—Re joꞌó kaja nuwakáraꞌajika piño apú chapú kaje Egipto eyájenajlo kaja penaje, raú faraón yureje jáchoꞌoko maáreya. Kaphí riwakáraꞌajika jáchoꞌoko riteꞌeré nakiyá. 2 Ñakele pimaje piyuke Israel lakénamijlo, nakejáꞌakaloje nakaje oro nakiyá laꞌakanami, plata nakiyá laꞌakanami, kaje maká, Egipto eyájena liyá —ke rimaká rijló.

3 Riwakajé, Tupana palamane Egipto eyájena iꞌimakeño palájneꞌekena wani Israel lakénami waꞌaté. Palá kaja faraón jaꞌapiyatéjena pechu iꞌimajika Moisés nakú, ñaké kaja rewájena pechu iꞌimajika rinaku: “Ajopana cháꞌatajeri riká”, ke.

4 E Moisés iꞌijnari piño neꞌemakana chaje, rimá rijló:

—Marí ke Tupana kemaká nojló inaku: “Lapí jenaji ke noꞌopaje piyuke Egipto teꞌeré eꞌiyowá, 5 raú piyukeja Egipto eyájena yaní, pheꞌenájina iꞌimajíkaño, takaꞌatájeño. Piꞌirí, pheꞌejrí takaꞌajeri kaja najwaꞌaté. Ñakele piyuke pijwaꞌatéjena yaní pheꞌenájina takaꞌatájeño, ipirana yaní, mothoꞌoñó paineko iꞌimaká waꞌató takaꞌatájeño. 6 Piyuke Egipto eyájena awíyoꞌojeño, namájikale chapú kaje yajwé. Unká namala riyajwé ñaké júpimi iꞌimaká. Unká kaja namálaje piño ñaké riyajwé reyá aꞌajná ñoꞌojó”, ke Tupana kemaká pinaku —ke Moisés kemaká rijló. E rimá piño rijló:

7 —Eyá weká, Israel lakénami nakiyana, unká na takaꞌalaje. Wapirana nakiyana, unká kaja takaꞌalájeño, raú iweꞌepeje unká rejenowaja kalé weká Tupánajlo. 8 Marí ke natakaꞌatájiko aú, paꞌapiyatéjena iꞌijnajeño nuchaje. Neꞌerúpachi aú natáraꞌajo nujimaje, rejéchami nemájika nojló: “Piꞌijná maáreya chuwa, piyukeja pijwaꞌatéjena waꞌaté”, ke. Unkájika ee nemá nojló ilé ke, unká nóchoꞌolajo maáreya —ke rimaká rijló.

Rejéchami kaja wani Moisés yúchaꞌako, riká penaje raꞌapáñaaka faraón. 9 Rejomi Tupana kemari Moisesjlo:

—Nuweꞌepí unká wani faraón aꞌalá rinakojó pipurákaꞌalo, nulaꞌakáloje piño chuwa nakaje nukaja kalé weꞌepíkare laꞌakana.

10 Apú wakajé, apú wakajé ke, kajrú Moisés laꞌajika Aarón waꞌaté nakaje unká meke laꞌajé ajopana laꞌalare kaje faraonjlo, Tupana aꞌajíkale nañathé. Eꞌiyonaja unká wani riyurike náchoꞌoko reyá, unká kaja Tupana apiyákala ripechu, rilaꞌakáloje ripechu nakú riꞌimaká keja penaje.