2 “Nuká Tupana, iwakáraꞌajeri, kaphí ipechu iꞌimakare chojé. Nuká jáchoꞌotari iꞌimaká Egipto teꞌeré eyá iꞌimaká, rewájena iphájikale kajrú naꞌapiwá ijló, ijápajika mapeja najló iꞌimajika wakajé.

3 “Ipechu iꞌimaniña nakajena nakú: ‘Neká nuchiꞌinárikana’, ke, nopumí chojé, nuká pajluwaja iꞌimakale ichiꞌinárikana.

4 “Ilaꞌaniña kaja ijluwa nakaje jeꞌechú chuwá iꞌimakaño, nakaje ejaꞌawá chuwá iꞌimakaño, piyuke juni jalomi jakuwá iꞌimakaño waꞌató, ipechu iꞌimaká piyá rinaku: ‘Wachiꞌinárikana jenami riká’, ke. 5 Unká kaja iphálaje nakaje jenami jaꞌapí; ijlámaꞌaniño kaja rijimaje; unká kaja ipechu iꞌimalaje rinaku puꞌují, nukaja kalé pajluwaja iwakáraꞌajeri iꞌimakale, ipechu iꞌimajíkare chojé kaphí. Ñakele nukeraꞌá piyukeja nuleꞌejena inaꞌukena nakú; nuwajaje kaja unká wani wátalaño nuká: nayani, nalakena, nalakénami yaní waꞌató nuwajaje, unká nawátala nuká pachá. 6 Eyá wátaño nuká, laꞌañó nuwakáraꞌaka ke. Nuwata kaja neká íkiꞌija, kaja keja nuꞌumajika nawátakana nakú, nalakénami waꞌaté.

7 “Imaniña nuí aꞌakana aú nakaje nakú mapeja, iwakáraꞌajeri nuꞌumakale, ipechu iꞌimakare chojé kaphí, ñakele nuwajaje riká aꞌajeri nuí mapeja.

8 “Iweꞌepí kaja watánaꞌakaje iꞌimaká wakajé, nuleꞌejé weꞌechú kaꞌalá riꞌimakale. Riwakajé iwatánaꞌaje, iꞌijnatákaloje ipéchuwa nunaku penaje. 9 Re pajluwa kuwáꞌata ke kala weꞌechú kaꞌalá, ijápakaloje rapi penaje. Riká weꞌechú kaꞌalá japi ilaꞌá ijápakaꞌala, 10 eyá iyamá kuwáꞌata ke kala laꞌaká wakajé iwatánaꞌa, nuleꞌejé weꞌechú kaꞌalá riꞌimakale. Ñakele riwakajé unká ijápalaje; unká kaja iyani jápalaje riwakajé. Piyukeja iká watánaꞌajeño riwakajé: ijwaꞌaté jápajeño, ajopana ijwaꞌaté iꞌimakaño, ipirana, kele waꞌató, unká jápalajeño riwakajé. 11 Nuká Tupana laꞌarí pajluwa kuwáꞌata ke kala japi jeꞌechú, ejaꞌawá, teꞌerí, juni jalomi. Eyá piyuke nakajena richuwá iꞌimakaño nulaꞌá kaja iꞌimaká. Eyá iyamá kuwáꞌata ke kala laꞌaká wakajé, unká na nulaꞌalá iꞌimaká, ñakele riwakajé nuleꞌejé weꞌechú kaꞌalá, raú nuwata piyuke iwatánaꞌaka ijápakaꞌala liyá riwakajé, nuleꞌejé weꞌechú kaꞌalá riwakajé iꞌimakale.

12 “Iphá jaraꞌapá, eyá jaló jaꞌapí, iꞌimakáloje júpija teꞌerí noꞌojíkare ijló nakú.

13 “Inóniña inaꞌuké.

14 “Ilaꞌaniña imanaicho apú waꞌaté, apaꞌawelo waꞌaté, kaꞌajná.

15 “Ataꞌaniña ajopana nane.

16 “Ipajlániña apú inaꞌuké nakú, ilaꞌakáloje riká chapú raú penaje.

17 “Iwátaniña ijluwa apú nane: riñakaré kaꞌajná, riyajalo kaꞌajná, rijwaꞌaté jápajeño kaꞌajná, ripirana kaꞌajná, apú rinane kaꞌajná”, ke Tupana kemaká Moisejlo, raꞌapátakaloje riyukuna najló.

18 Piyukeja Israel lakénami jemaꞌaká kajrú pichaní mejé, ñaké kaja namaka kajrú pichaní apíroꞌoka; nemaꞌá kaja luwiluwí kaje mejé; namá kaja kajrú ija jáchoꞌoko ipuré eꞌiyayá. Ilé ke namaka aú, kajrú wani nakeroꞌokó, raú jukáwaja neꞌemaká ipuré liyá. 19 Nemá Moisesjlo:

—Pikaja kalé puraꞌajero wajwaꞌaté, pimájikare wajló nakú wemaꞌajé paꞌapiyá. Unká wawátala Tupana puraꞌakó wajwaꞌaté, apala watakaꞌá raú.

20 E Moisés kemari najló:

—Ikeroꞌoniño. Tupana iphari majó, ratáꞌakaloje iká, ñakeja iphákaloje raꞌapí penaje, ilaꞌaká piyá puꞌuwaré.

21 Eꞌiyonaja juká neꞌemaká ipuré liyá, rikaja kalé Moisés, iꞌijnari juni juwákaꞌala, Tupana iꞌimakare eꞌiyá awaꞌajé.

22 Tupana kemari piño Moisesjlo: “Eko pimá marí ke Israel lakénamijlo: ‘Kaja jemaꞌá nupuraꞌakó ijwaꞌaté jeꞌechú chiyá. 23 Ñakele ilaꞌaniña ijluwa nakaje jenami, oro nakiyá laꞌakanami kaꞌajná, nakaje sereni nakiyá laꞌakanami kaꞌajná, ipechu iꞌimakáloje puꞌují rinaku, ipechu iꞌimaká nunaku ke kaja. 24 Ipitaje nojló teꞌerí pachájechaka altar penaje, rinakojé ikáraꞌatakaloje nojló ipirana nakiyana. Inoje oveja kaꞌajná, jema pirakana kaꞌajná, puꞌuwaré ilaꞌakare chaya, nupechu palaꞌakóloje ijwaꞌaté raú penaje’ ”.