22
“Apala pajluwa kaꞌajná jataꞌarí apú liyá rematé, na oveja kaꞌajná, rinókaloje riká riꞌimi chaya penaje. Riká iꞌimi kaꞌajná raꞌá ajopánajlo riwemí aú. Ilé jataꞌarí jema pirakana, pajluwana, paꞌatájeri paminajlo rataꞌakare apumí chojé pajluwa théꞌela kele jémana. Eyá oveja kaꞌajná rataꞌajika ee, pajluwa oveja rataꞌajíkare apumí chojé, ripaꞌataje paminajlo paꞌu kele ovéjana. 2 Jataꞌakachi mujlúkaꞌajika ee kaꞌajná apú ñakaré chojé lapí, nenójika ee riká, nori riꞌimaká penájemi unká wajákana iꞌimalaje. 3 Eꞌiyonaja rinójika ee kaꞌajná jataꞌakachi weꞌechú japi, riwajákana iꞌimajé. Eyá ilé jataꞌakachi aꞌajeri nakaje rataꞌakare wemí paminajlo. Eyá unkájika ee na iꞌimá, raꞌakáloje rataꞌakare wemí penaje, rikaja naꞌaré ajopánajlo riwemí aú, rijápakaloje najwaꞌaté mapeja penaje. 4 Nephátajika ee pirájina rataꞌakárena rikapi, raꞌajé paminajlo riwemí. Raꞌajé iyamá pirájina, pajluwa rataꞌakare, apumí chojé.5 “Apú kaꞌajná yuriri ripirana jáchoꞌoko, neꞌejnakáloje naꞌajnewá kulaje phuꞌuteni chuwá, eꞌiyonaja kaꞌajná ripirana iꞌijnaño apú mená eꞌiyajé rinane apichátaje. Raú pirájina miná aꞌajeri mená minajlo rimena eꞌiyayá nakaje, palá nojé wani iꞌimakare, ripirana apichátakare wemí.
6 “Apú kaꞌajná káraꞌari riꞌikakapere eꞌiyá, reyá kaꞌajná keraꞌathani jaꞌó apú nane eꞌiyajé. Raú kaꞌajná kajrú rinane káraꞌatako. Ilé lukúnaꞌari keraꞌathani iꞌimaká, aꞌajeri riwemí, keraꞌathani apichátakare nánejlo.
7 “Pajluwa kaꞌajná yuréjeri rinane kawemí nojé apú waꞌaté riñakaré chu, unká riꞌimalá re ketana, ripechu iꞌimakale rinaku: ‘Riká amájeri nojló nunane palá’, ke. Rikapi riꞌimaká ketana kaꞌajná, apú jataꞌaká riliyá riká. Nephátajika ee rataꞌajeri, ripaꞌataje rijló riká, eyá raꞌajé kaja rataꞌakare wemí paminajlo. 8 Eyá unkájika ee nephata rataꞌajeri, nawáꞌaje ilé rinane iꞌimakare nawakákaꞌalo ñakarelana, nalaꞌakare puꞌují napéchuwa Tupánajlo ejo. Re rimaje paminajlo Tupana jimaje ke: ‘Unká nuká kalé jataꞌarí riká’, ke. Kewaka rimájika ee, unká ripachá kalé riꞌimajika.
10 “Apala pajluwa kaꞌajná puraꞌajero apú waꞌaté, riyuríkaloje rijló ripirá, riꞌimakáloje meketánaja rijwaꞌaté penaje, ripechu iꞌimakale rinaku: ‘Riká amájeri riká palá nojló’, ke. Riꞌimaká rijwaꞌaté ketana kaꞌajná ritakaꞌañáaka riká, na rilaꞌó kaꞌajná ritami, apú kaꞌajná jataꞌarí riká riliyá. Unkachu apú amala apú jataꞌaká riká, 11 amari ripirá apujlo, kemájeri Tupana ií aú ke: ‘Unká nuká kalé jataꞌarí riká’, ke. Kewaka rimájika ee, unká ripachá kalé riꞌimajika, unká kaja raꞌalaje paminajlo riwemí. 12 Nataꞌajika ee riká ramájeri ijlú chu, ramájeri aꞌajeri paminajlo riwemí. 13 Apala yawi, ejaꞌawá eꞌiyowaje kaꞌajná, nójeri ripirá rijwánaꞌapawa penaje. Amari ripirá apujlo, yaꞌatájeri paminajlo ritami lupemí, riweꞌepíkaloje raú kewaka rimaká rijló. Raú unká raꞌalaje paminajlo riwemí.
14 “Apú kaꞌajná kemájeri apujlo, riyaꞌatákaloje rijló rikawarútena nakiyana pajluwa. Eyá riꞌimaká rijwaꞌaté ketana kaꞌajná ritakaꞌañáaka riká; nakaje laꞌakana jimaje kaꞌajná rilaꞌá rikó chapú. Unkájika ee paminá iꞌimá re, yaꞌatari riliyá rikawarute iꞌimaká, aꞌajeri riwemí rijló. 15 Eyá paminá iꞌimajika rijwaꞌaté ketana rilaꞌajiko ee ñaké, unká raꞌalaje rijló riwemí. Eyá riyaꞌatákachu rijló riká riwemí aú kaꞌajná, eyá meke rilaꞌajiko, unká raꞌalaje paminajlo riwemí, raꞌakale rijló riyaꞌatákana wemí.
18 “Iyuríniña inanaru lejñákachilo iꞌimaká; inó ruká.
19 “Inoje kaja laꞌajeño namanaicho pirájina, kamejérina, kajena waꞌaté.
20 “Nori ripirana nakiyana, unká raꞌakáloje nojló (Tupánajlo) riká penaje kalé, lanakiya raꞌakáloje riká apujlo, ripechu iꞌimakare nakú: ‘Wachiꞌinárikana japi riká’, kejlo, nókana iꞌimajeri kaja.
21 “Ilaꞌaniña chapú ajopana teꞌeré eyájena. Iweꞌepí ñaké kaja iꞌimajika ajopana teꞌeré eyájena ke, Egipto teꞌeré nakú iꞌimaká wakajé. 22 Ilaꞌaniña kaja chapú majnúrimina, iwakajílomina, kele. 23 Ilaꞌajika ee neká chapú, napuraꞌajó kaꞌajná nujwaꞌaté, noꞌokáloje nañathé penaje, raú noꞌojé nañathé. 24 Rejéchami nuyúchaꞌajiko ichá, ilaꞌakale neká chapú, raú ajopana kapichátaje iká inókajiko wakajé. Raú iyanímina yuréjeño majnúrimina, ñaké kaja ilúnami yuríjiko iwakajílomina.
25 “Iyaꞌatájika ee liñeru nuleꞌejena inaꞌukena, kamuꞌují laꞌakáñojlo, ikejáꞌaniña naliyá riyaꞌatákana wemí. 26 Apala raꞌajé kaꞌajná pijló ripayétane, liñeru yaꞌatákana wemí. Ñaké riꞌimajika ee, pipaꞌatá rijló riká, unká chiyó ajúwaꞌa, 27 unkale apú ripayétane iꞌimalá, repoꞌotákaloje rikó raú penaje. Unkájika ee pilaꞌá ñaké, apala riꞌimajé riyukuna nojló, raú noꞌojé riñathé, nuweꞌepíkale inaꞌuké muꞌují.
28 “Ipuraꞌaniño puꞌuwaré Tupana nakú. Ipuraꞌaniño kaja puꞌuwaré iwakáraꞌajeño nakú”, ke Tupana kemaká Moisesjlo, raꞌapátakaloje najló iꞌimaká, nalaꞌakáloje ñaké penaje.