—Tupana, kaphí Israel lakénami pechu iꞌimakare chojé, kemari pinaku: “Eko riyurire nuleꞌejena inaꞌukena jáchoꞌoko maáreya, neꞌejnakáloje pajñakani desierto ejo napéchuwa laꞌajé puꞌují nojló”, ke rimaká pinaku —ke nemaká rijló.

2 Raú rimá najló:

—¿Na chi riká kele imá nakú Tupana, ke nojló? Unká nuweꞌepila naka kele imá nakú. Unká wani nomálare kele ipuraꞌó nakú nujwaꞌaté, ñakele unká nuyurílaje iká, Israel lakénami waꞌaté, jáchoꞌoko maáreya.

3 Raú nemá piño rijló:

—Riká Tupana, weká hebréona pechu iꞌimakare chojé kaphí, yaꞌataró wajló iꞌimaká. Ñakele weꞌejnajé maáreya weji ke kala ketana jukaka, re wenókaloje wapirana nakiyana rijló, wephákale raꞌapí. Unkájika ee weꞌejná, apala rikapichátaje weká tami kaje aú; apala chapú wanaku péchuruna kaꞌajná kapichátajeño weká, wajwaꞌaté nenókajiko wakajé.

4 Rejéchami neꞌemakana kemaká najló:

—¿Naje chi imaláraꞌata ikáꞌana najápakaꞌala liyá? Ijápicha ta chuwa aꞌajná ñoꞌojó najwaꞌaté. 5 Kaja íkiꞌiruna wani iká chuwaka. Eta, ¿naje iwata chuwa nayurika najápakaꞌala laꞌakana?

6 E riwakajeja neꞌemakana kemari najápakaꞌala amájeñojlo:

7 —Chuwa kaja unká aꞌalaje Israel lakénamijlo trigo ínami tami, nalaꞌakáloje teꞌerí takaꞌátakanami raú penaje. Nekoja neꞌejnajika rikulaje. 8 Júpimi nalaꞌajika iꞌimajika, ke kaja ñóꞌopekano kalé nalaꞌajika riká, rená chojé nalaꞌajé riká. Apala unká kaꞌajná jápakaje iꞌimalá najló, raú kaꞌajná nemá nojló, nuyuríkaloje neꞌejnaká desierto chojé penaje. 9 Najápaka iꞌimaká chaje iwakáraꞌajika najápaka kaphí chuwa, neꞌemakáloje jápakaje nakuja penaje, naꞌaká piyá nanakojó pajlakaje purákaꞌaloji —ke rimaká najló.

10 E kaja najápakaꞌala amájeño iꞌijnaño Israel lakénamijlo kemaje, neꞌemakana wakáraꞌaka nemaká najló ke. Nemá najló:

—Marí ke faraón kemíchaka wajló: “Chuwa kaja unká waꞌalaje ijló trigo ínami tami, ilaꞌakáloje teꞌerí takaꞌátakanami raú penaje. 11 Ikoja iꞌijnajika rikulaje, iphátajika riká ewá, ñakeja kaja ñóꞌopeka kalé ilaꞌajika riká”, ke rimíchaka inaku —ke nemaká najló.

12 Rejéchami Israel lakénami kulájika trigo ínami jímaꞌalami kaje eꞌiyowá, ají ñoꞌojó, ají ñoꞌojó ke. Nekoja nakulájika riká piyukeja Egipto teꞌeré eꞌiyowá. Namataꞌakare jiꞌilami waꞌató najñaꞌaké. 13-14 Weꞌechú kaꞌalá keja najápakaꞌala amájeño wakáraꞌajika nalaꞌaká ñóꞌope teꞌerí takaꞌátakanami, naꞌajika najló trigo ínami tami wakajé ke kaja ñóꞌopekano. Unkachu nalaꞌaké ñaké kaja ñóꞌopeka, nañaꞌatake neká ripachá. Kaphí wani nawakáraꞌajika najápaka, 15 raú Israel lakénami nakiyana iꞌijnaño neꞌemakana waꞌaté puraꞌajó, nemá rijló:

—Wawakáraꞌajeri, ¿naje chi pilaꞌano weká ilé ke wani? 16 Kaja chuwa unká naꞌalá wajló trigo ínami tami, júpimi naꞌajika wajló ke kaja, eꞌiyonaja nawakáraꞌa walaꞌaká riká, naꞌajika wajló rínami tami iꞌimajíkano wakajé ke kaja ñóꞌopeka. Eyá unkachu walaꞌalá riká, nemaká wajló ke ñóꞌopeka, wakajé nañaꞌatano weká rijimaje. Pijwaꞌatéjena pachá unká walaꞌalá júpimi walaꞌajika ke kaja ñóꞌopeno riká —ke nemaká neꞌemakánajlo.

17 Raú riká kemari najló:

—¡Ijnuruna wani kaꞌajná iká ta! Ñaké iꞌimakale imano nojló, nuyuríkaloje iꞌijnaká maáreya desierto chojé, inókaloje rejo ipirana nakiyana Tupánajlo penaje. 18 Chuwa ipaꞌó ta ijápakaꞌala laꞌajé, ewá kalé unká naꞌalaje ijló trigo ínami tami, eꞌiyonaja ilaꞌajé júpimi ilaꞌajika ke kaja ñóꞌopekano riká —ke rimaká najló.

19 Raú naweꞌepí unká meke nalaꞌalajla. 20 Náchoꞌoko faraón waꞌaté puraꞌajomi ee, namá Moisés, Aarón waꞌaté, faraón ñakaré kopi. Re neꞌemá nawátakana nakú, 21 e nemá najló:

—Ipachá chapú wani faraón amaka weká; ñaké kaja rijwaꞌatéjena amaka weká chapú. Tupana wajájeri iká ipachoja ilé ke ilaꞌaká weká pachá. Ipachá kaꞌajná nenótaje weká.

22 Raú Moisés puraꞌaró piño Tupana waꞌaté, rimá rijló:

—¿Naje pilaꞌá pileꞌejena inaꞌukena chapú wani? ¿Naje kalé ta piwakáraꞌa nuká majó iꞌimaká? 23 Piwakáraꞌa nupuraꞌakó faraón waꞌaté iꞌimaká, eyá maárejecha, richaje ke wani rilaꞌaká pileꞌejena inaꞌukena chapú, eꞌiyonaja unká meke pilaꞌalá, piꞌimatákaloje neká naliyá penaje.