaꞌa riká faraón itu ejo. Roꞌó rojló riká, ruꞌurí keja riꞌimakáloje rujwaꞌaté penaje. Roꞌó rií Moisés, rumá: “Junápiya nóchoꞌotakare riká”.
Moisés ñaakó Egipto teꞌeré eyá yukuna marí
11 Rejéchami kaja walijímaka Moisés iꞌimaká. E pajluwa pe riꞌijná rikáꞌana chaje chiraꞌajó, amari kaphí wani nawakáraꞌajika najápaka. Re riꞌimaká ee, apú Egipto eyaje ñaꞌatari pajluwaja rikáꞌana nakiyana. 12 Raú Moisés yakáꞌaro rewá ají ñoꞌojó, ají ñoꞌojó ke rawaꞌó, ramákaloje richó penaje. Amari unká na iꞌimalá, raú riꞌijná rijimaje, e rinó riká. Rejeja rijaꞌá ritami keꞌepé eꞌiyajé, rejomi ripaꞌó. 13 E muní ke, riꞌijná piño namaje. Riphaka nanaku ee, ramá piño iyamá rikáꞌana nakiyana nókako pajwaꞌatéchaka. Ñaꞌatari apujlo rimá:
—¿Naje chi piñaꞌatá pikaꞌa?
14 Raú rimá rijló:
—¿Na chi aꞌarí piká ta wawakáraꞌajeri penaje, pilamáꞌatakaloje wajwaꞌaté puraꞌakajo penaje? ¿Piwata kaja chi nonókana, lalemi pinoka apú Egipto eyaje iꞌimaká ke kaja?
Ilé ke Moisés jemaꞌaká rimaká rijló aú, rikeroꞌó, ripechu iꞌimá: “¿Na kaꞌajná amari nonoka riꞌimaká lalemi?”
15 Rejéchami neꞌemakana jemaꞌaká Moisés noka pajluwaja Egipto eyaje yukuna, raú riwakáraꞌa rikulákana, nenókaloje riká penaje. Eꞌiyonaja Moisés ñaaró reyá, ají ke yaꞌajnaje Madián teꞌeré ejo. Riphaka rawaꞌajé ee, ritajnó rejé, re riyaꞌo juni jamoꞌokelana awaꞌá.
16 Pajluwaja, inaꞌukena chaya Tupana waꞌaté puraꞌajero, iꞌimakeri Madián teꞌeré nakú. Rií iꞌimari Jetró. Iyamá kuwáꞌata kele riyani inaana iꞌimaká. Moisés iphaka rejo wakajé, neꞌejná juni jamoꞌokelana ejo juni amoꞌojé naraꞌapá piránajlo. Neká iphaño rejo, 17 nápumichu ke ajopana iphaka napiránajlo juni jamoꞌojé. Inaana iphaño paineko iꞌimaká, eꞌiyonaja nápumichu iphákaño jaꞌapaño nanaku napiyó. Ñakeja nalaꞌajíkano neká chapú, weꞌechú kaꞌalá keja. Ilé ke Moisés amaka aú nalaꞌaká neká, raꞌá inaana ñathé. Raꞌá naraꞌapá piránajlo juni napiyá. 18 Raú inaana paꞌañó nañakaré ejo, e naraꞌapá kemari najló:
—¡Meke kiñaja wani iphíchaka chuwajá!
19 Raú nemá rijló:
—Pajluwaja Egipto eyaje iꞌimichari re. Riká táriꞌicharo kaphí wani ajopana ovéjana lamáraꞌajeñojlo wachaya, rejomi raꞌachá pipiránajlo juni napiyá, raú wapiꞌichó kiñaja.
20 E rimá najló.
—¿Mere chi riká? ¿Naje unká imalacha rijló, riꞌijnakáloje majó ijwaꞌaté? Ipaꞌó piño rejo, imicha rijló, riꞌijnakáloje majó raꞌajnewá ajñaje wajwaꞌaté.
21 Raú napaꞌó piño napumí chuwá rejo. Nemá rijló, riꞌijnakáloje najwaꞌaté nañakaré ejo, raú riꞌijná najwaꞌaté. Re riꞌimaké najwaꞌaté, kaja ewaja Jetró aꞌarí ritu rijló riyajálowa penaje. Ruí iꞌimari Séfora. 22 Júpichami pajluwaja riꞌirí iꞌimaká rujwaꞌaté, raꞌá rií Gersón, ke.
23 Júpija wani riꞌimaká rewá, kaja Egipto teꞌeré iꞌimakana takaꞌá iꞌimaká. Ñakeja joꞌó Israel lakénami amájika kajrú jápakaje yajwé; kamuꞌují napechu ke napuraꞌajiko Tupana waꞌaté, raꞌakáloje nañathé penaje. Kaja ewaja Tupana aꞌá rinakojó neká. 24 Tupana kemakeri naꞌajútaya michúnajlo iꞌimajika mékeka rilaꞌajika nalakénami nakú palá. Abraham michujlo, eyá Isaac michujlo rimaké rinaku iꞌimajika, raú kalé raꞌá rinakojó nalakénami. 25 Ramá mékeka neꞌemaká rewá; riweꞌepí kaja mékeka najñaꞌaká chapú kaje yajwé panaku.