—Walaꞌajé piyuke nakaje Tupana wakáraꞌaka walaꞌaká ke.

4 Rejomi Moisés lanaꞌarí piyuke nakaje Tupana kemakare nakú rijló iꞌimaká. Muní ke lapiyami rijmeꞌetá, rejomi ripitá jipa ipuré jiꞌilaje. Iyamá iphata jiꞌimaji nakojé kele jipa ripitá, nanámana nakojé ripitá riká. 5 Rejomi riwakáraꞌa walijímakana noka jémana pirakana. Nenó neká Tupánajlo, ripechu palaꞌakóloje puꞌuwaré nalaꞌakare liyá penaje, Tupana pechu, inaꞌuké pechu waꞌaté, iꞌimakáloje palá panakuwáaka raú. 6 Moisés ñaꞌarí nérami nakiyana kuya kaje chojé. Peꞌiyowá rinakiyana riwichaꞌá altar nakojé. 7 Rejomi ripuraꞌó Tupana purákaꞌalo rilanaꞌakare waꞌaté inaꞌukejlo. Richu rimá mékeka Tupana laꞌajika najló nakaje, eyá rimá kaja mékeka Tupana wátaka nalaꞌaká. Nemaꞌaká riyukuna aú nemá piyukeja:

—Waꞌajé wani wanakojó piyuke Tupana kemakare nakú walaꞌakáloje ñaké penaje.

8 Raú Moisés ñaꞌarí rikápojo napirana írami yuríkaro. Riká riwichaꞌá inaꞌuké cha, rimá najló:

—Kaja walaꞌá nakaje pajwaꞌatéchaka Tupana waꞌaté, walaꞌakáloje nakaje pajlokaka, riyuríkoloje ñaké penaje. Marí rírami aú wemá rinaku, kaja keja weꞌemakáloje penaje.

12 E kaja Tupana kemari piño Moisesjlo:

—Piꞌijrá piño ipuré nuꞌumakare nakú jiꞌiwátaje. Re piwátaje nuká; re noꞌojé pijló jipa melanata nojé. Riká nakojé nulanaꞌá Nupurákaꞌalo inaꞌukejlo iꞌimaká, rewíñaꞌatakaloje Israel lakénami, nalaꞌakáloje palá raꞌapiyá jemaꞌakana aú penaje.

13 Raú Moisés iꞌijrari ipuré jiꞌiwátaje; rijwákeꞌewe Josué jáchoꞌoro kaja rijwaꞌaté. 14 Riꞌijnaká yámona, rimá pheñawilánajlo:

—Maáreja iwata weká, majó wephájika piño ejená. Maare Aarón, eyá Hur, kele yuréjeño ijwaꞌaté, neká wakáraꞌajeño iká nopumí chojé. Ñakele ileꞌejé puraꞌakajo iꞌimajika ee pajwaꞌatéchaka, neká lamáꞌatajeño ijló riká.

15 Ilé ke Moisés kemaká najló ejomi, riꞌijrá ipuré jiꞌiwátaje, rejé kaja rikapichó juni juwákaꞌala eꞌiyajé. 16 Tupana leꞌejé mejámaꞌatani iꞌimari riꞌiwata nakú pajluwa kuwáꞌata ke kala ketana. Eyá iyamá kuwáꞌata ke kala laꞌaká wakajé, Tupana wáꞌari Moisesjlo juni juwákaꞌala eꞌiyayá. 17 Kawakaya Israel lakénami amaño Tupana iꞌimaká ipuré jiꞌiwata, kerápela apíroꞌoka ke namaka riká. 18 E Moisés mujlúkaꞌari juni juwákaꞌala eꞌiyajé, riꞌijrá ipuré nakuwá, re riꞌimá iyamá inaꞌukena leꞌejé ke kala ketana.