—Chuwa piꞌijná piño faraón ejo rijwaꞌaté puraꞌajó. Unká nopiyákalaje ripechu, ñaké kaja raꞌapiyatéjena pechu; nuyureje nalaꞌaká napechu nakú riꞌimaká ke. Raú unká nayurílaje jáchoꞌoko maáreya, namákaloje meke laꞌajérika nuká. 2 Mékeka nulaꞌaká nomákaja Egipto eyájena yukuna piꞌimajé piyani, pilakena, kélejlo. Nakaje nukaja kalé laꞌakare yukuna piꞌimajé kaja najló, raú naweꞌepeje Paminá wani nuká —ke Tupana kemaká rijló.

3 Raú Moisés iꞌijnari piño Aarón waꞌaté faraón chaje, nemá rijló:

—Tupana, weká hebréona pechu iꞌimakare chojé kaphí, kemari pinaku: “¿Meketana júpika pilaꞌajika pikó weꞌepiri ke wani nojló? Piyurí nuleꞌejena inaꞌukena jáchoꞌoko maáreya, nalaꞌakáloje puꞌují napéchuwa nojló penaje. 4 Ñakeja pitájika ee napu, náchoꞌoko piyá maáreya, muní nuwakáraꞌaje kajrú majichíraꞌapana majó piteꞌeré nakojé. 5 Kajrú wani neꞌemajika, nanakojé unká teꞌerí jimá amálajo. Neká apíroꞌotajeño riká, wejapa nakaje paná yuríkaro, unká juni takaꞌátakanami apichátalare iꞌimaká. Aꞌawaná paná waꞌató napíroꞌotaje piyukeja. 6 Piñakaré, paꞌapiyatéjena, pijwaꞌatéjena, kele ñakaré chuwá neꞌemajé kaja kajrú. Unká ñaké iꞌimalá júpimi iꞌimaká”.

Ilé ke nemaká aú Moisés paꞌaró reyá. 7 Rejéchami faraón jaꞌapiyatéjena kemaká rijló:

—¿Mere ejená ilé inaꞌuké yureje walaꞌakana chapú? Weꞌemakana piká, ñakele wemá pijló: reja náchoꞌoroja maáreya, naliꞌicháreja puꞌují napéchuwa Tupana, napechu iꞌimakare chojé kaphijlo. Paminá wani riká. ¿Unká chi pamala kaja cha wanane kapichátako marí wateꞌeré nakiyá?

8 Raú faraón wáꞌari piño Moisés, Aarón, kele maná. E kaja nephá rinaku, rimá najló:

—Iꞌijná chuwa, ilaꞌakáloje puꞌují ipéchuwa Tupánajlo rejo penaje. Iꞌijnajika rejo yámona, nuwata imaká nojló mékajenaka iꞌijnajeño rejo.

9 Moisés kemari rijló:

—Piyukeja weꞌejnajika wayani waꞌató, wawáꞌaje kaja wapirana wajwaꞌató, keyajupa weꞌemakáloje pajwaꞌatéchaka rejo penaje.

10 Raú faraón kemari rijló:

—Puꞌuwaká wani nuweꞌepika mékeka iꞌijnataka ipéchuwa apú ke wani. ¿Meke chi ipechu inakuwá?: “Wajwaꞌaté ke Tupana iꞌijnajika, weꞌejnajika ejo ke kaꞌajná. Riyureje wáchoꞌoko maáreya wayani waꞌaté”, ¿ke chi ipechu nunaku? 11 Unká nuyurílaje jáchoꞌoko iyani waꞌaté. Iká, achiñana pheñawilánaja kalé iꞌijnajeño, ilaꞌakáloje ipéchuwa puꞌují Tupánajlo rejo. Kaja iwata ñaké laꞌakana —ke faraón kemaká rijló.

Rejomi riwakáraꞌa náchoꞌotakana rawaꞌayá, 12 rejéchami Tupana kemaká Moisesjlo:

—Chuwa páchoꞌota paꞌanapitá yenoje, Egipto teꞌeré chaje, majichíraꞌapana witúkaꞌakaloje penaje, natajátakaloje nakaje paná, unká juni takaꞌátakanami nótalare iꞌimaká.

13 Raú Moisés jáchoꞌotari raꞌanapitá yenoje, Egipto teꞌeré chaje, rejéchami Tupana wakáraꞌaka karená aphoꞌoká kamú jeñoꞌoká ejo pumitá. Karená aphoꞌorí weꞌechú, eyá lapí ketana, e lapiyami karená eꞌiyowá kajrú majichíraꞌapana witúkaꞌaka. Nawitúkaꞌa teꞌerí eꞌiyajé piyuke nateꞌeré eꞌiyowá. 14 Unká namala júpimi majichíraꞌapana ñaké iꞌimaká. 15 Nanakojé unká meke laꞌajé iná amala teꞌerí jimá, kajrú wani neꞌemakale. Unká ipureni iꞌimalá aꞌawaná iꞌiché nakuwá iꞌimaká, napíroꞌotakale ripaná piyukeja wani richa waꞌató yuríkaro iꞌimaká, juni takaꞌátakanami jaꞌakó iꞌimaká ejomi. Unká na ipureni kaje amalo aꞌawaná iꞌiché nakuwá Egipto teꞌeré nakuwá.

16 Ilé kaje aú neꞌemakana wáꞌari piño Moisés, Aarón waꞌaté maná, rimá najló:

—Unká paala nulaꞌaká Tupánajlo, ipechu iꞌimakare chojé kaphí, ñaké kaja nulaꞌaká puꞌuwaré ijló. 17 Pamó nuchaje, pipuraꞌó kaja Tupana waꞌaté nuchaya, riwajaka piyá nuká takaꞌakaje aú.

18 Raú Moisés jáchoꞌoro faraón ñakaré chiyá, rejomi ripuraꞌó Tupana waꞌaté. 19 E Tupana wakáraꞌari karená aphoꞌoká kaphí wani kamú jaꞌakó ejo pumitá. Riká ñaꞌarí majichíraꞌapana rijwaꞌató, ají ke juni jalomi kerálani jakojé. Rejomi unká majichíraꞌapana iꞌimalá rewá, unká pajluwaja ñani yurilo Egipto teꞌeré nakuwá. 20 Eꞌiyonaja unká Tupana apiyákala faraón pechu; riyurí rilaꞌaká ripechu nakú riꞌimaká ke. Ñakele unká riyurila náchoꞌoko reyá.

21 E kaja Tupana kemari Moisesjlo:

—Chuwa páchoꞌota paꞌanapitá yenoje, kalajeruni wani iꞌimakáloje Egipto teꞌeré ewá penaje.

22 Moisés laꞌarí rimaká rijló ke, raú kalajeruni iꞌimari Egipto teꞌeré ewá. 23 Weji ke kala ketana kalajeruni wani iꞌimaká. Ketana unká náchoꞌolo nañakaré chiyá, unká kaja namake pekowáaka. Eyá Israel lakénami iꞌimaká ewá unká kalajeruni iꞌimalá, mejámaꞌatanija rewá iꞌimajika. 24 E kaja neꞌemakana wáꞌari piño Moisés maná; e kaja riphá piño rinaku, rimá rijló:

—Chuwa jáchoꞌo, ilaꞌakáloje ipéchuwa puꞌují Tupánajlo penaje. Iwáꞌaje kaja iyani ijwaꞌató. Eyá ipirana, jematena pirakana, ileꞌejena ovéjana, kajena kalé unká iwáꞌalaje ijwaꞌató —ke rimaká rijló.

25 Raú Moisés kemari rijló:

—Unká pimaká ke kalé riꞌimajika, piká paja aꞌajeri wajló pipirana nakiyana, wenókaloje neká Tupánajlo penaje. 26 Eyá najwaꞌaté wawáꞌataje wapirana piyukeja wajwaꞌató, unká pajluwaja nakiyana yurílajo maare. Meꞌetení unká waweꞌepila mékajenaka wajñaꞌajé neꞌiyayá, wenókaloje neká Tupánajlo penaje.

27 Unká Tupana apiyákala faraón pechu, riyurí rilaꞌaká ripechu nakú riꞌimaká ke. Raú ñaké rilaꞌaká neká, unká riyurila neꞌejnaká reyá. 28 Rejéchami rimaká Moisesjlo:

—Chuwa ta páchoꞌo maáreya, unká kalé nuwátala pipaꞌakó ta piño majó nomaje. Pipaꞌajiko ee piño majó, nenoje kaꞌajná piká ta.

29 —Ñaké riká, unká nupaꞌalajo piño majó —ke Moisés kemaká rijló.