12 “Pajluwaja inaꞌuké iꞌikari kaꞌajná apú wilá aꞌawaná aú. Ritakaꞌajika ee raú, ilé riwilá iꞌikajeri nókana iꞌimajeri ripachá. 13 Apala nakaje laꞌakana chaya kaꞌajná pajluwa inaꞌuké iꞌikajé apú wilá, unká ñaké kalé ripechu nakú riwilá iꞌikakana iꞌimaká eꞌiyonaja. Ilé riꞌikakare wilá takaꞌajika ee kaꞌajná, reja iꞌikari riwilá ñaaroja reyá, unká inólaje riká richona. 14 Eyá riyuchá akuwaná kaꞌajná pajluwaja iꞌikajé apú wilá. Ilé riꞌikakare wilá takaꞌajika ee, inoje kaja ilé iꞌikari riwilá iꞌimaká. Riñaajó kaꞌajná altar, nenókare nakú pirájina nojló ejo, eꞌiyonaja inoje riká apú nókana pachá.

15 “Eyá ñaꞌajeri raraꞌapá kaꞌajná, na raló kaꞌajná, inoje kaja.

16 “Inoje kaja jataꞌajeri apú inaꞌuké rijluwa, rijápakaloje rijló penaje kaꞌajná, raꞌakáloje riká apujlo riwemí aú penaje kaꞌajná.

17 “Inoje kaja puraꞌajero puꞌuwaré raraꞌapá nakú, na raló nakú kaꞌajná.

18 “Apala iyamá kaꞌajná nókajeño pajwaꞌatéchaka, e kaꞌajná pajluwaja iꞌikajé apú wilá jipa aú. Riyátheꞌela aú kaꞌajná ritujlaꞌajé kaphí riká, raú kaꞌajná rilaꞌajó ritami. Unká iwajálaje ilé iꞌikari riwilá iꞌimaká. 19 Marí ke ilaꞌajika: Riká aꞌajeri rijápakaꞌala wemí rijló, unká méñoꞌojo rilaꞌalárejla ritami riꞌimaká ketana. Raꞌajé kaja rijló nakaje rilaꞌakare nakú kamuꞌují, aꞌajnejí kaje maká, aꞌajná ritejmoꞌotájiko ejená.

22 “Apala iyamá achiñana kaꞌajná nókajeño pajwaꞌatéchaka, chaya kaꞌajná nalaꞌajé chapú apaꞌawelo, kanupá iꞌimakayo. Raú kaꞌajná ruꞌurí mothoꞌojé matámiru, unká chiyó ruphá roná chojé, eꞌiyonaja unká meke rulaꞌaló. Ñakele laꞌarí chapú ruꞌumaká, aꞌajeri riwemí ruyajná kejáꞌajika riliyá ejé, rikejáꞌajikare iꞌimajika ee palani purákaꞌaloji lamáꞌatajeñojlo. 23 Eyá ripachá kaꞌajná rulaꞌajó rutami wani, jimaje kaꞌajná rutakaꞌajé. Ilé laꞌarí ruꞌumaká chapú, nókana iꞌimajeri. 24 Chapú nalaꞌakare lokópaꞌala, iwajaje neká. Nenójika ee apú, ñaké kaja nenókana iꞌimajika. 26 Apú kaꞌajná apichátajika ee apú ijlú, ñaké kaja rijlú apichátakana iꞌimajika. 27 Apú kaꞌajná apichátajika ee apú aí, ñaké kaja raí apichátakana iꞌimajika.

28 “Pajluwaja jema pirakana achiñá nójika ee kaꞌajná inaꞌuké, ilé jema nókana iꞌimajeri jipa aú. Rejomi unká na ajñálaje riꞌimi nakiyana, unká kaja nawajálaje riminá. 29 Eꞌiyonaja riminá weꞌepíkachu kaꞌajná yurí riká, rijñaꞌó kaꞌajná inaꞌuké nakú, eꞌiyonaja unká ritalá richá. Eyá rinójika ee inaꞌuké, ilé jema pirakana nókana iꞌimajeri, riminá waꞌató.

33 “Apú kaꞌajná ichari ulawí juniphú, rejomi unká ritalá ulawí, naꞌakó piyá richojé. Apú inaꞌuké pirana jaꞌajiko ee kaꞌajná richojé, 34 ilé ichari ulawí iꞌimaká, aꞌajeri riwemí paminajlo, eyá ritami yuréjero aꞌajeri riwemijlo. 35 Iyamá kaꞌajná jémana achiñana nókaño pajwaꞌatéchaka. Kaja ewaja kaꞌajná pajluwaja nori apú. Ilé ke riꞌimajika ee, naꞌajé riwemí aú riká jema pirakana nori apú ajopánajlo, rejomi paminana tamákaꞌatajeño rejenowaja liñeru najluwa. Ñaké kaja natámaꞌatajika rinókare iꞌimi najluwa rejenowaja. 36 Paminá weꞌepíkachu kaꞌajná yurí ripirá, eꞌiyonaja unká ritalá richá. Ripirá jema pirakana achiñá nójika ee kaꞌajná apú leꞌejé jema pirakana achiñá, raú paminá aꞌajé apujlo pajluwaja rematena nakiyana, rinókare apumí chojé. Rejomi riꞌimi yuréjero ilé aꞌarí riwemijlo.