23
Tupana kemari kaja najló: “Iꞌimaniña nakaje, unká kewaka kalé iꞌimakare yukuna. Apú laꞌajika ee nakaje puꞌuwaré, pimichoꞌotániña puꞌuwaré rilaꞌakare chaya. 2 Kajrú kaꞌajná inaꞌuké laꞌajika puꞌuwaré. Pilaꞌaniña ñaké kaja najwaꞌaté. Nawátaje kaꞌajná apú wajákana puꞌuwaré rilaꞌakare chona, raú kaꞌajná ajopana puraꞌajó richaya, nawajaka piyá riká. Pipuraꞌaniño ñaké kaja richaya najwaꞌaté, reja nawajáreja riká puꞌuwaré rilaꞌakare lokópaꞌala. 3 Apala nawátaje kaꞌajná pajluwaja kamuꞌují laꞌaká wajákana, rilaꞌakale puꞌuwaré. Piweꞌepíniña rimuꞌují, kamuꞌují laꞌaká riꞌimaká eꞌiyonaja.4 “Apala pamaje chapú pinaku péchuri leꞌejé jema pirakana kaꞌajná, rikawarute kaꞌajná, kapicharo penájemi jaꞌapaka mapeja. Eko pipaꞌatá rijló riká. 5 Piyuríniña chapú pinaku péchuri ñathé aꞌakana. Apala pamaje kaꞌajná rikawarute jaꞌakó nakaje, ranapíkare kachicha jaꞌapiyá. Eko paꞌá riñathé rikachicha jáchoꞌotakana aú.
6 “Napuraꞌajó kaꞌajná pajluwaja kamuꞌují laꞌaká wajákana nakú. Iwajániña riká mapeja; iꞌijnatá ipéchuwa palá paineko, iweꞌepíkaloje mékeka riwajákana puꞌuwaré rilaꞌakare pachá. Unkájika ee rilaꞌá puꞌuwaré, iwajániña riká mapeja. 7 Ipajlániña apú nakú mapeja, nenókaloje riká richona penaje. Nuká wajájeri wani arutákajeño apú mapeja nawakáraꞌajeñojlo, nenókaloje riká penaje, unká rilaꞌalá puꞌuwaré eꞌiyonaja. 8 Iwakáraꞌajeñojlo numá: iyuríniña apú aꞌaká ijló liñeru, ilaꞌakáloje najló nakaje nawátaka ke penaje. Naꞌajika ee liñeru ijló, nalaꞌajé mejluruna ke iká, ilaꞌaká piyá palá nakaje pajimato ke piyuke inaꞌukejlo.
9 “Ilaꞌaniña chapú apú, ajopana teꞌeré eyaje kaꞌajná riꞌimakale. Kaja iweꞌepí mékeka nalaꞌaká iꞌimaká chapú, Egipto teꞌeré nakú iꞌimaké wakajé, ajopana teꞌeré eyájena iꞌimakale.
12 “Ilaꞌá ijápakaꞌala pajluwa kuwáꞌata ke kala eꞌiyá. Iyamá kuwáꞌata ke kala laꞌaká wakajé iwatánaꞌaje. Ijwaꞌaté iꞌimakaño, unká kaja jápalaje watánaꞌakaje wakajé.
13 “Jemaꞌá piyuke nakaje, nuká Tupana kemakare nakú ijló, jaꞌapiyá. Ipechu iꞌimaniña ajopana nakú: ‘Wachiꞌinárikana japi neká’, ke; ipuraꞌaniño kaja najwaꞌaté; ipuraꞌaniño kaja nanaku.
14 “Weji ke pe ikajmoꞌojíkono nojló pajluwa jarechí japi. 15 Jáchoꞌoko Egipto eyá iꞌimaká iphájika rená chojé wakajé, ilaꞌajé pan mamúraꞌatakanaru leꞌejé kajmoꞌokajo. Riwakajé pajluwa jápakaje ketana ajñájika pan mamúraꞌatakanaru ikajmoꞌojiko ketana. Kaja numá ijló rinaku mékeka ilaꞌajika riká iꞌimaká. Unká na kalé iꞌijnajeri ripéchuwa laꞌajé nojló puꞌují, unkájika ee rijñaꞌá nakaje rijwaꞌató, raꞌakáloje nojló penaje.
20 “Pemaꞌá, nuká wakáraꞌajeri nujwaꞌateje, jeꞌechú chiyaje, iꞌijnaká itukumá. Riká mejñátajeri iká chapú kaje liyá iꞌijnajika ewá. Riwáꞌaje iká pukunaji, nulamáꞌatakare ijló iꞌimaká ejo. 21 Aꞌá inakojó rimájikare nakú ijló; jemaꞌá raꞌapiyá, nuwakáraꞌakare riꞌimakale. Ilaꞌaniña apoꞌojó rimájika ijló liyá. Unká ramálajo ichaje, ilaꞌajika ee puꞌuwaré. 22 Eyá ilaꞌajika ee piyuke nakaje rimájikare nakú ijló, nuká nókajero ichaya, chapú inaku péchuruna waꞌaté. 23 Nujwaꞌateje, jeꞌechú chiyaje, iꞌijnajeri itukumá. Riwáꞌaje iká amorréona, hitítana, ferezéona, cananéona, hevéona, jebuséona, kele teꞌeré ejo. Nukaꞌajé neká nateꞌeré nakiyá ijló. 24 Puꞌuwaré laꞌajeñó wani neꞌemakale, ilaꞌaniña kalé nalaꞌaká ke kaja. Ijlámaꞌaniño kaja najwaꞌaté nakaje jenami, nemakare nakú: ‘Wachiꞌinárikana riká’, ke jimaje. Unká iphálaje nachiꞌinárikana jaꞌapí najwaꞌaté. Lanakiya ikapichátaje naliyá piyuke nachiꞌinárikana jenami; piyuke imajákaꞌatajika riká naliyá, jipa nakiyá laꞌakanami nachiꞌinárikana ke iꞌimakare waꞌató. 25 Nuká Tupana jaꞌapija kalé iphaje, raú nulaꞌajé inaku palá. Ñakeja wani noꞌojika ijló aꞌajnejí, juni kaje waꞌaté. Noꞌopátaje támikaje inakiyá. 26 Jupi iꞌimajika ejaꞌawá chu. Noꞌojé kaja inaana ñathé, nayani iꞌimakáloje penaje; unká pajluwájaru iꞌimalaje mewakú neꞌiyowá”, ke Tupana kemaká najló.