11 E neꞌemakana awakátari rimariꞌichútena rejé. 12 Neká, pajluwano ke, kaꞌañó kaja nakutiware najimaje. Ñaké kaja nakutiware jewíñaꞌako jeína penaje, eꞌiyonaja Aarón kutiware penájemi ajmíloꞌotari neká piyukeja. 13 Ilé ke neꞌemakana amaka nalaꞌaká, eꞌiyonaja unká remaꞌalá naꞌapiyá, unká kaja riyurila náchoꞌoko reyá, Tupana kemaká rinaku iꞌimaká ke.

15 Kéchami Tupana kemaká piño Moisesjlo:

—Muní lapiyami piwitúkaꞌaje najneꞌeré ejo. Juni turená piwátaje faraón, rejé riphaje aꞌapitajé. Pijñaꞌá kaja pijwaꞌató pikutiware, jewíñaꞌaro jeí penaje iꞌimaká. 16 Riphájika ee rejé, pimaje rijló: “Paminá wani riká, weká hebréona pechu iꞌimakare chojé kaphí. Riká penaje wakáriꞌichari nuká majó pijló kemaje: Piyurí nuleꞌejena inaꞌukena jáchoꞌoko maáreya, neꞌejnakáloje desierto iꞌimaká ejo penaje, re nalaꞌakáloje puꞌují napéchuwa nojló. Maárejecha unká wani pemaꞌalá noꞌopiyá. 17 Marí ke Tupana kemaká pinaku: Chuwa pamájika meke laꞌajérika riká, Paminá wani iꞌimakare. Meꞌetení nuñaꞌajika juni jimaje nukutiware aú, raú juni jewíñaꞌakoloje jirá penaje. 18 Raú juni yajné, rakuwá iꞌimakaño, takaꞌatájeño; raú kaja unká na kalé iꞌirajeri juni nakiyana, puꞌuwareni wani riꞌimajíkale”, ke pimájika faraonjlo.

19 Rimá kaja rijló:

—Eko pimá Aaronjlo, rijñaꞌakáloje rikutiware rijwaꞌató, raú rewíñaꞌatakaloje juni, juni pomi, kaéja, kaje maká jirá penaje. Piyukeja wani juni jewíñaꞌajero jirá penaje raú; juni, iꞌichilá chuwá iꞌimajíkare waꞌató, jewíñaꞌajero kaja jirá penaje raú.

20 E Moisés, Aarón waꞌaté, laꞌañó Tupana wakáraꞌaka nalaꞌaká ke. E neꞌejná rejo. Faraón iphaka nanaku ee, neꞌemá rijló mékeka Tupana kemaká najló rinaku yukuna. Rejéchami Aarón ñaꞌaká juni rikutiware aú. Faraón, rijwaꞌatéjena, kele ijlú chuwaja juni jewíñaꞌaro jirá penaje, 21 raú piyukeja juni yajné takaꞌataño. Piyukeja Egipto ewaje juni iꞌimakare jewíñaꞌaro jirá penaje, ñakele unká mérowa nephátake juni, neꞌerakáloje penaje.

22 Eyá mariꞌichuna, Egipto eyájena iꞌimakaño, laꞌañó ñaké kaja nalawichure aú; newíñaꞌata kaja juni jirá penaje. Ilé kaje aú unká neꞌemakana yurila Israel lakénami jáchoꞌoko reyá. Unká kaja raꞌalá rinakojó Moisés, Aarón, kele purákaꞌalo, Tupana kemaká najló rinaku iꞌimaká ke. 23 Ripaꞌó riñakaré ejo manaꞌija. 24 Eyá Egipto eyájena ichaño teꞌerí, nephátakaloje juni palani jamarálani, neꞌerakáloje penaje.