24
Kaja Balaam weꞌepí unká wani Tupana wátala riyerúkaꞌaka Israel lakénami chaje. Kaja riweꞌepí Tupana wátaka palá ripuraꞌakó nanaku, raú unká riꞌijnalá rijwaꞌaté puraꞌajó rilaꞌajíkano ke. Ipuré jiꞌiwátaya riyakaꞌo nachaje. 2 Reyá ramá kajrú wani napajré iꞌimaká desierto chuwá. Maárejechami Tupana Pechu jaꞌakó rinakojé, rimakáloje nanaku Tupana wakáraꞌaka riꞌimaká ke penaje. 3 Marí ke Balaam kemaká:“Nuliyá marí purákaꞌaloji, Beor iꞌirimi nuká.
4 Nuká jemaꞌarí palá Tupana purákaꞌalo, rimakare nakú nojló.
Iná tapúnaꞌaka keja nomaka Tupana liyá nakaje.
Piyukeja nakaje laꞌajeri wani riká.
5 Palá wani Israel lakénami pajré amako nojló.
6 Nakaje iná ejátakare paꞌapejéchaka tawáꞌako pajñakani, ke ramako nojló.
7 Ñóꞌope juni iꞌimajika najló, neꞌerakáloje penaje,
ñaké kaja najlámaꞌakaloje nakaje nejátajikare jiꞌilawa penaje.
Ajopana iꞌimakana Agag weꞌepika nakaje nakojé,
chaje wani neꞌemakana weꞌepíjika.
Kajrú wani rijwaꞌatéjena iꞌimajika.
8 Tupana jáchoꞌotari neꞌemaká Egipto teꞌeré eyá iꞌimaká.
Riká aꞌarí nañathé ajopana napinana cháꞌatakana aú.
Íkiꞌija wani nacháꞌatajika chapú nanaku péchuruna.
9 Yawi watánaꞌakachu kawiripe eꞌiyá, unká na kalé kawílaꞌari rinaku.
Ñaké kaja rijwaꞌatéjena iꞌimajika manaꞌija.
Chapú Tupana laꞌajika neká, laꞌajeño neká chapú.
Eyá laꞌajeño neká palá, ñaké kaja rilaꞌajika neká palá”,
ke rimaká Balacjlo.
10 Ilé kaje aú Balac yúchaꞌaro íkiꞌija Balaam cha. Raú riñaꞌatá rikápiwa, e rimá rijló:
—Numicha pijló iꞌimichaka, piyerúkaꞌakaloje nachaje, eꞌiyonaja kalé kaja weji ke pecha pipuraꞌakó nanaku palá. 11 Ñakele pipaꞌó ta chuwa piñakaré ejo. Numá pijló iꞌimaká: Kajrú noꞌojika pijló nakaje, piyerúkaꞌajika ee nojló nachaje ke, eꞌiyonaja Tupana itá piliyá rapu.
12 Raú Balaam kemari rijló:
—Kaja numá paꞌapiyatéjenajlo marí ke iꞌimaká: 13 Ewá kalé aꞌakajla nojló nakaje kajrú wani wemiri iñakaré chiyá, eꞌiyonaja unká méñoꞌojo nulaꞌalajla nakaje nupechu keja apoꞌojó, Tupana wátaka liyá. Unká meke laꞌajé nulaꞌalajla palá ajopana nakú; unká kaja meke laꞌajé nulaꞌalajla chapú ajopana nupechu keja, Tupana wakáraꞌaka nulaꞌaká nakaje ke laꞌajerí nuꞌumakale. Ñakele nakaje rimakare nakuja kalé nulaꞌá. 14 Ñaké riká, chuwaka nupiꞌichako. Paineko nuwata meke nacháꞌatajika iká yukuna iꞌimakana pijló —ke rimaká rijló.
15-24 E rimá Balacjlo nakaje Tupana kemakare nakú rijló nakú. Rimá Israel lakénami nakú:
“Palá neꞌemajika akijñojo.
Nañathé aꞌajeri Tupana iꞌimakale, nacháꞌataje iká.
Ñaké kaja nacháꞌatajika Edom eyájena, Amalec nakiyana waꞌaté”.
25 Ilé ke Balaam kemaká ejomi, ripaꞌó riteꞌeré ejo. Balac paꞌaró kaja rilanakiya rijwaꞌatéjena ejo.