2 —Piꞌiwapá piyukeja Israel lakénami wakáraꞌajeño yaní eꞌiyayá iyamá iphata jiꞌimaji nakojé kele achiñana, apú, apú ke, lakénami nakiyana. Piꞌiwapaje pajluwano ke neꞌiyayá, piwakáraꞌakaloje neꞌejnaká Canaán teꞌeré, teꞌerí noꞌojíkare ijló ejo, namákaloje mékeka nakaje rewá penaje.

17 Raú Moisés wakáraꞌari neká rejo, namákaloje mékeka nakaje rewá penaje. Neꞌejnaká rejo yámona, rimá najló:

18 —Eko aꞌá inakojó palá mékeka nakaje rewá. Re kaꞌajná kajrú inaꞌukena rewá; katejmúruna wani kaꞌajná neká; maliyáruna kaꞌajná neká. 19 Amaje kaja mékeka pajimila rewá. Re nañakaré rewá mapeja kaꞌajná, aꞌarumakaji meꞌejñapí nojé nakiyá laꞌakanami, jipa nakiyá laꞌakanami kaꞌajná riká. Re kaꞌajná kurara, jipa nakiyá laꞌakanami, chipúkaꞌari rinakuwá piyuke, mapeja kaꞌajná nañakaré desierto chuwá. Amaje kaja mékeka teꞌerí rewá: palani kaꞌajná, puꞌuwareni kaꞌajná; 20 kajrú kaꞌajná paijí icha rewá, unká kaꞌajná. Ikeroꞌoniño, eko ijñaꞌá nojló paijí icha nakiyana majó —ke rimaká najló.

21 Raú neꞌejná rejo; piyukeja naꞌapaka reꞌiyowá; kaja natajata reꞌiyowá chiraꞌakano. 25 Iyamá inaꞌuké leꞌejé ke kala neꞌemaká rewá rewájena kejílaꞌakana nakú. 26 Rejéchami napaꞌakó piño napumí chuwá ají ke Cades ejo. Desierto ií iꞌimari Parán. Re Moisés, eyá Aarón, kele iꞌimaño nawátakana nakú, piyukeja Israel lakénami waꞌaté. Nephaka nanaku ee, neꞌemá najló mékeka namaka rewá yukuna. Nayaꞌatá kaja najló paijí icha najñaꞌakare reyá iꞌimaká. 27 E nemá Moisesjlo:

—Kaja weꞌemá teꞌerí piwakáraꞌakare weꞌemaká amaje. Kewaka, palani wani rewá, iná iꞌimakáloje penaje, kajrú wani nakaje iꞌimakale rewá. Marí paijí icha nakiyana wajñaꞌakare pijló reyá, íkiꞌija aꞌajnejí rewá. 28 Palá nojé wani teꞌerí rewá, eꞌiyonaja kalé katejmúruna wani inaꞌukena rewájena, kajrú wani kaja pajimila rewá. Eyá re kaja kurara, jipa nakiyá laꞌakanami, chipúkaꞌari pajimila nakú, namejñátakaloje nekó richojé penaje. Eyá wamá kaja wapheréruna inaꞌukena re. Wapheréruna wani neꞌemaká, Anac michú lakénami neká. 29 Eyá Négueb teꞌeré ewá re amalecítana nakiyana; eyá ipuré eꞌiyowá hitítana ñakaré, jebuséona, amorréona, kajena waꞌaté; eyá juni Jordán turenawa neká cananéona —ke nemaká Moisesjlo.

30 Rejéchami Caleb manúmaꞌataka piyukeja Moisés awaꞌá iꞌimakaño, rimá najló:

—Palani rejo iꞌijnakana, wajñaꞌakáloje nateꞌeré wajluwa wateꞌerewa penaje. Weká cháꞌatañojla neká.

31 Eꞌiyonaja ajopana rijwákeꞌena, riꞌimakárena waꞌaté nakejílaꞌaje, kemaño rijló:

—¡Unká, unká wani meke laꞌajé weꞌejnalajla rejo najwaꞌaté nókajo! Katejmúruna wani neká wachaje.

32-33 Rejomi napuraꞌó piño ajopana Israel lakénami waꞌaté, nemá najló:

—Teꞌerí weꞌemakare amaje, unká palani kalé riká ta. Unká wani aꞌajnejí iphala palá nanakojé rewá, raú natakaꞌatono. Wamá kaja re achiñana wapheréruna wani, katejmúruna, Anac michú lakénami neká. Naꞌapejé wamó majichíraꞌapana ñani ke, ñakeja kaja napechu wanaku: “Majichíraꞌapana japi neká ke”.