2 —Marí keri iꞌimajeri ijló apú keri chaje palaka, wajé jarechí keñoꞌokole ijló.

3 Imaje Israel lakénami kañakaréruna iꞌimakáñojlo, nawáꞌakaloje oveja iꞌirí nañakaré chojé, marí keri lapaꞌatájiko iyamá théꞌela kele nakojé wakajé. Piyukeja kañakaréruna kewá wáꞌajika nañakaré chojé pajluwa oveja iꞌirí kaꞌajná, pajluwa kawayá pirakana iꞌirí kaꞌajná. 5 Ñakele nawáꞌajika riká piyá, namaje palá riká. Palárunaja nawáꞌaje neꞌiyayá, unká nawáꞌalaje naphú iꞌimajíkarena nakú. Pajluwa jarechí cha iꞌimakare rimothoꞌoká ejomi, nawáꞌaje neꞌiyayá. Achiñana waja nakulaje neꞌiyayá. Oveja kaꞌajná, kawayá pirakana kaꞌajná, nekaja kalé nawáꞌaje neꞌiyayá. 6 Ilamáꞌataje neká marí keri catorce wakajé ejená, riwakajé laínchu nenókana jená iꞌimajé. 7 Rejomi eꞌejataje nérami aú iñakaré numaná iyamá pumitanó, yenojo pumitá waꞌató. 8 Riwakajé lapí ajñaje neꞌimi jeꞌemákejami. Lupúraꞌajma kaje ipijini, pan mamúraꞌatakanaru waꞌaté, ajñaje riká. 9 Ñakele riwakajé unká ajñálaje riꞌimi kajmuni; unká kaja ajñálaje riká mothoꞌokéjami, jeꞌemákejamija kalé ajñaje. 10 Eyá jeꞌemákejami lupemí yuríjiko ee, unká iyurílaje riká muní kejlo penaje. Piyukeja ikupátajika riká jiyá chojé. 11 Riwakajé lapí palá ilamáꞌatajiko: aꞌajé inakuwá aꞌarumaká, jiꞌimaꞌulá waꞌaté, iꞌimakáloje lamáꞌatakejami ke penaje. Ijñaꞌajé kaja ikutiware ikápojo, rejomi ajñaje kiñaja riꞌimi. Iphákale noꞌopí, ajñaje riká, nuꞌumatájikale iká kapichákajo liyá riwakajé. 12 Riwakajé lapí noꞌopaje piyuke Egipto teꞌeré nakuwá, nukapichátakaloje rewájena liyá nayani pheꞌenájina penaje. Ñaké kaja nukapichátajika napirana, paineko mothoꞌokaño iꞌimaká, raú nuwajaje piyukeja nachiꞌinárikana ke iꞌimakaño najló. Nuká Tupana kemakale rinaku, ñakeja riꞌimajika najló —ke rimaká najló.

13 Rimá kaja:

—Ñakele ovéjana írami, eꞌejatájikare aú iñakaré numaná, iꞌimajeri nojló rená aꞌakaná ke. Riká nomájika aú, unká nukapichátalaje pheꞌenájina pají chu iꞌimajíkaño. 14 Marí weꞌechú kaꞌalá unká ipechu kapicháñaalaje iꞌimajika, ñakele riwakajé jarechí keja ajñájikano aꞌajnewá pajwaꞌatéchaka, ipechu iꞌimakáloje puꞌují nunaku riwakajé penaje. Ilaꞌajé riká ñaké, nuwakáraꞌakale rilaꞌakana. Ilaꞌajika riká, ke kaja iwakáraꞌajika iyani laꞌaká riká riwakajé —ke Tupana kemaká Moisés, Aarón, kélejlo.

21-24 Resumen: Ilé kaje aú Moisés awakátari Israel lakénami wakáraꞌajeño, raꞌapátakaloje najló Tupana kemakare nakú rijló iꞌimaká yukuna. Riꞌimá najló riyukuna piyukeja, rejomi naꞌapátakaloje riyukuna najwaꞌatéjenajlo penaje. 25 Rimá piño najló:

—Iphájikaja teꞌerí Tupana arukákare ijló iꞌimaká ejo wakajé, ñakeja kaja ilaꞌajika riká jarechí keja. 26 Ilé ke ilaꞌajika wakajé, kaꞌajná iyani kemájeño ijló: “¿Na penaje chi wenono oveja iꞌirí marí wakajé jarechí keja?”, ke. 27 Raú imaje najló: “Wephaka Tupana jaꞌapí aú, wenono rijló wapirana nakiyana marí weꞌechú kaꞌalá wakajé keja, riwakajé ke Tupana kapichátakale Egipto eyájena nakiyana iꞌimaká. Eyá wekáꞌana, unká rikapichátala najwaꞌaté iꞌimaká; riꞌimatá wejena kapichákajo liyá”, ke imájika najló —ke Moisés kemaká Israel lakénami wakáraꞌajeñojlo.

Ilé ke rimaká aú najlámaꞌo, palá napechu iꞌimakale Tupana nakú. 28 Rejomi neꞌejná, nalaꞌakáloje piyuke nakaje Tupana kemakare nanaku Moisés, Aarón, kélejlo iꞌimaká.

29 E kaja riká, Tupana kemakare nakú najló iꞌimaká, iphari rená chojé. E riwakajé lapí jenaji ke Tupana kapichátari piyuke Egipto eyájena liyá nayani, pheꞌenájina ke iꞌimakaño, napirana yaní paineko mothoꞌokaño iꞌimaká waꞌató. Neꞌemakana faraón iꞌirí pheꞌejrí takaꞌarí kaja najwaꞌaté. Inaꞌuké wajákelana chu iꞌimakaño, pheꞌenájina, takaꞌañó kaja; piyuke inaꞌuké yaní, pheꞌenájina ke iꞌimakaño, takaꞌatako rewá. 30 Raú neꞌemakana apori lapí, rijwaꞌatéjena waꞌaté. Kajrú neyaka mejé iꞌimaká rewá: apú ñakaré chuwá, apú ñakaré chuwá ke, neyaka nayani michuna. 31 Raú riká lapija neꞌemakana wáꞌari Moisés, Aarón, kele maná, rimá najló:

—Chuwá ta iꞌijná maáreya. Unká nuwátala iꞌimaká maárowa, nuleꞌejena inaꞌukena waꞌaté pajñakani. Chuwa iliꞌichá ipéchuwa puꞌují Tupánajlo, waꞌajini wani imájikare nakú nojló iꞌimajika ke. 32 Iwáꞌata kaja ijwaꞌató ipirana piyukeja: ovéjana, jémana pirakana, kajena. Iwátaka ke iwáꞌatajika neká, iꞌijná chuwaka. Eko ipuraꞌó kaja Tupana waꞌaté nunaku —ke faraón kemaká najló.

33 Raú napaꞌó reyá, náchoꞌokoloje reyá penaje. Rejéchami Egipto eyájena aꞌaká Israel lakénami ñathé nanane lamáꞌatakana aú, náchoꞌokoloje reyá kiñaja penaje, napechu iꞌimakale: “Piyukeja weká kapichájeño, nayuríjiko ee maare wajwaꞌaté”, ke. 34 E Israel lakénami lamáꞌataño najluwa ituꞌurú kaje. Naꞌarumaká chojé nepoꞌotá riká najluwa, rejomi najñaꞌá riká najwaꞌató, najñákaloje riká iñeꞌepú chuwá penaje. 35 Náchoꞌoko reyá yámona, nakejaꞌa Egipto eyájena liyá nakaje oro, sereni, kele nakiyá laꞌakanami, aꞌarumakaji, kaje maká. Júpimi Moisés kemaká najló iꞌimaká, ke nalaꞌaká. 36 Tupana laꞌarí Egipto eyájena pechu palá, raú wechi naꞌaká Israel lakénamijlo nakaje nakejáꞌakare naliyá.

37 Rejomi náchoꞌo reyá. Pajimila Ramsés eyá náchoꞌo, ají ke apú pajimila Sucot ejo. Íkiꞌiruna wani neꞌemaká: achiñana waja iꞌimaño seiscientos mil, chaje wani neꞌemaká piyuke inaana, eyá nayani, kele waꞌaté. Kajrú kaja napirana: ovéjana, jémana pirakana, kajena iꞌimaká, neká nawáꞌata najwaꞌató piyukeja. 38 Náchoꞌoko reyá wakajé, keꞌiyapejena inaꞌuké nakiyana iꞌijnaño najwaꞌaté. Kajrú napirana iꞌimaká nawáꞌatakarena najwaꞌató. 39 Tuꞌujné wani náchoꞌoko reyá iꞌimaká, Egipto eyájena kaꞌakale neká reyá. Ñakele unká weꞌechú kaꞌalá iꞌimalá najló, nalaꞌakáloje naꞌajnewá penaje. Raú kalé nalaꞌá pan, kujnú ke, unkale ramúraꞌatajona iꞌimalá reꞌiyá.

40 Júpija wani Israel lakénami iꞌimaká Egipto teꞌeré nakú iꞌimaká. Nephátaka cuatrocientos treinta jarechí wakajé, náchoꞌo reyá iꞌimaká.