3 —¿Naje kaꞌajná Tupana waꞌa weꞌemaká majó, wakapichákoloje maárowa nókakajo nakú penaje? Nenótajika weká ejomi, kaꞌajná walúnami, eyá wayanimínami, kélejlo kaꞌajná nephaje ta naꞌapiwá. Palani kaꞌajná wapaꞌakojla piño meꞌetení Egipto ejo.

4 Nemá piño:

—Palani kaꞌajná waꞌaká apú wawakáraꞌajeri penaje, riká paꞌatákaloje piño weká Egipto teꞌeré ejo.

5 Ilé kaje aú Moisés, Aarón waꞌaté, lájmaꞌaño teꞌerí eꞌiyajé inaꞌuké jimaje. 6 E Josué, Caleb waꞌaté, nakejílaꞌajeño penájemina neꞌemaká, jiyoꞌotaño naꞌarumakawa, unká wani paala napurákaꞌalo iꞌimakale najló. 7 E nemá piyukeja Israel lakénamijlo:

—Riká teꞌerí weꞌemajé amaje iꞌimaká, palani wani riká. 8 Tupana laꞌajika ee wajló nakaje, raꞌajé wañathé, weꞌejnakáloje rejo penaje. Rejomi raꞌajé wajló riká palani teꞌerí, riꞌimakáloje wateꞌerewa penaje. Re ñóꞌope wani nakaje rewá. 9 Ilaꞌaniña apoꞌojó, nakaje Tupana wátaka ilaꞌaká liyá; ikeroꞌoniño kaja rewá iꞌimakaño piyá. Weká cháꞌatajeño neká, Tupana iꞌimakale wajwaꞌaté. Eyá najwaꞌaté, unká na iꞌimalá namejñátajeri penaje, ñakele ikeroꞌoniño napiyá —ke nemaká najló.

10 Eꞌiyonaja nayúchaꞌako akuwaná, Israel lakénami wátaño nachá jipa kaꞌakana. Rejéchami Tupana yaꞌatakó najló, manaꞌí chiyó namá kajrú mejámaꞌatani iꞌimaká juni juwákaꞌala, Tupana iꞌimakare eꞌiyá. Tupana ñakaré cha rakúwaꞌo, piyukeja Israel lakénami amaka riká. 11 E Tupana kemari Moisesjlo:

—Mariruna inaꞌukena laꞌañó nuká mapéjari keja najluwa. Kajrú nulaꞌajika najló nakaje nukaja kalé weꞌepíkare laꞌakana iꞌimajika, eꞌiyonaja napechu iꞌimá nunaku: “Unká riweꞌepila nakaje puwichani laꞌakana wajló”, ke 12 Chuwa nuwakáraꞌajika najló yaripu, rikapichátakaloje neká piyukeja marí teꞌerí nakiyá, nephaka piyá teꞌerí noꞌojíkare ijló ejo. Eyá pilakénami iꞌimajeño piño, nuleꞌejena inaꞌukena, kajrú napumí chojé. Neká iꞌimajeño kaja nacháꞌatajeño.

13 Eꞌiyonaja Moisés kemari piño Tupánajlo:

—Piweꞌepíkale piyukeja wani nakaje laꞌakana aú páchoꞌota mariruna inaꞌukena Egipto teꞌeré eyá iꞌimaká. Pikapichátakela chuwa neká, Egipto eyájena jemaꞌajla riyukuna. 14 Rejomi neꞌemajla riyukuna Canaán eyájenajlo, rewá piyukuna jemaꞌojla mékeka piꞌimaká wajwaꞌaté puꞌuwaká juni juwákaꞌala eꞌiyá weꞌechú watukumawa. Eyá lapí wamá puꞌuwaká piká wachá, kajrú keraꞌathani táraꞌako eꞌiyá. Kaja nemaꞌá riyukuna rewá, 15 ñakele pikapichátakela neká, piyukeja piyukuna jemaꞌajeño kemakajla pinaku: 16 “Unkale riweꞌepila mékeka nawáꞌakana teꞌerí, riꞌiwapakare najló iꞌimaká ejo aú rikapichata neꞌemaká piyukeja desierto chu”, ke nemakajla pinaku. 17 Ñakele chuwa pilaꞌá nakaje piweꞌepíkare laꞌakana, piyukeja laꞌajeri piꞌimakale. Raú pilaꞌajé chuwa wajló nakaje, pimaká wajló rinaku iꞌimaká ke. 18 Pimá kaja nojló pinakuwá iꞌimaká: “Unká nuyúchaꞌalo kiñaja inaꞌuké cha; nuwajwena wani inaꞌuké; unká wani nuyurílaje neká wátakana íkiꞌija. Nomó kaja inaꞌuké chaje, puꞌuwaré nalaꞌakare liyá, unká nemaꞌalá noꞌopiyá kaje liyá waꞌató. Eyá unká yurílajeño puꞌuwaré laꞌakaná naliyó, nuwajaje nayani, nalakénami waꞌató”, ke pimaká pinakuwá iꞌimaká. 19 Ñakele íkiꞌija wani piwátakale inaꞌuké, numá pijló meꞌetení: pamó piño nachaje. Kaja pulapecha pamako nachaje, wáchoꞌoko Egipto teꞌeré eyá iꞌimaká wakajé eyá maárejecha —ke Moisés kemaká Tupánajlo.

20 —Ñaké riká, nomajo nachaje pimíchakale nojló. 21 Eꞌiyonaja ilé ke nalaꞌaká pachá unká wani nephálaje teꞌerí, numakare nakú ijló iꞌimaká ejo. 22 Piyukeja namaka iꞌimaká mékeka nulaꞌaká kajrú nakaje Egipto teꞌeré e iꞌimaká, nóchoꞌotakaloje neká reyá penaje. Ñaké kaja nulaꞌaká nakaje, unká méñoꞌojo ajopana laꞌalare kaje, maare desierto eꞌiyowá. Ilé ke namaka nulaꞌaká, eꞌiyonaja unká wani nemaꞌalá noꞌopiyá. 23 Piyukeja, unká jemaꞌalájeño noꞌopiyá, unká iphálajeño teꞌerí, numájikare nakú nachiꞌinajlo ejo. Laꞌañó nuká mapéjari keja najluwa, kapichájeño maárowaja desierto eꞌiyowá. 24 Rikaja kalé Caleb, iꞌijnajeri rejo, apú ke péchuri riꞌimakale. Riká jemaꞌarí noꞌopiyá palá. 25 Ñakele muní piyukeja iꞌijnajika iyámojo juni jalomi Kerálani awaꞌajé —ke Tupana kemaká najló.

26 Rimá piño Moisés, eyá Aarón, kélejlo:

27 —¿Meketana júpika kaꞌajná nujñaꞌajika panaku mariruna inaꞌukena, puꞌuwaré wani laꞌajeñó? Kaja nomaꞌá mékeka napuraꞌakó puꞌuwaré wani nunaku. 28 Ñakele pimicha najló nakaje numakare nunakuwá: Nuká Tupana. Nakaje numájikare inaku meꞌetení, iꞌimajeri ñaké. Chuwa itakaꞌajika desierto chu, nomaꞌaká imaká iꞌimaká ke. 29 Ilapaꞌatájika piyukeja inaꞌukena wakajé, iyáꞌataje piyukeja neí papera kaje chojé. Veinte jarechí chajena iꞌimakaño ií iyáꞌataje kaja richojé. Neká waꞌató piyukeja kapichájeño marí desierto chu, ipuraꞌakole puꞌuwaré nunaku. 30 Eyá Caleb, Josué waꞌaté, nekaja kalé iꞌijnajeño rejo. Iká unká iphálajeño teꞌerí, norukákare ijló iꞌimaká ejo.

31 Eyá apoꞌojó nulaꞌajika iyanimínami, ipechu iꞌimakárena nakú: “Wapinana patajeño waliyá neká najluwa”, ke. Neká penájemina iphájeño teꞌerí, norukákare najló iꞌimaká ejo. Riká teꞌerí, ilaꞌakare puꞌuwaré ijluwa iꞌimaká, ejo nephaje, rewá neꞌemakáloje puꞌují napechu ke. 32 Eyá iká, nachiꞌiná aphinami pitájero makajmala maárowaja desierto chuwá. 33 Richuwá iyani chiraꞌajeño iyamá inaꞌukena leꞌejé kele jarechí ketana, puꞌuwaré ilaꞌakare pachá. 34 Canaán teꞌeré kejílaꞌajeño iꞌimaño rewá iyamá inaꞌukena leꞌejé ke kala ketana, namákaloje mékeka nakaje rewá penaje. Ñakele nuwajaje iká, iyamá inaꞌukena leꞌejé kele jarechí ketana. Pajluwa kala wemí noꞌojé ijló pajluwaja jarechí ketana, raú iweꞌepíkaloje mékeka nulaꞌaká laꞌañó apoꞌojó nuwátaka liyá. 35 Nakaje numíchaje inaku, iꞌimajeri numíchaka inaku keja. Maare desierto chu ikapichajo. Ilé ke pimájika najló —ke Tupana kemaká Moisesjlo.

39 E Moisés jaꞌapari reyá, iꞌijnari riyukuna iꞌimajé ajopana rijwaꞌatéjenajlo. E riphá rejo. Riꞌimá najló riyukuna, piyukeja napechu laꞌakó kamuꞌují raú. 40 E muní ke lapiyami, rijwaꞌatéjena nakiyana jáchoꞌoko ipuré rewá iꞌimakare jiꞌiwátaje. Nemá pajlokaka:

—Kaja maare weká, chuwa weꞌejnajika teꞌerí, Tupana kemakare nakú wajló iꞌimaká ejo. Kewaka, puꞌuwaré walaꞌaká Tupana.

41 Eꞌiyonaja Moisés kemari najló:

—¿Naje ta unká jemaꞌalá Tupana kemaká ijló ke jaꞌapiyá? Iꞌijnajika ee najwaꞌaté nókajo, ikapichajo. 42 Iꞌijnaniña najwaꞌaté nókajo. Unkale Tupana iꞌimalaje ijwaꞌaté, neká kapichátajeño iká. 43 Aꞌajná ñoꞌojó kemachi neꞌemajé iwátakana nakú, nenókakoloje ijwaꞌaté, nakapichátakaloje iká penaje. Ikapichajo, iyuríkale Tupana jaꞌapiyá jemaꞌakana, ñakele unká Tupana iꞌimalaje ijwaꞌaté.

44 Eꞌiyonaja unká naꞌalá nanakojó ripurákaꞌalo, neꞌejná nalokoꞌopani najwaꞌaté nókajo. Eyá Moisés yuriro rejeja. Ñaké kaja kaichama, Tupana purákaꞌalo jipa nakú lanaꞌakéjami iꞌimakare chu, yuriko kaja re. 45 Nephaka rejo aú napinana iphaño kaja najimajo najwaꞌaté nókajo. Kajrú rewá iꞌimakaño, amalecítana, cananéona, kele jáchoꞌoko najwaꞌaté nókajo. Nechoꞌota Israel lakénami Horma ejo, íkiꞌija wani nakapichátaka neká.