—Pawata piño iyamata jipa rejenowaja, apú pimajákaꞌatakare iꞌimaká ke kaja, nulanaꞌakáloje piño Nupurákaꞌalo rinakojé penaje. Nulanaꞌajé rinakojé rikaja kaja purákaꞌaloji, apata pimajákaꞌatakare nakú iꞌimaká, ke kaja.

4 Raú Moisés jawátari iyamata jipa rapumí chojé. E muní ke lapiyami, ripaꞌó piño ipuré Sinaí jiꞌiwátaje, iyamata jipa rikapi ke, Tupana wakáraꞌaka riꞌimaká ke.

5-6 Rejé Tupana witúkaꞌari piño richaje juni juwákaꞌala kaje eꞌiyowá, e riphá Moisés jimaje. Rejéchami rimaká rií aú kaphí rijló marí ke:

—Iwakáraꞌajeri wani nuká Tupana. ¡Palájneꞌeke nuká, weꞌepiri piyukeja inaꞌuké muꞌují; unká nuyúchaꞌalo kiñaja inaꞌuké cha; nuwajwé inaꞌuké; kewaka puraꞌajero kaja nuká! 7 Unká wani nuyurílaje íkiꞌija inaꞌuké wátakana. Nomajo kaja inaꞌuké chaje puꞌuwaré nalaꞌakare liyá, eyá unká nemaꞌalá noꞌopiyá kaje liyá. Eyá unká yurílaño puꞌuwaré laꞌakana naliyó nuwajaje, nayani, nalakénami, kele waꞌató —ke rimaká rijló.

8 Ilé ke Moisés jemaꞌaká Tupana puraꞌakó aú, rijlámaꞌo teꞌerí jimaje kiñaja. Reyá iꞌimajemi ripechu iꞌimari palá wani Tupana nakú, e rimá rijló marí ke:

9 —Tupana, nuwakáraꞌajeri wani, kewaka pipechu iꞌimajika ee nunaku palá, piꞌimá wajwákeꞌewe. Nuweꞌepí unká wani jemaꞌalaño iná jaꞌapiyá neká nujwaꞌatéjena, eꞌiyonaja pamó wachaje puꞌuwaré walaꞌakare liyá. Piweꞌepí wanaku, pileꞌejena inaꞌukena ke.

10 Tupana kemari piño Moisesjlo:

—Pemaꞌá numájikare nakú pijló meꞌetení. Chuwa nulaꞌajika nakaje piyukeja pileꞌejena inaꞌukena waꞌaté. Ñakele chuwa nulaꞌajika nakaje, unká joꞌó wani nulaꞌalare, piyukeja inaꞌukénajlo. Raú piyuke iká awaꞌá iꞌimakaño, amákaloje meke laꞌajérika nuká. Palá wani nakaje nulaꞌajíkare iꞌimajika ijló. 11 Ñakele jemaꞌajé ilé Nupurákaꞌalo noꞌochaje pijló jaꞌapiyá. Raú nóchoꞌotaje ijló rewá iꞌimakaño nateꞌeré eyá: amorréona, cananéona, hitítana, ferezéona, hevéona, jebuséona, kele teꞌeré eyájena nóchoꞌotaje ijló reyá. 12 Ipuraꞌaniño pajwaꞌatéchaka, ilaꞌakáloje nakaje pajlokaka, riyuríkoloje ñaké, iꞌimaká piyá jepoꞌokéjanami ke napurákaꞌalo jaꞌapiyá. 13 Eyá ilaꞌajé marí ke: Ikajyaꞌataje naleꞌejé altares, imajákaꞌataje kaja piyukeja nakaje nalaꞌakare, riꞌimakáloje nachiꞌinárikana jenami penaje.

14 Ipechu iꞌimaniña puꞌují najwaꞌaté, nakaje jenami nemakare nakú: “wachiꞌinárikana” ke riká, keraꞌakachi nuꞌumakale.

15 Ipuraꞌaniño pajwaꞌatéchaka, ilaꞌakáloje nakaje pajlokaka, riyuríkoloje ñaké. Nalaꞌajika wakajé puꞌují napéchuwa nachiꞌinárikanajlo, apala nayukupéraꞌaje iká, ajñákaloje najwaꞌaté aꞌajnejí, naꞌajíkare nachiꞌinárikanajlo nakiyana penaje. Ilaꞌaniña nakaje najwaꞌaté nalaꞌajíkare kaje; 16 iyuríniña kaja iyani wáꞌakako nayani waꞌaté. Apala raú iyani nakiyana kaꞌajná laꞌajeño puꞌují napéchuwa nachiꞌinárikanajlo nopumí chojé —ke rimaká Moisesjlo.

27 Tupana kemari Moisesjlo: “Pilanaꞌá chuwa nupurákaꞌalo numájikare pijló, riyuríkoloje Israel lakénamijlo, ilaꞌakáloje nuwakáraꞌaka ke penaje”.

28 Re Moisés iꞌimari Tupana waꞌaté iyamá inaꞌuké leꞌejé ke kala, ketana riꞌitakó raꞌajné, riꞌirakala, kaje liyá. Re rilanaꞌá Tupana purákaꞌalo iyamata jipa nakojé iyamá théꞌela kele nakaje riwakáraꞌakare nalaꞌaká (los dies mandamientos). 29 Riká rikapi ke Moisés paꞌakó piño riyukuna iꞌimajé rijwaꞌatéjenajlo, iphari nanaku. Unká riweꞌepila rijimá mokoꞌoká, Tupana waꞌaté ripuraꞌakole iꞌimaká. 30 Aarón, ajopana inaꞌuké waꞌaté, amaka aú keraꞌathani ke kemachi rijimá mokoꞌoká, nakaje sereni mokoꞌokó kamú japi ke, raú nakeroꞌó ripiyá, unká neꞌejnalá rawaꞌajé. 31 Eꞌiyonaja Moisés kemari Aarón, nawakáraꞌajeño, kélejlo, neꞌejnakáloje rawaꞌajé penaje. Raú nephá rawaꞌajé, rejéchami ripuraꞌakó najwaꞌaté. 32 Kachuwa nakuwaja nephátako rinaku piyukeja, e Moisés iꞌimari najló mékeka Tupana kemaká rijló, nalaꞌakáloje penaje, ipuré Sinaí jiꞌiwata nakú riꞌimaká wakajé yukuna. 33 Riñapátakaja najwaꞌaté puraꞌakano ejomi, rapáraꞌa rijimá aꞌarumakaji aú.

34 Rejomi Moisés iꞌijnari piño Tupana waꞌaté puraꞌajó. Rejéchami rikaꞌaká aꞌarumakaji rijimá chiyá, ripuraꞌakó Tupana waꞌaté ketana. Ráchoꞌoko reyá ejomi, raꞌapata inaꞌukejlo nakaje Tupana kemakare nakú rijló, nalaꞌakáloje penaje yukuna. 35 Israel lakénami amaño piño rijimá mokoꞌoká, raú rapáraꞌa piño riká aꞌarumakaji aú. Ripuraꞌajiko Tupana waꞌaté kewá, rikaꞌajíkano rijimá chiyó riká.