—Chuwa pamájika mékeka nulaꞌajika riká faraón. Tejmuji aú nuwakáraꞌaje riká, riwakáraꞌakaloje nuleꞌejena inaꞌukena jáchoꞌoko maáreya penaje. Rikó rimájika ijló, jáchoꞌokoloje maáreya penaje.

2 Rejéchami Tupana puraꞌakó piño Moisés waꞌaté, rimá rijló:

—Nuká Tupana, Paminá wani. 3 Nuyaꞌatákono Abraham, Isaac, Jacob, kélejlo iꞌimajíkano penájemi nuká, napechu iꞌimajíkale nunaku: “Piyukeja nakaje laꞌajerí wani riká”, ke. Eꞌiyonaja unká napechu iꞌimalá nunaku: “Paminá wani riká”, ke. 4 Wapuraꞌó pajwaꞌatéchaka nakaje nakú iꞌimaká, riyuríkoloje ñaké pajlokaka penaje. Riwakajé noruká najló Canaán teꞌeré, riꞌimakáloje nalakénami teꞌeré penaje. Riká teꞌerí neꞌemaké nakú meketánaja, ajopana teꞌeré eyájena ke. 5 Nuweꞌepí meꞌetení kajrú nalakénami amaka chapú kaje yajwé, kaphí wani Egipto eyájena wakáraꞌaka najápaka najló. Nuweꞌepí kaja mékeka numájika naꞌajútayajlo iꞌimajika. 6 Ñakele pimaje najló nunaku: “Riká Paminá wani, iꞌimatájeri iká Egipto eyájena, wakáraꞌaño ijápaka najló kaphí wani liyá”. Nulaꞌajé kajrú wani nakaje nupechu aú, naweꞌepíkaloje mékajeka nuká raú penaje, raú neꞌemakana yureje jáchoꞌoko maáreya. 7 Iká iꞌimajeño nuleꞌejena inaꞌukena, eyá nochojé ipechu iꞌimajé kaphí. Marí kaje aú iweꞌepeje Paminá wani nuká, ipechu iꞌimakare chojé kaphí, iꞌimatájeri kaja iká jápakaje yajwé, amákare meꞌetení liyá. 8 Nuwáꞌaje iká Canaán teꞌeré ejo, numaké nakú aꞌajútayajlo iꞌimajika; noꞌojé ijló riká iteꞌerewa penaje. “Paminá wani riká”, ke pimájika najló nunaku —ke Tupana kemaká Moisesjlo, riꞌimakáloje najló riyukuna penaje.

9 E riꞌijná riyukuna iꞌimajé Israel lakénamijlo, eꞌiyonaja unká nemaꞌalá raꞌapiyá, napechu laꞌakole ujwí kajrú jápakaje yajwé amákana aú. 10 E Tupana kemari Moisesjlo:

11 —Chuwa pimicha neꞌemakánajlo, riyuríkaloje jáchoꞌoko maáreya penaje.

12 Eꞌiyonaja rimá Tupánajlo:

—Unká Israel lakénami jemaꞌalá noꞌopiyá, ¿eta meke laꞌajé chi neꞌemakana jemaꞌajla noꞌopiyá, unká weꞌepila ta palá puraꞌakajo jaꞌapiyá?

13 E Tupana kemari Moisesjlo, Aaronjlo waꞌaté:

—Eko imá marí ke inakuwá Israel lakénamijlo, Egipto eyájena wakáraꞌajerijlo waꞌaté: “Tupana wakáraꞌari weká, wáchoꞌotakaloje Israel lakénami maáreya penaje”.