Watánaꞌakaje iꞌimaká wakajé yukuna marí
35
Moisés awakátari piño piyuke rijwaꞌatéjena, Israel lakénami, rimakáloje najló: “Tupana kemari nojló walaꞌakáloje marí ke penaje: 2 Wajápaje pajluwa kuwáꞌata ke kala japi. Eyá iyamá kuwáꞌata ke kala laꞌaká wakajé, unká na jápalaje, riká weꞌechú kaꞌalá japi weꞌejnatákaloje wapéchuwa Tupana nakuja, rileꞌejé weꞌechú kaꞌalá riwakajé iꞌimakale. Jápajeri riwakajé, nókana iꞌimajeri. 3 Riwakajé iꞌimajika ee iñakaré chuwá, jiyá waꞌató unká kaja aphoꞌotálaje, ke Tupana wakáraꞌaka walaꞌaká”, ke Moisés kemaká najló.Israel lakénami awakátaño nakaje, nalaꞌakáloje nawakákaꞌalo ñakarelana penaje. Riyukuna marí
4 E Moisés kemari piño piyukeja Israel lakénamijlo: “Marí ke Tupana wakáraꞌaka walaꞌaká: 5 Chuwa wátajeño aꞌajeño Tupánajlo nakaje napechu nakú riꞌimajika ke. Marí kaje aꞌajé rijló: oro, plata, bronce 6 aꞌarumakaji keꞌiyapé nojé lajnereri, 7 kamejeri ímami, aꞌawaná palá nojé, 8 nakaje jilá kamareji chojé penaje, nakaje puꞌumé nojé amarí, 9 jipa kamuꞌujini, eyá nakaje palá nojé sacerdote wakáraꞌajeri aꞌarumaká nakojé penaje. Kaje maká aꞌajé Tupánajlo”, ke Moisés kemaká najló.
10 Rimá piño najló: “Piyukeja weꞌepiño nakaje puwíchaꞌakana iꞌijnajeño majó, nalaꞌakáloje pají Tupana wakáraꞌaka rilaꞌakana ke. 11 Neꞌiyajena jápajeño ripajré laꞌakana nakú, ajopana ripana laꞌakana nakú, 12 ajopana laꞌajeño kaichama, Tupana purákaꞌalo iꞌimakáloje richu penaje. 13 Eyá ajopana laꞌajeño mesa, 17 ajopana kujípaꞌajeño aꞌarumakaji pají chojé penaje, 19 eyá aꞌarumakaji sacerdótejlo penaje, Aarón, riyani achiñánajlo waꞌató”, ke Moisés kemaká najló.
20 Raú piyuke Israel lakénami jaꞌapaño reyá. 21 Re neꞌiyajena pechu laꞌaró puꞌují wani, naꞌakáloje nakaje Tupánajlo penaje, raú napaꞌó piño napumí chuwá, naꞌakáloje nakaje Tupánajlo penaje, raú nalaꞌakáloje najluwa nawakákaꞌalo ñakarelana penaje, richu Tupana iꞌimakáloje najwaꞌaté penaje. Piyukeja nakaje nawátakare pají laꞌajona penaje, najñaꞌá najwaꞌató, aꞌarumakaji kaje maká. 22 Rejéchami achiñana, inaana waꞌató, iꞌijnataka nakaje rejo nawátaka ke. Kajrú nephátaka rejo nakaje keꞌiyapé nojé: neꞌejwí chiyá kúwaꞌatajona, murewa, nakaje oro nakiyá laꞌakanami, kaje maká naꞌá Tupánajlo. 23 Neꞌiyajena aꞌakeño kaja palá nojé aꞌarumakaji, keꞌiyapé nojé lajnereri; 24 neꞌiyajena aꞌakeño kaja palá nojé pejruꞌuwá bronce, plata kaje maká; ajopana iꞌijnatákeño rejo palá nojé aꞌawaná, nalaꞌakáloje nakaje raú penaje. 25 Inaana iꞌijnatákeño kaja rejo keꞌiyapé nojé nakaje nañaꞌakare palá nojé inimú aú, keꞌiyapé nojé lajnereri. 26 Nalaꞌá kaja palá nojé nakaje kawayá pirakana chijnemi nakiyana ñaꞌakanami. 27 Eyá nawakáraꞌajeño iꞌijnataño kaja rejo jipa kapajé nojé, palá nojé, sacerdótena aꞌarumaká nakojé penaje. 28 Nakaje puꞌumé amarí, nakaje jilá, kaje maká, neꞌejnatake kaja rejo. 29 Piyuke Israel lakénami nakiyana wátakeño, iꞌijnatájika nakaje rejo. Tupánajlo ke aꞌakanami riꞌimajika, raú nalaꞌakáloje riñakaró, riwakáraꞌaka neká ke penaje.