—¡Moisés!, ¡Moisés!

—Maare nuká —ke raꞌajipaká rijló.

5 Raú Tupana kemari rijló:

—Piꞌijnaniña majó. Pikaꞌá piꞌimaꞌulá pinakiyó, kele teꞌerí pitáraꞌako nakú meꞌetení, palani riká, nuꞌumakale maare. 6 Tupana nuká, paꞌajútaya michuna Abraham, Isaac, Jacob, kele pechu iꞌimajíkare chojé kaphí nuká.

Ilé ke rimaká rijló aú Moisés apáraꞌari rijimá, rikeroꞌokole richaje yakáꞌakano piyá. 7 E Tupana kemari piño rijló:

—Puꞌuwaká nomaka mékeka nuleꞌejena inaꞌukena, Egipto teꞌeré nakú iꞌimakaño, ñaꞌaká chapú kaje yajwé panaku. Kajrú neꞌemaká nojló kamuꞌují napechu ke, mékeka namaka chapú kaje yajwé yukuna. Palá nuweꞌepika mékeka namaka riyajwé. 8 Ñakele nuwitúkiꞌicha majó, nuꞌumatákaloje neká Egipto eyájena liyá penaje. Nóchoꞌotaje neká reyá, nuwáꞌakaloje neká kajruni, palá nojé teꞌerí ejo. Re ñóꞌope nakaje iꞌimajika najló. Riká teꞌerí nakú meꞌetení re cananéona, hitítana, amorréona, ferezéona, hevéona, jebuséona, kele nakiyana. 9 Kaja nomaꞌá Israel lakénami akhaꞌaká Egipto eyájena maná, nomá kaja reyájena laꞌaká neká chapú wani. 10 Ñakele chuwaka piꞌijnaká rejo. Nuwakáraꞌa piká rejo, pipuraꞌakóloje neꞌemakana waꞌaté nachaya, páchoꞌotakaloje nuleꞌejena inaꞌukena, Israel lakénami, Egipto teꞌeré eyá penaje —ke Tupana kemaká rijló.

11 Raú Moisés kemari rijló:

—Mapeja iꞌimaká nuká, unká méñoꞌojo nuꞌujnalá neꞌemakana waꞌaté puraꞌajó, nóchoꞌotakaloje neká reyá penaje.

12 Tupana kemari piño rijló:

—Nuká iꞌimajeri pijwákeꞌewe. Páchoꞌotajikaja neká reyá wakajé, marí ipuré jiꞌilá e ilaꞌajé puꞌují ipéchuwa nojló. Ilé ke riꞌimajika ijló wakajé, iweꞌepeje nuká wakáraꞌaka piꞌimaká rejo.

13 Eꞌiyonaja Moisés kemari piño rijló:

—Nuphájika ee rejo, numaje najló: “Riká, aꞌajútaya michuna pechu iꞌimajíkare chojé kaphí, wakáraꞌari nuká majó”, ke. Raú kaꞌajná nemaje nojló: “¿Na chi rií wakáraꞌari piká majó?”. Ilé ke nemájika ee nojló, ¿meke numájika najló?

14 Raú Tupana kemari rijló:

—“Iꞌimajeri penaje iꞌimaká, riká wakáraꞌari nuká majó”, ke pimájika najló nunaku —ke Tupana kemaká rijló—. 15 Pimaje kaja najló nunaku marí ke: “Aꞌajútaya michuna Abraham, Isaac, Jacob, kele pechu iꞌimakeri kaphí richojé. Nawakáraꞌajeri riká, penájemi wakáraꞌari nuká majó ichaje”. 17 Pimaje kaja najló nunaku: “Riká jáchoꞌotajeri iká chapú kaje amákare Egipto teꞌeré e chiyá. Rejomi riwáꞌaje iká ajopana teꞌeré ejo. Re meꞌetení cananéona, hitítana, amorréona, ferezéona, hevéona, jebuséona, kele nakiyana ilé teꞌerí nakú. Palani wani riká teꞌerí, re ñóꞌope wani nakaje rewá najló”, ke pimájika najló nunaku. 18 Pheñawilana re iꞌimakaño jemaꞌajeño paꞌapiyá, najwaꞌaté piꞌijnajé Egipto iꞌimakana waꞌaté puraꞌajó. Rijló pimaje marí ke: “Tupana, weká hebréona pechu iꞌimakare chojé kaphí, yaꞌataró wajló. Ñakele piyurí wáchoꞌoko maáreya, weꞌejnakáloje maare eyá weji ke kala ketana jukaka penaje, re wenókaloje rijló wapirana nakiyana, wephákale raꞌapí”, ke imájika rijló nunaku.

19 Kaja nuweꞌepí unká riyurílaje jáchoꞌoko reyá. Ñakele nuwajaje neká kajrú, tejmuji aú nayureje iká jáchoꞌokoloje reyá penaje. 20 Nakaje nulaꞌajíkare aú, naweꞌepeje nuweꞌepika piyuke nakaje laꞌakana. Nukapichátaje nanakiyana; nulaꞌajé kaja kajrú nakaje unká joꞌó namálare nateꞌeré nakú. Ilé ke nulaꞌajika aú neꞌemakana yureje Israel lakénami jáchoꞌoko reyá. 21 Nopiyákaje kaja Egipto eyájena pechu, nephákaloje jaꞌapí penaje. Jáchoꞌojiko reyá wakajé, naꞌajé ijló kajrú nakaje, jáchoꞌoko piyá mapeja. 22 Piyuke inaana kejáꞌajeño inaana Egipto eyájena, nawaꞌá iꞌimakaño liyá nakaje, raú naꞌajé najló riká. Nakaje oro, plata, kaje nakiyá laꞌakanami naꞌajé najló; naꞌajé kaja najló aꞌarumakaji; ñaké kaja naꞌajika nayánijlo aꞌarumakaji. Ilé kaje aú natajátaje Egipto eyájena liyá piyuke nanane —ke Tupana kemaká Moisesjlo.