2 Kaja unká juni iꞌimaké rewá najló, neꞌerakáloje penaje, raú nawakó Moisés, Aarón, kele jimaje, nakhaꞌakáloje neká richona penaje. 3 Nemá Moisesjlo:

—Palani Tupana kapichátakajla weꞌemaká, rikapichátaka wanakiyana michuna iꞌimaká wakajé. 4 ¿Na penaje iwaꞌa weꞌemaká majó marí desierto ta chojé iꞌimaká? ¿Iwata kaꞌajná watakaꞌatako maárowa piyukeja wapirana waꞌaté? 5 ¿Na penaje chi jáchoꞌota weꞌemaká Egipto teꞌeré eyá iꞌimaká, iwáꞌakaloje weká majó puꞌuwaré nojé wani teꞌerí ta ejo? Unká wani meke laꞌajé iná ejátala nakaje icha ijí maárowa, ñakele unká aꞌawaná icha iꞌimalá wajló maare, unká kaja juni ta iꞌimalá wajló, weꞌerakáloje penaje.

6 Raú Moisés jáchoꞌoro Aarón waꞌaté naliyá, iꞌijnaño ají ke Tupana ñakaré, ripuraꞌakárono chu najwaꞌaté ejo. Re najlámaꞌo teꞌerí jimaje, rejéchami Tupana yaꞌatakó piño najló mejámaꞌatani kaje eꞌiyowá. 7 E rimá Moisesjlo:

8 —Pijñaꞌá pikutiware, eyá peꞌewé Aarón aꞌajeri piñathé, awakátakaloje piyuke inaꞌukena. Nawakájiko piyukeja ejomi, pitáraꞌajo najimaje, rejéchami pimájika jípajlo, juni jeñoꞌokáloje reꞌiyayá penaje. Raú pamaje juni jeñoꞌoká reꞌiyayá, iꞌirakáloje penaje. Piyukeja inaꞌukena, napirana waꞌató, iꞌirajeño juni jeñoꞌojíkare reꞌiyayá nakiyana —ke Tupana kemaká rijló.

9 E Moisés ñaꞌarí rikutiware, Tupana jimaje iꞌimakare, rilaꞌakáloje Tupana kemaká rijló iꞌimaká ke. 10 Rejomi Moisés, Aarón waꞌaté, awakátaño piyuke inaꞌukena jipa awaꞌajé, e Moisés kemari najló:

—Jemaꞌá, unká wani jemaꞌalá Tupana jaꞌapiyá. ¿E iwátaka wawakáraꞌaka juni jeñoꞌoká marí jipa eꞌiyayá ijló, iꞌirakáloje rinakiyana penaje?

11 Ilé ke rimaká ee, ráchoꞌota raꞌanapitá, e riꞌiká jipa wilá iyaampe rikutiware aú, raú kajrú juni jeñoꞌoká reꞌiyayá. Raú naꞌó riꞌirajé, piyuke napirana waꞌaté. 12 Eꞌiyonaja unkale Moisés, Aarón waꞌaté, laꞌalá Tupana kemaká najló iꞌimaká ke, Tupana kemari najló:

—Unká ipechu iꞌimalacha kaphí nochojé, ilaꞌakáloje nuwakáriꞌichaka iꞌimichaka ke penaje; unká kaja iphálacha noꞌopí mariruna inaꞌukena jimaje. Ilé ke iliꞌichaka pachá unká iphálaje teꞌerí, norukákare ijló iꞌimaká ejo mariruna inaꞌukena waꞌaté.

13 Riká muthú ií iꞌimari Meribá. Re Israel lakénami puraꞌátaño Tupánajlo juni, unkale riꞌimalá najló. Re kaja Tupana yaꞌatá rikó najló, naweꞌepíkaloje raú palá meke laꞌajérika riká, palá wani laꞌajeri, unkale riweꞌepila puꞌuwaré laꞌakaná.

14 Cadés teꞌeré eyá iꞌimajemi, Moisés wakáraꞌari rijwaꞌatéjena nakiyana iꞌijnaká Edom teꞌeré ejo neꞌemakana waꞌaté puraꞌajó. Nemá rijló:

15 —Júpimi waꞌajútaya michuna iꞌijnaño Egipto teꞌeré ejo iꞌimaká. Re neꞌemá júpija, eꞌiyonaja chapú reyájena laꞌajika neká iꞌimajika. Ñaké kaja nalaꞌajika wachiꞌiná michuna iꞌimajika. 16 Mawó napuraꞌajiko Tupana waꞌaté iꞌimajika. Kaja ewaja remaꞌá naꞌapiyá, ñakele riwakáraꞌa rijwaꞌateje, jeꞌechú chiyaje, ráchoꞌotakaloje neká reyá penaje. Eyá meꞌetení weká nalakénami penájena maare Cadés, piteꞌeré tajákaꞌalo e. 17 Ñakele wemá pijló: ¿E kaꞌajná piyuríkajla waꞌapaka piteꞌeré eꞌiyowá? Unká waꞌapálaje pijwaꞌatéjena mená eꞌiyowá; unká kaja weꞌeralaje juni naleꞌejé juni jamoꞌokelana chiyá, waꞌapaje iñeꞌepú chiꞌitaje chuwaja kalé. Puꞌukuja waꞌapájika iteꞌeré eꞌiyowá, unká méreje watajnálajo —ke naꞌapátaka rijló riyukuna.

18 Eꞌiyonaja neꞌemakana kemari najló:

—Unká wani ta nuwátala jaꞌapaka wateꞌeré eꞌiyowá. Eyá unkájika ee jemaꞌá numíchaje nakú ijló jaꞌapiyá, nuwakáraꞌaje nuleꞌejena suráana ichaje, naꞌapákaloje inaku penaje.

19 Raú nemá piño rijló rikaja kaja nakú:

—Iñeꞌepú chiꞌitaje chuwaja kalé wawata jaꞌapákana. Eyá weká, wapirana kaꞌajná, iꞌirajika juni inakiyana leꞌejé jamoꞌokelana chiyá ee, waꞌajé najló riwemí. Wawata puꞌukuja jaꞌapákana iteꞌeré eꞌiyowá. Rikaja kalé wawata —ke nemaká rijló.

20 Eꞌiyonaja ñakeja kaja Edom kemaká piño:

—Unká wani ta jaꞌapálaje wateꞌeré eꞌiyowá.

Rejomi riꞌijná, rileꞌejena suráana waꞌaté, Israel lakénami iꞌimaká ejo, nenókakoloje najwaꞌaté penaje. Íkiꞌiruna rileꞌejena suráana iꞌimaká; kajrú kaja nalekare iꞌimaká nakapi. 21 Unká nayurila naꞌapaka nateꞌeré eꞌiyowá, raú Israel lakénami chipúkaꞌaño nateꞌeré nakojé apú iñeꞌepú chuwá.

22 Kaja piyuke Israel lakénami jáchoꞌoko Cadés teꞌeré eyá, neꞌejnakáloje ipuré Hor ejo penaje. 23 Rejé natajnó Edom teꞌeré awaꞌajé. Re Tupana puraꞌaró piño Moisés, eyá Aarón waꞌaté. Rimá Moisesjlo:

24 —Chuwaka Aarón takaꞌajika. Unká riꞌijnalaje teꞌerí norukákare ijló iꞌimaká ejo, unká pachá remaꞌalá noꞌopiyá pijwaꞌaté Meribá e iꞌimaká wakajé. 25 Ñakele piwáꞌaje pijwaꞌató Aarón, eyá riꞌirí Eleazar, ipuré Hor jiꞌiwátaje. 26 Rejo piphájika ee, pikaꞌajé rinakiyá raꞌarumaká ripuraꞌakárono chu nujwaꞌaté inaꞌukena chaya. Riká penájemi aꞌarumakaji paꞌajé riꞌirí Eleazar nakú. Rejé Aarón takaꞌajé ipuré jiꞌiwátaje.

27 E Moisés laꞌarí Tupana kemaká rijló ke. Piyuke Israel lakénami ijlú chuwá neꞌejrá ipuré jiꞌiwátaje. 28 Nephaka riꞌiwátaje ee, Moisés ñaꞌarí Aarón aꞌarumaká rinakiyá, rejomi raꞌapata riká riꞌirí Eleázarjlo, riyuríkoloje rapumí chojé Tupana waꞌaté puraꞌajero inaꞌukena chaya penaje. Rejé ipuré jiꞌiwátaje Aarón takaꞌarí. Rejomi Moisés, Eleazar waꞌaté, witúkaꞌaño ipuré jiꞌiwátaya. 29 Nephaka ajopana nakú ee, neꞌemá Aarón takaꞌaká yukuna najló. Nemaꞌaká aú riyukuna, nalaꞌá nawinano pajluwata keri ketana.