8
Pajluwa jápakaje ejomi, Tupana kemari Moisesjlo:—Pipuriꞌichó piño faraón waꞌaté, pimicha rijló: “Marí ke Tupana kemaká pinaku, piyuríkaloje rileꞌejena inaꞌukena jáchoꞌoko maáreya, neꞌejnakáloje napéchuwa laꞌajé puꞌují rijló penaje. 2 Unkájika ee piyurílaje neꞌejnaká reyá, riwajaje piká, piyukeja piteꞌeré ewájena waꞌaté. Kajrú makajmena iꞌimajika piyuke piteꞌeré eꞌiyowá; 3 kajrú makajmena jáchoꞌojiko junápiya. Neká mujlúkaꞌajeño piñakaré chojé, pikapure pikamátakaro chojé waꞌató; ñaké kaja neꞌemajika paꞌapiyatéjena, pijwaꞌatéjena, kele ñakaré chuwá. Ukapú, nakechípaꞌakare chu pijló pan, kecha neꞌemákare chu pan pijló, chuwá waꞌató neꞌemajé. 4 Neñoꞌojé pinakojé, eyá paꞌapiyatéjena, pijwaꞌatéjena, nakojé waꞌató”, ke pimájika rijló nunaku.
5 Tupana kemari kaja Moisesjlo:
—Pimá Aaronjlo, ritoꞌotachi rikutiware piyuke juni chaje, makajmena jáchoꞌokoloje rakiyá, nayúraꞌakoloje Egipto teꞌeré nakuwá penaje.
6 Raú Aarón jáchoꞌotari piño rikutiware juni chaje, rejéchami kajrú makajmena jáchoꞌoko teꞌerí nakojé. Íkiꞌiruna wani neꞌemaká, kaja napáraꞌa teꞌerí jimá piyuke. 7 Eyá mariꞌichuna, rewá iꞌimakaño, laꞌañó ñaké kaja; náchoꞌota kaja makajmena Egipto teꞌeré nakojé. 8 E kaja neꞌemakana wáꞌari Moisés, Aarón, kele maná, rimá najló:
—Chuwa ipuraꞌó Tupana waꞌaté, rikapichátakaloje waliyá makajmena penaje. Rejomi nuyureje iká, ikáꞌana waꞌaté, jáchoꞌoko maáreya, inókaloje ipirana nakiyana Tupánajlo penaje.
9 E Moisés kemari rijló:
—¿Mékechami chi piwata nupuraꞌakó rijwaꞌaté ichaya, raꞌapátakaloje iliyá neká penaje?
10 —Muní.
Raú Moisés kemari rijló:
—Je, ñaké nulaꞌajika, piweꞌepíkaloje raú unká apú iꞌimalá Tupana ke, wapechu iꞌimakare chojé kaphí. 11 Ñakele unká makajmena iꞌimalaje piñakaré chu, junápiwaja kalé neꞌemajé. Unká kaja nakawílaꞌalaje pinaku, paꞌapiyatéjena, pijwaꞌatéjena, kele nakú.
12 E Moisés jáchoꞌoro Aarón waꞌaté, faraón ñakaré chiyá. Rejomi Moisés puraꞌaró Tupana waꞌaté, raꞌapátakaloje reyá makajmena, riwakáraꞌakarena iꞌimaká penájemina. 13 Raú rikapichata piyukeja makajmena, piyukeja wani natakaꞌatako rejéchami. Nañakaré chuwá iꞌimakaño, phuꞌuteni chuwá iꞌimakaño waꞌató takaꞌataño. 14 Rejomi rewájena awakátaño natami pajluwaja chojé, pajluwaja chojé, ke waja. Majani wani rewá nama iꞌimajika. 15 Ilé kaje jaꞌapaka ejomi, manaꞌija neꞌemakana pechu iꞌimaká, raú rijnúchaꞌo piño naꞌapiyá. Unká riyurila náchoꞌoko reyá; unká kaja raꞌalá rinakojó Moisés, Aarón, kele purákaꞌalo, Tupana kemaká najló rinaku iꞌimaká ke.
16 E Tupana kemari piño Moisesjlo:
—Pimá Aaronjlo, ripatákaloje rikutiware teꞌerí jimó, muꞌupé jewíñaꞌakoloje janiyuna penaje, neꞌemakáloje piyukeja Egipto teꞌeré nakuwá penaje.
17 Raú Moisés, Aarón waꞌaté, laꞌañó Tupana kemaká najló ke. Aarón pataká rikutiware teꞌerí jimó aú, piyuke muꞌupé, Egipto teꞌeré eꞌiyowá iꞌimakare, jewíñaꞌako janiyuna penaje. Neká janiyuna kawílaꞌakeño kajrú wani Egipto eyájena nakú, ñakeja kaja nakawílaꞌajika napirana nakú. 18 Ilé ke namaka aú, mariꞌichuna Egipto eyájena, atáꞌañojla ñaké laꞌakana, eꞌiyonaja unká méñoꞌojo newíñaꞌatala muꞌupé janiyuna penaje. Kajrú janiyuna kawílaꞌajika nanaku, 19 raú mariꞌichuna kemaño faraónjlo:
—Tupana liyaje kaji.
Ilé ke nemaká rijló, eꞌiyonaja unká faraón jemaꞌalá naꞌapiyá; unká kaja raꞌalá rinakojó nakaje Moisés, Aarón, kele kemakare nakú rijló iꞌimaká, mékeka Tupana kemaká rinaku iꞌimaká.
20 E kaja Tupana kemari piño Moisesjlo:
—Muní lapiyami faraón witúkaꞌaje piño rijneꞌeré chojé, ñakele piká iꞌijnajeri ripiyá rejo. Re piwátaje riká. Riphájika rejé ee, pimaje rijló, riyuríkaloje nuleꞌejena inaꞌukena jáchoꞌoko maáreya, neꞌejnakáloje aꞌajná ñoꞌojó, nalaꞌakáloje puꞌují napéchuwa nojló rejo penaje. 21 Unkájika ee riyurí náchoꞌoko iléreya, e nuwakáraꞌaje kajrú jeraꞌaphana keñoꞌótako maárowa, nakawílaꞌakaloje rinaku, raꞌapiyatéjena, rijwaꞌatéjena, kele nakú penaje. Piyuke nañakaré chuwá waꞌató neꞌemajé, ñaké kaja nakópiwa neꞌemajika wakaꞌapó. 22 Ilé ke riꞌimajika najló, eyá Gosen teꞌeré nakuwá unká pajluwa ñani jeraꞌaphá iꞌimalaje, rewá nuleꞌejena inaꞌukena iꞌimakale. Raú riweꞌepeje re nuká, Paminá wani, maare riteꞌeré nakú. 23 Riweꞌepeje kaja unká nulaꞌalá nuleꞌejena inaꞌukena chapú, nulaꞌaká rileꞌejena inaꞌukena chapú ke kaja. Marí numíchaka rinaku, ke nulaꞌajika riká. Riyukuna piꞌimajé faraónjlo —ke Tupana kemaká Moisesjlo.
24 E riꞌijná riyukuna iꞌimajé rijló. Rejomi Tupana laꞌarí rimaká rinaku ke, raú kajrú wani jeraꞌaphana iꞌimaká rewá. Juni juwákaꞌala ke nephaka faraón ñakaré chojé, raꞌapiyatéjena, rijwaꞌatéjena, kele ñakaré chojé. Kajrú napichátaka nakaje rewá.
25 E kaja neꞌemakana wáꞌari piño Moisés, Aarón, kele maná. Rimá najló:
—Chuwa inocha ipirana nakiyana Tupánajlo maárejeja, unká jáchoꞌolajo maáreya.
26 Raú Moisés kemari rijló:
—Unká paala walaꞌakajla ilé ke, kaja maárowajena pechu wapirana, wenókarena Tupánajlo nakú: “Wachiꞌinárikana neká”, ke. Ñakele namákela wenoka maare wapirana nakiyana, neꞌekatajla kaꞌajná wewilá jipa aú. 27 Raú weꞌejnajé maáreya weji ke kala ketana jukaka desierto eꞌiyowá, rejo wenókaloje neká Tupánajlo, riwakáraꞌaka weꞌemaká ke.
28 Neꞌemakana kemari rijló:
—Nuyureje iꞌijnaká desierto chojé, eꞌiyonaja unká iꞌijnalaje yaꞌajnaje wani. Ipuraꞌó kaja Tupana waꞌaté nuchaya.
29 —Je —ke Moisés kemaká—. Nupaꞌajiko maáreya ejomi, nupuraꞌajó Tupana waꞌaté, raꞌapátakaloje muní jeraꞌaphana maáreya penaje. ¡Pa!, pipajlájika piño wajwaꞌaté.