Nakhaꞌaká Tupana maná, unkale riꞌimi iꞌimalá najló, yukuna marí
11
4 Ajopana teꞌeré eyájena iꞌijnaño kaja Israel lakénami waꞌaté iꞌimaká. Kakámeꞌe wani neꞌemaká riꞌimi ajñakana nakú. Ilé kaje jimaje Israel lakénami akhaꞌá Tupana maná, nemá pajlokaka: “Kamuꞌují walaꞌaká riꞌimi nakú maárowa. 5 Egipto e weꞌemaké wakajé, wajñake jiña wawátajika ke. Mapeja naꞌajika wajló riꞌimajika rewá, unká riwemí iꞌimaké wajló. Wajñake kaja nakaje icha rewá iꞌimajika, jayu kaje. 6 Eyá maare ta watakaꞌá meꞌepijí nakú; maná, rikata ja kalé wamá”, ke nemaká.7 (Nakaje icha ijí, kapajé nojé, jewalukuni, ke maná amákana iꞌimaká. 8-9 Meríyaꞌa, punama jilá kaje, kele nakiyá laꞌakanami, ke mela riꞌimaká. Rikaja kalé najñake.)
10 Moisés jemaꞌaká meke nakhaꞌaká Tupana maná ilé kaje jimaje aú kajrú riyúchaꞌako nachá, ñaké kaja Moisés yúchaꞌako nachá. 11-12 E rimá Tupánajlo:
—¿Meke kaꞌajná pipechu nunaku? Unká naraꞌapá kalé nuká; unká kaja naló kalé nuká, nuwáꞌakaloje neká nukápiwa penaje, iná wáꞌaka kerákoꞌopa ke, teꞌerí parukákare nachiꞌiná michúnajlo iꞌimaká ejo. 13 ¿Mere eyá chi nuphátaje riꞌimi chuwa najló? Neyako nemaká nojló: “Paꞌá wajló riꞌimi”, ke. 14 Unká méñoꞌojo nujñaꞌalá mariruna inaꞌukena wakáraꞌajeri iꞌimakana panaku. 15 Ilé keja pilaꞌajika ee nuká chapú, palani pikapichátaka nuká, noꞌopákaloje marí kaje chiyá penaje.
16 Raú Tupana kemari Moisesjlo:
—Pawakata nawakáraꞌajeño (70 neꞌemaká) pheñawaꞌaní, piyukeja napechu iꞌimakárena nakú palá. Neká piwáꞌaje majó, marí pají nuꞌumakare chu ejo. Pimaje najló, natáraꞌakoloje pijwaꞌaté maare. 17 Rejéchami nuwitúkaꞌajika rejé, e nupuraꞌajó ijwaꞌaté, eyá nujñaꞌajé péchuji noꞌokare pijló nakiyana, noꞌokáloje najló riká penaje. Raú nawakáraꞌaje kaja inaꞌuké pijwaꞌaté, rejéchami kaja unká pikoja kalé piwakáraꞌajika neká. Piyukeja neká aꞌajeño piñathé nawakáraꞌakana aú. 18 Ñakele chuwa pimicha pijwaꞌatéjenajlo, nalaꞌakáloje napéchuwa palá penaje. Muní najñájika riꞌimi. Kaja nomaꞌá meke nemaká riꞌimi nakú, nemá kaja: “Richaje palaka weꞌemajika Egipto teꞌeré nakú iꞌimajika”, ke. Noꞌojé najló riꞌimi, najñákaloje penaje. 19 Unká meke kálaja kalé najñájika riꞌimi. 20 Pajluwata keri ketana najñájika riká. Nayaꞌajiko rajñakana nakú ejená najñaje riká, unkale nawátala nuká. Najwaꞌaté nuká, eꞌiyonaja nemá nanakuwá: “¿Naje wáchoꞌo Egipto teꞌeré eyá iꞌimaká?” —ke Tupana kemaká rijló.
21-22 Raú Moisés kemari rijló:
—¿Mere chi jémana pirakana, ovéjana, kajena, neꞌimi iphákaloje nanakojé penaje? (600,000 achiñana neꞌemaká, eyá nachaje inaana, yuwaná waꞌaté iꞌimaká) Waꞌakela najló piyuke jíñana, juni jalomi jakú iꞌimakaño, unká kaja riphálajla nanakojé.
23 Tupana kemari rijló:
—¿Meke chi pipechu nunaku: “Wejápaja riweꞌepika nakaje laꞌakana nakojé”, ke? Chuwa pamájika, numíchaje nakú pijló iꞌimichaka, iphaka rená chojé.
24 Rejomi Moisés iꞌimari riyukuna ajopánajlo. Rejéchami setenta pheñawilana iꞌimakaño awakako Tupana ñakaré, kamejeri ímami nakiyá laꞌakanami nakojé. Chipu, chipu ke nawakako rinakojé. 25 Raú Tupana witúkaꞌari juni juwákaꞌala chu Moisés waꞌaté puraꞌajó. E rijñaꞌá péchuji, raꞌakare Moisesjlo iꞌimaká nakiyana. Raꞌá rinakiyana neká seténtajlo: apujlo, apujlo, ke, raú nakeñoꞌó ajopana Israel lakénami waꞌaté puraꞌakano. Tupana purákaꞌalo jaꞌapátajeri puraꞌakó, ke kaja napuraꞌakó najwaꞌaté. Meketánaja kalé riꞌimaká ñaké najló.
26 Re kaja iyamá achiñana iꞌimaño. Setenta, Moisés iꞌiwapakárena nakiyana neꞌemaká. Pajluwaja ií iꞌimari Eldad, apú ií iꞌimari Medad. Unká neꞌejnalá ajopana waꞌaté, rewaja nayuró napajré jaꞌapí. Eꞌiyonaja ñaké kaja péchuji iphaka nachaje rejo, raú ñaké kaja napuraꞌakó nawaꞌá iꞌimakaño waꞌaté. 27 Raú pajluwaja walijímaka jechoꞌoró Moisés ejo. Riphaka rinaku ee, rimá rijló:
—Eldad, Medad waꞌaté, puraꞌañó Tupana purákaꞌalo jaꞌapátajeño puraꞌakó, ke kaja wajwaꞌaté rewá.
28 E Josué, Nun iꞌirí, walijímaka riꞌimaká wakajé, rikeñoꞌó Moisés ñathé aꞌakana. Riká penájemi kemari Moisesjlo:
—Moisés, pimicha najló, napuraꞌakó piyá ilé ke.
29 Eꞌiyonaja Moisés kemari rijló:
—¿Pimejajné chi nuká? Palani Tupana aꞌakajla péchuji piyukeja inaꞌukénajlo, neꞌemakáloje Ripurákaꞌalo jaꞌapátajeño ke kaja raú penaje.
30 Rejomi Moisés paꞌaró piyuke pheñawaꞌaní waꞌaté napajrela ejo.
Tupana wakáraꞌaka najló kajrú putúruna yukuna marí
31 E kaja Tupana wakáraꞌari karená aphoꞌoká juni jalomi eyá. Riká karená eꞌiyowá kajrú putúruna witúkaꞌaka Israel lakénami iꞌimaká ejé; kajrú neꞌemaká piyuke napajré awaꞌó, riyámojo waꞌató. Pajluwa kala ketana iná jaꞌapaka napajré iꞌimaká awaꞌayá, ewá waꞌató putúruna iꞌimaké. 32 Riwakajé piyukeja inaꞌukena iꞌimaká napatakana nakuja, lapí waꞌató napataké neká. Muní ke ñakeja kaja piño neꞌemaká napatakana nakuja. Unká na kalé unká manoꞌotala cincuenta jaꞌapejé kuwáꞌala puꞌutheno waja putúruna aú. Neká nenota, rejomi nayúmaꞌa neꞌimi, rimakáraꞌakoloje akijñójojlo penaje. 33 Nakeñoꞌoká rajñakana ee, Tupana yúchaꞌaro nachá, akuwaná riwajá neꞌemaká. Nakhaꞌákale rimaná iꞌimaká, kajrú nanakiyana takaꞌatako riwakajé. 34 Rejeja najaꞌá weꞌepiño natukumó naꞌajnewaja ajñakana tami.