—Unká nalaꞌalaje kewaka noꞌopiyá. Nakaje numajíkare nakú najló, unká nemaꞌalaje noꞌopiyá. Raú kaꞌajná napiyákaje nuká apoꞌojó: “Unká Tupana yaꞌataló pijló ta”, ke kaꞌajná nemájika nojló.

Tupana kemari piño rijló:

2 —¿Na chi kele pikapi?

—Nukutiware.

3 —Pikaꞌá riká teꞌerí eꞌiyajé.

Raú Moisés kaꞌarí riká teꞌerí eꞌiyajé, rejéchami rikutiware jewíñaꞌako jeí penaje. Moisés ñaarojla ripiyá, 4 eꞌiyonaja Tupana kemari rijló:

—Pipatá riká rijipí nakiyá.

Raú ripatá riká, e ripaꞌó piño rapumí chuwá rikápeje kutiwá penaje.

5 Tupana kemari rijló:

—Ilé ke pilaꞌajika najimaje, naweꞌepíkaloje kewaka nuyaꞌatako pijló iꞌimaká. Aꞌajútaya michuna Abraham, Isaac, Jacob, kele pechu iꞌimaké kaphí nochojé. Nawakáraꞌajeri nuká, yaꞌataró pijló.

6 Rimá piño rijló:

—Parúkaꞌa piyátheꞌela paꞌarumaká chojé.

E rarúkaꞌa riyátheꞌela raꞌarumaká chojé. E reroꞌó riyátheꞌela richiyá, amari patákaꞌataro ke rima iꞌimaká, kajrú jareni iꞌimaká rinaku.

7 Rimá piño rijló:

—Chuwa parúkaꞌa piño riká paꞌarumaká chojé.

Raraꞌá piño riká richojé, e reroꞌó piño riká majó, amari kaja ripaꞌakó rapumí chuwá.

8 Rimá rijló:

—Naweꞌepíkaloje kewaka pimaká najló, pikaꞌajé pikutiware najimaje, rewíñaꞌakoloje jeí penaje. Eyá unkájika ee nemaꞌá paꞌapiyá, parúkaꞌaje piyátheꞌela paꞌarumaká chojé, rilaꞌakóloje ritami penaje. Raú nemaꞌajé paꞌapiyá. 9 Unkájika ee nalaꞌá riká kewaka ke raú, pilaꞌajé piño marí ke: Pamoꞌojé juni, rejomi pakhoꞌojé riká teꞌerí eꞌiyajé. Marí ke pilaꞌajika ee, rewíñaꞌajo jirá penaje —ke Tupana kemaká Moisesjlo.

10 —¡Yee jaꞌa!, Tupana, unká méñoꞌojo nupuraꞌaló palá, kaja júpicha ñakeja nuká, unká meyáleje kalé riká. Kaja keja nuká, maꞌamachi ke nupuraꞌakó.

11 Raú Tupana kemari piño Moisesjlo:

—¿Na laꞌarí inaꞌuké numá? Re inaꞌuké nakiyana unká méñoꞌojo napuraꞌaló, ajopana meꞌejwiruna, ajopana mejluruna, eyá ajopana amaño palá. ¿Na chi laꞌarí neká ñaké? 12 Ñakele chuwa piꞌijná, nuká aꞌajeri piñathé puraꞌakajo aú; nuká kaja kemájeri pijló mékeka pimájika najló.

13 Eꞌiyonaja Moisés kemari piño rijló:

—Tupana, pilaꞌá nojló nakaje, piwakáraꞌa apú.

14 Ilé ke rimaká aú, Tupana yúchaꞌaro rijló, rimá rijló:

—Re peꞌewé, Aarón, Leví lakénami nakiyana, nuweꞌepí riká puraꞌakó palá wani. Meꞌetení riꞌijnaká pichaje, puꞌují ripechu laꞌajiko ramájika aú piká. 15 Piká iꞌimajeri nakaje ilaꞌajíkare yukuna rijló paineko, rejomi riká iꞌimajeri riyukuna ajopánajlo. Eyá nuká iꞌimajeri ijwákeꞌewe, iꞌijnajika ee najwaꞌaté puraꞌajó. Nuká iꞌimajeri ijló nakaje ilaꞌajíkare yukuna paineko, 16 eyá piká puraꞌajero rijwaꞌaté nopumí chojé. Paꞌapiyá ke Aarón jaꞌapátajika riyukuna inaꞌukejlo. 17 Pijñaꞌá pikutiware pijwaꞌató, raú pilaꞌajé kajrú nakaje nukaja kalé weꞌepíkare laꞌakana —ke Tupana kemaká rijló.

Ilé ke napuraꞌakó pajwaꞌatéchaka. 18 Rejomi Moisés paꞌaró riyanaꞌajú ejo. Riphá rinaku, e rimá rijló:

—Nuyanaꞌajú, chuwa nupaꞌajiko Egipto teꞌeré nukáꞌana iꞌimaká ejo. Nuwata riweꞌepíkana, e kaꞌajná kajmuruna joꞌó neká.

—Je, piꞌijná palá —ke rimaká rijló.

19 Re joꞌó kaja Moisés iꞌimaká Madián teꞌeré nakú wakajé, Tupana kemari piño rijló:

—Chuwa pipaꞌó Egipto teꞌeré ejo, kaja wátaño pinókana iꞌimaká takaꞌataño.

20 Raú Moisés iꞌijnari riyajalo, riyani, kele wáꞌaje. Riyáꞌata neká rikawarute wajlé chojé, ripaꞌakóloje najwaꞌaté Egipto teꞌeré ejo penaje. Rijñaꞌá kaja rikutiware rijwaꞌató, Tupana kemakare nakú rijló iꞌimaká. 21 E kaja neꞌejná, eꞌiyowá ke Tupana kemaká piño rijló:

—Piphájikaja Egipto ejo, eko piweꞌepí pitukumó nakaje laꞌakana Faraón jimaje. Rijimaje pilaꞌajé nakaje nukaja kalé weꞌepíkare laꞌakana. Kaja noꞌó pijló péchuji, pilaꞌakáloje riká penaje. Eyá nuká laꞌajeri Faraón pechu, ripechu keja rilaꞌakáloje nakaje penaje, ñakele unká riyurílaje Israel lakénami jáchoꞌoko reyá kiñaja. 22 Rejomi pimaje rijló: “Marí ke Tupana kemaká wanaku: ‘Nuleꞌejena inaꞌukena, Israel lakénami. Iná pechu iꞌimaká iná iꞌirí pheꞌejrí nakú, ke kaja nupechu nanaku’. 23 Raú kalé numá pijló, piyuríkaloje náchoꞌoko maáreya penaje, eꞌiyonaja unká piyurílaje náchoꞌoko, pachá nonoje piꞌirí pheꞌejrí”, ke pimájika rijló nunaku —ke Tupana kemaká Moisesjlo.

27 Aꞌapona ke Tupana kemaká reꞌewé Aaronjlo:

—Chuwa piꞌijná desierto chojé, rejé piphákaꞌakoloje peꞌewé Moisés waꞌaté penaje.

Raú riꞌijná ají ke yaꞌajnaje Tupana leꞌejé ipuré jaꞌapojó, re riphákaꞌako rijwaꞌaté. Riphákaꞌako rijwaꞌaté ee, richijñoꞌó rijimá chiyá. Rejéchami Moisés iꞌimaká rijló piyuke nakaje Tupana wakáraꞌakare rimaká Faraonjlo yukuna. Riꞌimá kaja nakaje riwakáraꞌakare rilaꞌaká Tupana Pechu aú yukuna. Reyá naꞌapá pajñakani Egipto teꞌeré ejo. 29 Nephaka Israel lakénami nakú penájeja nawakata pheñawilana, 30 e Aarón iꞌimari najló mékeka Tupana puraꞌakó Moisés waꞌaté iꞌimaká yukuna. Rejomi Moisés laꞌarí nakaje najimaje, Tupánaja kalé weꞌepíkare laꞌakana kaje, 31 raú naweꞌepí kewaka rimaká najló. Naweꞌepí Tupana aꞌaká rinakojó neká, kaja ramá kajrú najñaꞌaká chapú kaje yajwé panaku. Raú nakúwaꞌata newílaꞌaru, napechu iꞌimakale puꞌují wani Tupana nakú.