—Piꞌijná, pimíchachi piño rijló nunaku: “Tupana, Paminá wani riká, kaphí hebréona pechu iꞌimakare chojé, kemari pinaku, piyuríkaloje rileꞌejena inaꞌukena jáchoꞌoko maáreya, neꞌejnakáloje aꞌajná ñoꞌojó, nalaꞌakáloje puꞌují napéchuwa rijló rejo penaje. 2 Unkájika ee piyurí náchoꞌoko maáreya, 3 riwakáraꞌaje pipiránajlo nayaripune, nalaꞌakóloje natámina wani raú penaje. Raú kajrú napirana takaꞌatájiko rinaku: nakawarútena, nematena pirakana, ovéjana, kele. 4 Eyá Israel lakénami pirana, unká meke nalaꞌalajo, unká napirana nakiyana takaꞌalaje”, ke pimájika faraonjlo. 5 Ilé numíchaka ke nulaꞌajika muní —ke Tupana kemaká Moisesjlo.

6 Muní ke Tupana laꞌaká rimaká ke. Piyukeja Egipto eyájena pirana takaꞌatako, eyá Israel lakénami pirana iꞌimaño manaꞌija, unká pajluwaja ñani nanakiyana takaꞌalá.

7 Raú faraón wakáraꞌari neꞌejnaká Israel lakénami pirana amaje, amaño manaꞌija neꞌemaká, unká nanakiyana takaꞌalá. Ilé ke faraón jemaꞌaká nayukuna, eꞌiyonaja unká remaꞌalá naꞌapiyá, unká riyurila Israel lakénami jáchoꞌoko reyá.

8 Rejomi Tupana kemari piño Moisesjlo, Aaronjlo waꞌaté:

—Ijñaꞌá paꞌilá puꞌutheno waja ikápojo, eyá piká, Moisés, kaꞌajeri riká pikápiyo yenoje faraón jimaje. 9 Riká paꞌilá jewíñaꞌajero muꞌupé penaje, ritamákaꞌatakoloje piyuke Egipto teꞌeré eꞌiyowá penaje. Riká muꞌupé keñoꞌótajeri naphú ke nanapona nakuwá, rinótakaloje piyukeja wani rewá iꞌimakaño, napirana waꞌató —ke Tupana kemaká najló.

10 Raú najñaꞌá nakápojo paꞌilá, kéchami neꞌejnaká faraón chaje. Nephaka rejo ee, Moisés kaꞌarí paꞌilá rikápiyo yenoje. Rejéchami naphú keñoꞌótako piyukeja rewájena inaꞌukena nakuwá, ñaké kaja napirana nakuwá. 11 Ñaké kaja rewájena mariꞌichuna tajnájiko ilé yaripu nakú, raú unká meke laꞌajé neꞌejnaké Moisés chaje, namájikale chapú kaje yajwé. 12 Unká Tupana apiyákala faraón pechu; riyurí rilaꞌaká ripechu nakú riꞌimaká ke. Raú unká faraón aꞌaké rinakojó Moisés, Aarón, kele purákaꞌalo. Tupana kemaká Moisesjlo rinaku iꞌimaká ke rilaꞌaká.

13 Eyá Tupana kemari Moisesjlo, riꞌijnakáloje piño faraón waꞌaté puraꞌajó, rimá rijló:

—Muní lapiwá papoje, piꞌijnakáloje lapiyami faraón chaje. Marí ke pimájika rijló nunaku: “Paminá wani riká, hebréona pechu iꞌimakare chojé kaphí, kemari pinaku, piyuríkaloje rileꞌejena inaꞌukena jáchoꞌoko maáreya, neꞌejnakáloje aꞌajná ñoꞌojó, nalaꞌakáloje puꞌují napéchuwa rijló rejo penaje. 14 Chuwaka riwakáraꞌajika chapú kaje wani pichaje, paꞌapiyatéjena, pijwaꞌatéjena, kele chaje, piweꞌepíkaloje raú unká na apú iꞌimalá riká ke kaja marí ejaꞌawá chu. 15 Riwátakela, rikapichátajla piká, pijwaꞌatéjena waꞌaté, rejeja nakapichákoloje penaje. 16 Eꞌiyonaja riyurí piꞌimaká re joꞌó kaja, pamákaloje nakaje rilaꞌajíkare marí teꞌerí nakú penaje. Nakaje rilaꞌajíkare aú piyukeja inaꞌukena marí ejaꞌawá chu iꞌimakaño jemaꞌajeño riyukuna. 17 Pamaje nakaje rilaꞌajíkare, eꞌiyonaja ñakeja pilaꞌajika rileꞌejena inaꞌukena chapú, unká piyurílaje náchoꞌoko maáreya. 18 Ñakele muní, meꞌetení kecha, riwakáraꞌajika juni takaꞌátakanami jaꞌakó kaphí wani nachá; unká joꞌó raꞌaló ñaké maare Egipto teꞌeré nakuwá. 19 Ñakele piwakáraꞌaje napitaká nanane palá nakaꞌapé jaꞌapiwá, ñaké kaja nematena, napirana, kajena iꞌimajika nakaꞌapé jaꞌapiwá. Juni takaꞌátakanami jaꞌajiko ee, unká ramálajo nachaje, rinótaje piyukeja wakaꞌapé iꞌimajíkaño raꞌajiko ketana”. Ilé ke piꞌimajika nunaku faraonjlo —ke Tupana kemaká Moisesjlo.

20 Raú neꞌejná riyukuna iꞌimajé faraonjlo, iphaño rejo, iꞌimaño rijló riyukuna Tupana wakáraꞌaka ke. Faraón jaꞌapiyatéjena nakiyana jemaꞌañó neꞌemaká Tupana kemakare nakú yukuna, raú nakeroꞌó. Ñakele nawakáraꞌa najwaꞌaté jápajeño mujlúkaꞌataka napirana nakaꞌapé jaꞌapejé. Rejomi nemá najló ñaké kaja, namujlúkaꞌakaloje nañakaré chojé penaje. 21 Eyá neꞌiyajena laꞌañó ripurákaꞌalo mapeja keja najluwa, raú nayurí mapeja napirana wakaꞌapó. Unká kaja nemalá najwaꞌaté jápajeñojlo, namujlúkaꞌakaloje nañakaré chojé penaje. 22 E kaja Tupana kemari Moisesjlo:

—Chuwa páchoꞌota paꞌanapitá yenoje, kajrú juni takaꞌátakanami jaꞌakóloje piyuke Egipto teꞌeré eꞌiyowá penaje, inaꞌuké, napirana, kamejérina, paijí, jimichi, kele chaje raꞌakóloje penaje —ke Tupana kemaká rijló.

23 Raú Moisés jáchoꞌotari raꞌanapitá yenoje, rejéchami Tupana wakáraꞌaka kajrú pichaní majákaꞌatako. Ñaké kaja rapíroꞌoka, kajrú kaja rimejé iꞌimaká, waꞌató ke kajrú juni takaꞌátakanami jaꞌakó piyuke Egipto teꞌeré ewá. 24 Riká juni takaꞌátakanami unká wani yurike jaꞌakajo, ñaké kaja pichaní apíroꞌojika. Unká wani Egipto eyájena amákeño rejé wani juni takaꞌátakanami jaꞌajíkono, riwakajé raꞌakó ke kaja. 25 Juni takaꞌátakanami kapichátari piyukeja wani Egipto eyájena nane, ñaké kaja rinótaka inaꞌuké, napirana, kajena waꞌató. Rapichata kaja paijí, jimichi, jema pirakana aꞌajné, kaje maká, aꞌawaná iꞌiché waꞌató. 26 Eyá Israel lakénami iꞌimaká ewá, unká juni takaꞌátakanami jaꞌaló. 27 Ilé kaje aú neꞌemakana faraón wakáraꞌari nemaká Moisesjlo, riꞌijnakáloje rejo Aarón waꞌaté penaje. Nephá rejo, e rimá najló:

—Nuweꞌepí puꞌuwaré nulaꞌaká. Unká ripechu keja kalé Tupana wajaka weká; wapachoja riwajá weká, nuleꞌejena inaꞌukena waꞌaté, puꞌuwaré laꞌajeñó weꞌemakale. 28 Kaja júpicha wani pichaní apíroꞌoka, ñaké kaja juni takaꞌátakanami jaꞌakó. Unká meke laꞌajé wajñaꞌalá marí kaje panaku, ñakele unká numaláraꞌatalaje iká maare. Iꞌijná, ipuriꞌichó Tupana waꞌaté wachaya, raꞌapátakaloje waliyá marí chapú kaje penaje. Rejomi nuyureje jáchoꞌoko maáreya, iꞌijnakáloje desierto chojé penaje —ke rimaká najló.

29 Raú Moisés kemari rijló:

—Chuwa nuꞌujichaka pajimila yámojo, rejé nuphájika ee, nóchoꞌotaje noꞌonapitá yenoje, e nupuraꞌajó Tupana waꞌaté. Raú unká juni takaꞌátakanami jaꞌalajo, unká kaja pichaní mejé iꞌimalaje, piweꞌepíkaloje raú piyuke ejaꞌawá minárikanaka Tupana. 30 Eꞌiyonaja nuweꞌepí unká joꞌó piká, paꞌapiyatéjena waꞌaté, iphálaño Tupana jaꞌapí.

33 E kaja Moisés jáchoꞌoro reyá, riꞌijná pajimila yámojo, re ripuraꞌó Tupana waꞌaté. Raú juni yurí jaꞌakajo, juni takaꞌátakanami waꞌaté, pichaní mejé manúmaꞌo kaja. 34 Neꞌemakana amaka aú juni ñaꞌatakó, unká kaja pichaní mejé iꞌimalá, raú rilaꞌá piño puꞌuwaré. Rijnúchaꞌo piño najló. Unká rikaja kalé núchaꞌaro, ñaké kaja raꞌapiyatéjena núchaꞌako. 35 Raú unká riyurila Israel lakénami jáchoꞌoko reyá. Tupana kemaká rinaku Moisesjlo iꞌimaká, ke rilaꞌaká piño raú.