María, Aarón waꞌaté puraꞌañó puꞌuwaré neꞌewé Moisés nakú. Riyukuna marí
12
María, Aarón waꞌaté, keñoꞌoñó puꞌuwaré neꞌewé Moisés nakú puraꞌakano, riwáꞌakakole pajluwájaru Etiopía teꞌeré eyájeru waꞌaté iꞌimaká. 2 Nemá kaja rinaku: “Unká rijwaꞌateja kalé Tupana puraꞌono, ripuraꞌó kaja wajwaꞌaté”, ke. Tupana jemaꞌarí mékeka nemaká rinaku.3 Unká wani Moisés laꞌaké rikó weꞌepiri ke; unká na apú iꞌimalá riká ke péchuri iꞌimaká. 4 Raú Tupana kemari Moisés, Aarón, eyá María, kélejlo neꞌejnakáloje Tupana ñakaré ejo, Tupana Pechu iꞌimakare chu ejo. Raú neꞌejná rejo. 5 Rejéchami Tupana witúkaꞌaka juni juwákaꞌala chuwá riñakaré numanaje. E riwaꞌa Aarón, María, kélejlo, neꞌejnakáloje rejé penaje. Raú neꞌejná rejo, 6 e Tupana kemari najló:
—Jemaꞌá marí numájikare nakú ijló: Nupurákaꞌalo jaꞌapátajeri iꞌimakachu ijwaꞌaté, nupuraꞌó rijwaꞌaté ritapú chu. Ramá kaja kaꞌajná nakaje nuyaꞌatákare rijló ritapú. Ilé ke nupuraꞌakó rijwaꞌaté. 7 Eyá marí nujwaꞌaté jápajeri Moisés, unká ñaké kalé nupuraꞌó rijwaꞌaté, ajopana nujwaꞌaté jápajeño chaje wani remaꞌakale noꞌopiyá. 8 Ñakele palá nupuraꞌakó rijwaꞌaté; palá kaja remaꞌaká nupurákaꞌalo numakare nakú rijló, eyá ¿naje unká ikeroꞌoló puꞌuwaré rinaku puraꞌakano piyá? —ke Tupana kemaká najló.
9 Kaja wani Tupana yúchaꞌo nachá, raú raꞌapá reyá. 10 Waꞌató ke juni juwákaꞌala jaꞌapaka kaja reyá, jukacha riꞌimaká naliyá. Rejéchami María napona nakú laꞌakó jarepí ke, ruma patákaꞌaro kaja. E Aarón pajnoꞌoró ruchaje yakáꞌajo, amari ruma keñoꞌoká patákaꞌakajo, 11 raú rimá Moisesjlo:
—Pilaꞌá wajló nakaje: piwajániña weká marí puꞌuwaré walaꞌakare pachá. Mapechúruna ke wani wapuraꞌakó pinaku puꞌuwaré. 12 Piyuríniña ruꞌumaká kaja takaꞌakayo ke, peꞌiyochá majaꞌakó ke.
13 Raú Moisés puraꞌaró Tupana waꞌaté, rimá rijló:
—Tupana, pilaꞌá wajló nakaje, mawó numaká pijló, pipalaꞌatákaloje ruma rojló penaje.
14 Raú ripalaꞌatá runapona rojló, rejomi rimá Moisesjlo:
—Roraꞌapá athupákela rujimá chojé kaꞌajná, nawakáraꞌajla ruyuriko rokó inaꞌuké liyá, pajimila yámojo pajluwaja jápakaje ketana, apáñaꞌakajo wani riꞌimakale inaꞌukejlo. Ñaké ilaꞌajika ruká. Iwakáraꞌaje ruyuriko pajimila yámojo pajluwaja jápakaje ketana. Rejomi rupaꞌajó, ruꞌumakáloje ajopana inaꞌukena waꞌaté penaje.