Neꞌiyajena wátaka Moisés jáchoꞌotakana nawakáraꞌajeri chiyá yukuna marí
16
E kaja apú wakajé pajluwa iꞌimari re, Leví michú lakénami nakiyana riꞌimaká. Rií iꞌimari Coré. Weji kele rijwákeꞌena iꞌimaká. Pajluwaja ií iꞌimari Datán, apú ií iꞌimari Abiram, eyá apú ií iꞌimari On. 2 Neká, eyá 250 Israel lakénami wakáraꞌajeño nakiyana waꞌaté, iꞌijnaño kaja nawakákoloje najwaꞌaté, napuraꞌakóloje Moisés jáchoꞌotakana nakú penaje. Neꞌiyajena aꞌañó inaꞌuké, neꞌejnatákaloje palá napéchuwa naꞌakáloje nawakáraꞌajeño ñathé. Kajrú inaꞌukena jemaꞌaká nayukuna, neká penájemina awakaño najwaꞌaté. 3 Kaja nawakó Moisés, eyá Aarón, kele nakojé, nemá najló:—Kaja ketánaja iꞌimajika wawakáraꞌajeño. Piyukeja weká maare, Tupana waꞌatéjena waja, eta ¿naje chi ilaꞌá inakuwá Tupana leꞌejena inaꞌukena wakáraꞌajeño ke wani?
4 Ilé ke nemaká aú, Moisés lámaꞌaro kawakaje teꞌerí eꞌiyajé, ripuraꞌakóloje Tupana waꞌaté penaje. Rejomi rimá Corejlo, rijwaꞌaté iphákañojlo waꞌaté:
5 —Muní lapiyami iká, Leví michú lakénami nakiyana unká wátalaño nuká, ijñaꞌajé ijwaꞌató ileꞌejé aꞌawaná iká káraꞌajona, ikáraꞌakaloje riká Tupánajlo. Tupana yaꞌatájeri wajló mékajenaka rijwaꞌatéjena, nekaja kalé káraꞌajeñojla aꞌawaná iká rijló.
12 Rejomi Moisés wakáraꞌari Datán wáꞌakana Abiram waꞌaté, eꞌiyonaja unká nawátala rejo iꞌijnakana, raú nemá najló:
13 —Unká wawátala richaje ta iꞌijnakana; riká ta jáchoꞌotari weꞌemaká Egipto teꞌeré eyá iꞌimaká. Rewá weꞌemaké palá, kajrú aꞌajnejí iꞌimajika wajló rewá iꞌimajika. Eyá riwaꞌa weká majó desierto chojé, watakaꞌakáloje maárowa penaje. Eyá meꞌetení riwata wawakáraꞌajeri ke wani iꞌimakana; 14 unká kaja riwáꞌala weꞌemaká palani teꞌerí ejo iꞌimaká; unká kaja raꞌalá wajló mená wamenawa penaje. Kaja riwata weꞌemaká mejluruna ke rijló, riwáꞌakaloje weká riwátaka ejo penaje. Unká weꞌejnalaje ramaje ta.
15 Ilé kaje aú Moisés yúchaꞌaro najwaꞌaté, rimá Tupánajlo:
—Nayáꞌatajika ee nakaje pijló altar nakojé, naꞌakáloje pijló riká penaje, pipechu iꞌimaniña rinaku palá. Unká na nukaꞌalá naliyá, unká kaja na aú nulaꞌalá neká chapú.
16 Rejomi Moisés kemari Corejlo:
17 —Muní najñaꞌajé najwaꞌató naleꞌejé aꞌawaná iká káraꞌajona, nakaꞌajé kaja richojé aꞌawaná iká. Doscientos cincuenta neká piyukeja. Eyá piká, Aarón waꞌaté, ñaꞌajeño kaja ijwaꞌató ileꞌejé aꞌawaná iká káraꞌajona, ikáraꞌakaloje riká pajñakani, ajopana waꞌaté Tupánajlo.
18 Raú piyukeja ñaꞌaká najwaꞌató naleꞌejé aꞌawaná iká káraꞌajona. Neꞌejnaká yámona, nakaꞌá richojé kerápela, aꞌawaná iká waꞌaté. Nephá Tupana ñakaré numanaje, rejé nayurí riká aꞌawaná iká Moisés, Aarón, kele awaꞌajé. 19 Rejé kaja Coré awakata ajopana Israel lakénami, nakaꞌakáloje neká nawakáraꞌajeño iꞌimakana chiyá penaje. Rejéchami Tupana yaꞌatakó najló, kajrú namaka mejámaꞌatani ke iphaka nanaku. Piyukeja re iꞌimakaño amaka riká. 20 Reꞌiyayá Tupana puraꞌaró Moisés, eyá Aarón, kele waꞌaté, rimá najló:
21 —¡Jaꞌapáñaa keleruna inaꞌukena aꞌajná ñoꞌojó, kiñaja nukapichátajika neká!
22 Raú Moisés lámaꞌaro teꞌerí jimaje, Aarón waꞌaté. E nemá Tupánajlo:
—Tupana, piyukeja inaꞌukénajlo kajmuchaji aꞌajeri piká. ¿Naje chi pikapichata mariruna inaꞌukena piyuchá akuwaná, pajluwaja inaꞌuké laꞌaká puꞌuwaré pachá?
23 Raú Tupana kemari rijló:
24 —Pimá piyukeja Israel lakénamijlo, natatákoloje Coré, Datán, eyá Abiram, kele iꞌimaká eyá.
25 Raú Moisés iꞌijnari raꞌapiyatéjena waꞌaté ají ke Datán, Abiram, kele pajré iꞌimaká ejo. 26 Riphaka rejo ee, rimá piyukeja nawaꞌá iꞌimakáñojlo:
—Jáchoꞌo mariruna pajré iꞌimaká eyá meꞌetení. Jáchoꞌo naliyá, puꞌuwaré wani laꞌajeñó neꞌemakale. Ijápaniña kaja nanane nakú, apala ikapichó najwaꞌaté, puꞌuwaré nalaꞌakare pachá.
27 Raú piyukeja Israel lakénami jáchoꞌoño Coré, Datán, eyá Abiram, kele iꞌimaká eyá. Re neꞌemá napajré numaná awaꞌá, piyukeja naluna, nayani, kele waꞌaté. 28 Rejomi Moisés kemari piño:
29 —Chuwa amájika nomaꞌaká wani Tupana jaꞌapiyá. Mariruna inaꞌukena takaꞌajika ee, pheñawilana takaꞌaká nená chuwá ke kaja, e iweꞌepeje nulaꞌaká nakaje nupechu keja. 30 Eyá natakaꞌajika ee nakaje Tupana laꞌajíkare, unká iná amálare kaje nakú aú, iweꞌepeje mariruna inaꞌukena iphaka naꞌapiwá Tupánajlo. Marí teꞌerí meꞌetájero paliyáaka nawaꞌayá, rajmíloꞌotakaloje neká piyukeja kajmúyaja, nanane waꞌató penaje. Raú iweꞌepeje nayúchaꞌataka Tupana, ilé ke nalaꞌakare aú.
31 Rejéchami teꞌerí meꞌetako paliyáaka nawaꞌayá. 32-33 Raú Coré, Datán, eyá Abiram, kele kapichaño jujwí ke kajmúyaja teꞌerí eꞌiyajé. Nayani, eyá naluna waꞌató, kapichaño kaja najwaꞌaté. Coré waꞌaté iꞌimakaño kapichaño kaja nanane waꞌató. Ilé ke nakapichako Israel lakénami eꞌiyayá. 34 Ajopana Israel lakénami, nawaꞌá iꞌimakaño, jemaꞌañó nawíyoꞌoka nakapichako aú. Raú náchoꞌo reyá jechoꞌokelo, nemá: “¡Pamata, teꞌerí ajmíloꞌotajika weká najwaꞌaté!” 35 Eyá keraꞌathani aú Tupana kapichata kaja doscientos cincuenta achiñana, káraꞌataño aꞌawaná iká najwaꞌaté iꞌimaká.